Omicron BA.5 variant, pasok na sa ‘Pinas — DOH

ni Lolet Abania | June 3, 2022

Naka-detect na ang Pilipinas ng kauna-unahang mga kaso ng Omicron BA.5 variant sa dalawang indibidwal mula sa Central Luzon, ayon sa Department of Health (DOH) ngayong Biyernes.

Sinabi ni DOH Undersecretary Maria Rosario Vergeire, ang mga pasyente ay walang travel history maliban sa nagtungo ang mga ito sa kanilang polling precinct sa Metro Manila.

Ani Vergeire, kapwa agad na nag-isolate ang mga ito matapos na makaranas pareho ng ubo at sipon, na sa ngayon ay asymptomatic at itinuturing nang nakarekober sa sakit.

“Maliban sa pagpunta sa election precinct dito sa NCR, wala pong travel history ang dalawang indibidwal,” pahayag ni Vergeire sa mga reporters.

Ayon pa kay Vergeire, ang mga pasyente ay nagkaroon ng dalawang close contacts, na miyembro ng kanilang household o kasambahay, at patuloy namang nag-isolate matapos na isa sa mga ito ay nagpositibo sa test sa coronavirus.

Nitong nakaraang buwan, naiulat sa bansa ang kauna-unahang Omicron BA.4 subvariant na isang returning Filipino mula sa Middle East habang sa kasalukuyan nai-report ang 22 kaso ng Omicron BA.2.12.1 subvariant.

Matatandaang binanggit ni World Health Organization (WHO) chief Tedros Adhanom Ghebreyesus noong Mayo na ang mga subvariants BA.4 at BA.5 ang naging dahilan ng surge ng mga kaso sa South Africa.

BA.2.12.1 Omicron subvariant, 22 na.. 5 bagong kaso na-detect sa Western Visayas — DOH

ni Lolet Abania | May 31, 2022

Limang karagdagang kaso ng Omicron subvariant BA.2.12.1 ang na-detect sa bansa sa Western Visayas region, ayon sa Department of Health (DOH).

Ito ang inanunsiyo ni Health Promotion and Communication Service Director Dr. Beverly Ho sa DOH briefing ngayong Martes na aniya, nabatid na tatlo sa mga bagong kaso ay fully vaccinated na mga returning overseas Filipinos (ROFs) mula sa United States.

Ayon sa DOH, na-detect din ang Omicron subvariant mula sa dalawang local cases na parehong fully vaccinated. Dahil dito, umabot na ngayon sa kabuuang bilang na 22 cases ang Omicron subvariant BA.2.12.1 sa bansa matapos na madagdag ang limang bagong kaso nito.

Mga locally-acquired ang 18 rito, kung saan 2 sa National Capital Region, 12 mula sa Puerto Princesa sa Palawan, at 4 sa Western Visayas. Habang ang 4 na infected ng virus ay mga ROFs na naninirahan sa Western Visayas.

Matatandaan na noong Mayo 17, kinumpirma ni DOH Undersecretary Maria Rosario Vergeire na ang bansa ay naka-detect na rin ng local transmission ng Omicron subvariant BA.2.12.1, na may bagong kaso naman na natukoy sa Western Visayas region.

DOH: 3 close contacts ng unang kaso ng Omicron subvariant BA.4, asymptomatic

ni Lolet Abania | May 24, 2022

Asymptomatic lahat ang tatlong naging close contacts ng kauna-unahang kaso ng Omicron subvariant BA.4 na isang Pilipino na nanggaling sa Middle East, ayon sa Department of Health (DOH) ngayong Martes.

Sinabi ni Dr. Alethea de Guzman, officer-in-charge ng DOH Epidemiology Bureau, ang pasyente, na hindi pa nabakunahan kontra COVID-19 at asymptomatic, ay may travel history mula sa Qatar at South Africa.

Ayon kay De Guzman, nakumpleto naman ng returning Filipino worker ang kanyang mandatory quarantine na 14-day isolation mula Mayo 4 hanggang 18, bago pa naging close contact ang tatlong miyembro ng kanyang household, kung saan lahat sila ay asymptomatic at fully vaccinated na rin.

Ayon naman sa DOH, ang testing status ng mga close contacts ay kanila nang bineberipika. Una nang klinasipika ng European Center for Disease Prevention and Control (ECDPC) ang BA.4 bilang variant of concern (VOC), kung saan ito ay maaaring mas transmissible o “cause worse illness.”

Batay sa mga pag-aaral, ang sublineage ay maaaring hindi mag-cause ng severe COVID-19 symptoms kumpara sa ibang Omicron subvariants subalit posibleng mapuno ang mga ospital ulit dahil sa kanyang transmissibility.