SoKor, bibigyan ng 7.01M doses ng Moderna

ni Ronalyn Seminiano Reonico | August 23, 2021

Bibigyan ng 7.01 million doses ng bakuna kontra COVID-19 ng Moderna ang South Korea simula sa unang linggo ng Setyembre, ayon sa health ministry ng naturang bansa.

Inaasahang darating na sa Lunes ang 1.01 million doses ng Moderna sa Incheon Airport, South Korea, ayon sa ministry nito at ang natitirang 6 million ay paunti-unting isusuplay sa bansa.

Saad pa ni Second Vice Health Minister Kang Do-tae, "In response to our request to speed up and expand the vaccine supply, Moderna informed us that it will supply 7.01 million doses by the first week of September."

Samantala, noong Sabado, umabot na sa 50.4% ng populasyon ng South Korea ang nakatanggap ng unang dose ng bakuna at 22.5% naman ang fully vaccinated na laban sa COVID-19.

Nakapagtala rin ang South Korea ng 1,628 bagong kaso ng COVID-19 noong Sabado at sa kabuuang bilang ay umabot na ito sa 236,366. Pumalo na rin sa 2,215 ang death toll sa bansa.

1.26 M doses ng COVID-19 vaccines mula China, dumating na

ni Ronalyn Seminiano Reonico | August 21, 2021

Dumating na sa bansa ang 1.26 million doses ng COVID-19 vaccines mula sa China ngayong Sabado.

Lumapag sa Ninoy Aquino International Airport (NAIA) Terminal 2 ang Philippine Airlines Flight PR 361 na may lulang 1 million doses ng Sinovac COVID-19 vaccines at 260,800 doses ng Sinopharm kaninang umaga.

Samantala, noong Biyernes matatandaang pumalo sa 17,231 ang naitalang bagong kaso ng COVID-19 sa bansa at pahayag ni Sec. Wilben Mayor, head ng Sub-Task Group on Current Operations ng National Task Force (NTF) Against COVID-19, “Malaking tulong ito sa ating mga kababayan para sa pagsalba ng ating mga maysakit at lalung-lalo na ngayong mayroong Delta variant, tumataas ang kaso natin. Kahapon lalo tumaas, malaking tulong itong mga vaccines.”

Kesa sa Sinovac… 'Pinas, mas gustong bumili ng Pfizer at Moderna

ni Lolet Abania | August 19, 2021

Target ng gobyerno na bumili ng mga COVID-19 vaccine doses na mula sa Pfizer at Moderna kapag ang pagde-deliver ng kanilang mga suplay ay stable na.

Ayon kay vaccine czar Carlito Galvez, Jr. sa press conference ngayong Huwebes, inaasahan na ng pamahalaan ang pagdating ng tinatayang 5 milyong doses ng Pfizer COVID-19 vaccine sa Setyembre.

“Yes, we’re exploring to buy more (Sinovac). But, ang ano nga namin, once na nag-deliver na ‘yung majority ng Pfizer at saka Moderna, we might be concentrating on these major brands,” sabi ni Galvez.

Nitong Miyerkules, nasa kabuuang 365,040 doses ng Pfizer vaccine ang dumating sa Pilipinas. Sinabi ni Galvez na marami sa mga bagong supply ng Pfizer vaccine doses ay dadalhin sa mga lugar na wala pang nababakunahan ng ganitong brand.

“So that in the future, once Pfizer picks up their deliveries, they are well aware and they are already well trained on how to handle the sensitivities of Pfizer,” ani Galvez. Ayon sa National Task Force Against COVID-19 (NTF), hanggang nitong Agosto 15, may kabuuang 42,575,350 COVID-19 vaccine doses na mula sa iba’t ibang brands ang nai-deliver sa bansa.