Omicron variant case sa ‘Pinas, 4 na – DOH

ni Lolet Abania | December 27, 2021

Nakapagtala ang bansa ng dagdag na Omicron variant case, kaya nasa apat na ang kabuuang kaso ng nasabing virus.

Ayon kay Department of Health (DOH) Undersecretary Maria Rosario Vergeire, ang ikaapat na kaso ay isang 38-anyos na babae mula sa United States na dumating sa Ninoy Aquino International Airport nitong Disyembre 10 via Philippine Airlines PR 127.

“She was quarantined upon arrival,” ani Vergeire sa isang media forum ngayong Lunes.

Ang pasyente ay nakaramdam ng throat itchiness at sipon nitong Disyembre 13.

Agad namang dinala sa isolation facility ang pasyente matapos na magpositibo sa test nitong Disyembre 15.

“She was discharged after a 10-day isolation on December 24. She remains to be asymptomatic as of this time,” sabi ni Vergeire.

Ayon sa DOH, ang positive result para sa Omicron variant ng nasabing traveler ay lumabas nitong Disyembre 25.

“Kasi ‘yung detection ng Omicron dito, ‘yung detection natin sa sequencing for this fourth case ng Omicron came after when the individual was discharged already,” paliwanag ng opisyal.

“Alam natin na kapag wala ka naman variant of concern, you follow the existing protocol that we have. So nagkaroon siya ng 10 days na isolation,” dagdag ni Vergeire.

Sinabi ni Vergeire na kasalukuyang isinailalim sa home quarantine ang traveler at patuloy na mino-monitor. Nakatakda naman siya para i-retest sa Martes.

Samantala, ayon kay Vergeire nakikipag-ugnayan na ang ahensiya sa Bureau of Quarantine at sa Department of Transportation hinggil sa flight manifest para sa contact tracing.

“Rest assured na lahat naman po ng dumarating, kapag dumating po sila, for example the US, a yellow country, they are all quarantined for five days, tested on the fifth day, once negative, they are sent home but they have to do home quarantine until the 14th day,” saad ng kalihim.

Kaugnay nito, binanggit ni Vergeire na ang mga naging close contacts ng mga Omicron variant cases ay wala pang naire-report na COVID-19 symptoms.

“We are still verifying the other two passengers and lahat naman po ito ay naka-isolate or naka-quarantine pa din po and they are being monitored,” wika ni Vergeire.

Ayon kay Vergeire, may kabuuang 115 bansa sa ngayon ang naka-detect ng Omicron variant, kung saan 51 ang kumpirmado o suspected local transmission.

Israel naitala ang unang kaso ng pagkamatay ng pasyente sanhi ng Omicron variant

ni Jasmin Joy Evangelista | December 22, 2021

Kinumpirma ng isang Israeli hospital ang unang pagkamatay ng pasyenteng may Omicron variant.

Ayon sa Soroka Medical Center sa Beersheba, ang pasyenteng nasa edad 60 ay namatay nitong Lunes matapos ang dalawang linggong pagkaka-admit nito sa Covid ward.

Sa inilabas na pahayag ng ospital, sinabing namatay ang pasyente dahil sa iba’t ibang malalang karamdaman.

“His morbidity stemmed mainly from pre-existing sicknesses and not from respiratory infection arising from the coronavirus,” pahayag nito.

Nagkaroon ng hinala ang ospital na Omicron variant ang dumapo sa pasyente kaya agad itong isinailalim sa DNA analysis.

Nakaturukan din umano ang pasyente ng dalawang dose ng COVID-19 vaccines.

Nitong Martes lamang ay nagtala ang Israel ng 340 kaso ng Omicron variant ng COVID-19.

Isa pa naitala... 3 Omicron variant cases na sa ‘Pinas — DOH

ni Lolet Abania | December 20, 2021

Nakapagtala ang Department of Health (DOH) ng isa pang Omicron variant case ng COVID-19 sa bansa, kung kaya may tatlo na sa kabuuan ang kaso ng naturang virus sa ngayon.

Ayon kay DOH Undersecretary Maria Rosario Vergeire, ang latest case ay isang 36-anyos na returning overseas Filipino (ROF) na dumating sa Pilipinas mula sa Qatar noong Nobyembre 28 via Qatar Airways Flight number QR 924.

“He arrived at Mactan Cebu International Airport from Qatar on November 28 via Qatar Airways… and was noted to have had travel history to Egypt,” ani Vergeire sa isang media briefing ngayong Lunes.

Aniya, hindi ito nabakunahan kontra-COVID-19.

Sa mensahe ni Vergeire sa mga reporters, sinabi nitong ang ROF ay na-quarantine sa Cebu nang ito ay dumating habang nagpositibo sa test noong Disyembre 5. Agad namang nai-transfer ang pasyente sa isang isolation facility.

Gayundin, ang ROF ay nanatili sa isolation hanggang Disyembre 16 at umuwi sa kanilang tirahan sa Cavite noong Disyembre 17, kung saan sumailalim na rin sa home quarantine.

“The case completed his isolation in Cebu before traveling back to Cavite, his home town, where he immediately self-quarantined at home upon arrival,” sabi ni Vergeire.

Sinabi naman ni Vergeire na ang whole genome sequencing result ng pasyente ay lumabas noong Disyembre 18.

Agad ding pinuntahan ang ROF upang isailalim sa re-swabbing at nagnegatibo ito sa test noong Disyembre 19.

“The DOH is already determining the possible close contacts among co-passengers during the flights of this case,” saad ng kalihim.

“The DOH [is] also verifying the test results and health status of all passengers of this flight if there are other confirmed cases or passengers who became symptomatic after arrival,” dagdag ni Vergeire.

Sa ngayon, ayon pa kay Vergeire, natukoy na ng DOH ang tatlong naging close contacts ng pasyente.

“Kung saan na-monitor natin, home quarantine sila. We already re-tested them and all of them had results of negative,” wika pa ni Vergeire.

Magugunitang noong nakaraang linggo na-detect ang kauna-unahang dalawang kaso ng Omicron variant.