‘Pinas, safe pa sa Omicron variant — DOH

ni Lolet Abania | December 9, 2021

Ipinahayag ng Department of Health (DOH) ngayong Huwebes na walang kaso ng Omicron COVID-19 variant na na-detect mula sa pinakabagong whole genome sequencing na kanilang isinagawa.

Ayon sa DOH, ang sequencing ng 48 samples mula sa 12 returning overseas Filipinos (ROFs) at 36 local cases mula sa mga lugar na may high-risk average daily attack rates at mga case clusters ay isinagawa sa University of the Philippines - Philippine Genome Center (UP-PGC) at University of the Philippines - National Institutes of Health (UP-NIH) nitong Miyerkules.

“Of the 48 samples sequenced, 38 (79.17%) Delta (B.1.617.2) variant cases; the rest had non-VOC (variant of concern) lineages or had no lineages detected,” batay sa statement ng DOH. Sa 38 Delta variant cases, 31 dito ay local cases at pito ay ROFs.

Dalawa sa ROFs ay naitalang may travel history mula sa Turkey at isa sa bawat ROF ay nanggaling sa Jordan, Mexico, Netherlands, Panama, at Peru. Sa 31 local cases naman, nai-record ang 6 kaso na nagbigay ng kanilang address sa Cagayan Valley Region, habang 5 cases mula sa Cordillera Administrative Region, 3 kaso bawat isa sa Mimaropa, Bicol, Western Visayas, Soccskargen, at National Capital Region (NCR), 2 cases bawat isa sa Central Luzon at Calabarzon, at isang kaso mula sa Davao Region.

“Based on the case line list, one local case is still active, 27 local and all seven ROF cases have been tagged as recovered, and three local cases are currently being verified as to their outcomes. All other details are being validated by the regional and local health offices,” dagdag pa ng DOH.

Dahil sa dagdag na 38 bagong Delta variant cases kaya umabot na sa kabuuang 7,886 ang naitalang kaso.

Unang mga kaso ng Omicron variant, naitala sa Argentina at Nepal

ni Lolet Abania | December 6, 2021

Nakapagtala ng unang kaso ng Omicron COVID-19 variant sa Argentina, ayon sa health ministry ng nasabing bansa sa South America.

Ang 38-anyos na pasahero ay residente ng western Argentine province ng San Luis, na dumating sa naturang bansa nitong Nobyembre 30 mula sa South Africa sakay ng flight via ng United States at isinailalim sa isolation simula rin noon.

Magugunitang ang Omicron variant ay nagdulot ng takot sa global markets habang muling ibinalik ang mga border restrictions sa mga bansa. Nakasama na rin ang Argentina sa Brazil, Mexico at Chile sa listahan ng mga bansa sa Latin America na may mga na-detect na kaso ng bagong variant.

Ayon sa ministry, ang pasyente na fully vaccinated ay nagbigay ng negative PCR test bago pa ang kanyang pagbiyahe at isa pang negative antigen test nang dumating naman ito sa Buenos Aires.

Ang pasyente ay tinest ulit matapos na ang kanyang kasamahan sa isang work event sa South Africa ay nagpositibo sa test sa COVID-19.

“The epidemiological objective currently is to contain and delay the possible community transmission of new variants of concern,” pahayag ng ministry.

Sinabi pa ng ministry, ang pasyente ay nagkaroon ng close contact sa apat na indibidwal na nasa isolation na rin ngayon, subalit wala ang mga itong sintomas at ang kanilang PCR tests ay negatibo ang resulta. Lahat sila ay sasailalim sa isa pang PCR test matapos ang kanilang isolation period.

Samantala, na-detect na rin ang unang dalawang kaso ng Omicron COVID-19 variant sa Nepal, ayon sa health ministry ng bansa.

Sa inilabas na statement ng ministry, ang 66-anyos na foreigner ay dumating sa Nepal mula sa bansang may nakumpirmang Omicron variant noong Nobyembre 19.

Habang ang isa ay 71-anyos na indibidwal na naging close contact niya ay nagpositibo sa test sa Omicron nitong Linggo. Hindi naman binanggit ng ministry ang nationalities ng dalawang pasyente.

“Both of them are in isolation and getting healthcare under the supervision of health workers,” batay sa statement ng ministry.

Dagdag pa ng ministry, na-traced naman ang 66 iba pang indibidwal na naging close contact ng mga pasyente at lahat sila ay nagnegatibo sa test.

Kamakailan, ipinagbawal ng Nepal ang mga travelers na mula sa walong African countries at Hong Kong dahil sa banta ng Omicron COVID-19 variant.

Mga ospital, naghahanda na sakaling makapasok sa bansa ang Omicron variant

ni Jasmin Joy Evangelista | December 1, 2021

Naghahanda na ang mga ospital sa Pilipinas sakaling makapasok sa bansa ang Omicron variant ng COVID-19.

Sa San Lazaro Hospital sa Maynila, nag-iimbentaryo na ng mga personal protective equipment (PPE) para sa mga health worker at gamot para sa mga pasyente.

"First [preparation] is the inventory of PPEs and anti-viral drugs like remdesivir and tocilizumab. We now have more time to prepare for it and have stocks of medications," ani Dr. Rontgene Solante.

Aniya pa, malaking tulong din ang booster shot para sa mga health workers upang mabigyan sila ng dagdag na proteksiyon laban sa variant.

Ayon naman sa Private Hospitals Association of the Philippines Inc. (PHAPI), walang gaanong pagbabago sa paghahanda ng mga pribadong ospital.

Ang problema nga lang ay ang kakulangan sa health workers.

"Sa hospitals, ang limitation namin ngayon ay ang number of nurses. But right now, tumigil until the end of the year, baka next year na ulit magkakaroon ng mga resignations," ani PHAPI President Jose Rene de Grano.

Ayon naman sa Department of Health (DOH), bukod sa border control, mahalaga ring paigtingin ang COVID-19 testing at agarang isolation ng mga nagpopositibo sa sakit.

Patuloy ang paalala ng mga eksperto sa publiko na sundin ang health protocols at magpabakuna upang maiwasan ang pagpopositibo sa COVID-19.