'Di raw nanghihingi ng bakuna... P-Du30 sa US: May pera kami, bibili kami

ni Ronalyn Seminiano Reonico | August 17, 2021

Humihirit pa si Pangulong Rodrigo Duterte ng karagdagang bakuna kontra COVID-19 mula sa United States dahil sa kakulangan sa suplay nito.

Saad ni P-Duterte sa kanyang weekly address, "I am just asking America to give us more kung mayroon lang sila. I know na 'we first before you.' We understand it and we accept it but if there is an excess of supply, pakitulong naman dito sa amin.

"We have the money. We buy. We do not ask.”

Samantala, umabot na sa 12 million ang naturukan ng bakuna kontra COVID-19 sa bansa mula nang mag-umpisa ang vaccination program at target ng pamahalaan na mabakunahan ang nasa 70% ng populasyon ng Pilipinas.

469,200 doses ng Moderna vaccine, dumating na

ni Lolet Abania | August 15, 2021

Dumating na ang 469,200 doses ng Moderna COVID-19 vaccine sa bansa ngayong Linggo nang hapon. Nasa 319,200 doses ng bakuna ang binili ng national government, habang 150,000 doses ng Moderna vaccine naman ang binili ng private sector.

Sakay ng Singapore Airlines SQ912, lumapag ang shipment sa Ninoy Aquino International Airport (NAIA) Terminal 3 nang alas-3:20 ng hapon ngayong Linggo.

Sa ulat, may kabuuang 12,027,383 indibidwal na ang fully vaccinated kontra-COVID-19, habang 14,100,119 naman ang nakatakdang bakunahan ng kanilang second dose.

100K doses ng Sinopharm galing UAE, dumating na

ni Lolet Abania | August 11, 2021

Isandaang libong doses ng Sinopharm COVID-19 vaccine na gawa ng China ang bagong dumating sa 'Pinas ngayong Miyerkules nang hapon mula sa United Arab Emirates.

Lumapag ang shipment ng mga COVID-19 vaccines sa Ninoy Aquino International Airport sa Pasay City pasado alas-2:00 ng hapon. Kabilang sa mga sumalubong sa pagdating ng Sinopharm vaccines sina National Task Force against COVID-19 (NTF) Assistant Secretary Wilben Mayor, UAE Embassy Acting Charge Affairs Khalid Alhajeri, at Bureau of International Health Cooperation Director IV Ma. Soledad Antonio.

Ayon kay Mayor, ang mga bagong dating na Sinopharm vaccines ay dadalhin sa mga lugar na may mataas na COVID-19 infections. “Kung saan may surge ng cases ng COVID-19, doon natin ide-deploy dahil 'yun ang nangangailangan ng bakuna,” ani Mayor sa mga reporters.

Batay sa World Health Organization, ang Sinopharm vaccine ay may efficacy rate kontra-COVID-19 ng 79% habang ang efficacy naman laban sa hospitalization ay nasa 79%. Sinabi naman ni vaccine czar Carlito Galvez, Jr. na nagpahayag ang UAE na magdo-donate ng 500,000 doses ng Sinopharm, kung saan natanggap ng vaccine ang emergency use authorization (EUA) sa bansa noong Hunyo.

Gayundin, ayon sa Food and Drug Administration (FDA), plano ng gobyerno na bumili ng mas maraming Sinopharm vaccines. Samantala, matatandaang ini-report ni Galvez sa mga nakaraang Talk to the People na 1 milyong Sinopharm doses na donasyon ng China ang nakatakdang dumating sa Pilipinas sa Agosto 21.