1.5 M doses ng Sinovac vaccine dumating na

ni Lolet Abania | September 10, 2021

Dumating na ang 1.5 milyong karagdagang doses ng Sinovac vaccine sa bansa ngayong Biyernes nang hapon.

Ayon sa National Task Force Against COVID-19, alas-5:55 ng hapon, lumapag ang mga 1.5 milyong doses ng Sinovac vaccine sakay ng Flight PR359 sa Ninoy Aquino International Airport Terminal 2, kung saan ang mga naturang bakuna ay binili ng gobyerno.

“We’re expecting two more deliveries, 3 million next week… So another 6 million tapos may 4 million may darating din from COVAX,” ani NTF special adviser Dr. Ted Herbosa.

“So next week we are expecting 10 million more to continue our vaccination sa iba’t ibang lugar sa Pilipinas. ‘Yung COVAX Astra ‘yun,” dagdag ng opisyal.

Sinabi pa ni Herbosa na ang mga bakuna ay nakatakdang i-distribute sa Lunes, Setyembre 13. “So ito, mag-stay pa rin ito because we will wait for the certificate of analysis (COA) na ‘yung consent by a third party. So that comes in two to three days,” sabi ni Herbosa.

“Once the COA arrives, we immediately distribute to the different recipient areas,” saad pa niya. Nauna nang dumating sa bansa ngayon ding Biyernes, ang karagdagang 502,000 doses ng AstraZeneca COVID-19 vaccine.

COVID vaccine booster sa health workers, oks — Galvez

ni Lolet Abania | September 1, 2021

Pabor si vaccine czar Carlito Galvez, Jr. na mabigyan ng COVID-19 vaccine booster shots ang mga healthcare workers at mga indibidwal na may comorbidities.

“I don’t have any problem with it. Our healthcare workers must be given full protection,” ani Galvez ngayong Miyerkules sa Kapihan sa Manila Bay online forum, na ayon pa sa kanya, ang Chinese biopharmaceutical company na Sinovac ay handang mag-donate ng 500,000 booster doses para sa mga medical workers.

Gayunman, ayon kay Galvez, hinihintay pa ng gobyerno ang rekomendasyon ng World Health Organization (WHO) at ng vaccine expert panel. Hiniling naman ng administrasyong Duterte ang tinatawag na standby authority mula sa Kongreso para sa pagbili ng P45.367 bilyong halaga ng booster doses sa susunod na taon.

Noong nakaraang linggo, sinabi ni Department of Health (DOH) Undersecretary Maria Rosario Vergeire na ang ebidensiya na magbibigay-suporta para sa pagbabakuna ng booster doses ay nananatiling “minimal and incomplete,” subalit aniya, “We already have saved money for our booster shots for 2022 if ever it is approved.”

Pfizer COVID vaccine, for sale na next year — FDA

ni Lolet Abania | August 26, 2021

Inianunsiyo ng Food and Drug Administration (FDA) ngayong Huwebes na posibleng ang mga COVID-19 vaccines ay maging commercially available na sa Pilipinas sa susunod na taon matapos ang full approval sa Pfizer jabs ng United States.

“Possibly early 2022,” ang naging tugon ni FDA Chief Eric Domingo nang tanungin sa isang interview kung kailan magiging commercially available sa publiko ang mga COVID-19 vaccines.

Nitong linggo lang ipinagkaloob ng US FDA ang full approval para sa Pfizer vaccine, kung saan ito ang kauna-unahang COVID-19 shot na nakatanggap ng ganoong approval.

Gayunman, sa Pilipinas, ang full approval ng Pfizer vaccine ay nakadepende sa isusumite ng American drugmaker na aplikasyon para sa certificate of product registration o market authorization.

“Wala pa,” ani Domingo nang tanungin naman kung ang FDA ay nakatanggap na ng anuman mula sa Pfizer na interesado sila na makakuha rin ng full approval mula sa gobyerno.

“But we already sent them the requirements and process for COVID-19 vaccine registration,” sabi ni Domingo.

Matatandaang noong Mayo, sinabi ni Domingo na ang application para sa full approval nito ay pinakamaaga na maaari nilang mai-file nang mga huling buwan ng 2021.

“Maaari na po siyang ibenta hindi lamang sa gobyerno katulad ngayon, kundi [pati] sa mga ospital, sa mga clinic, sa mga pharmacy, maaari na rin pong i-distribute ‘yan,” saad ni Domingo noon sa isa ring interview.

Ayon pa sa FDA chief, posibleng simulan na ng Pfizer na humingi ng full approval ng kanilang COVID-19 vaccine sa iba pang mga bansa.

“So ‘yun pong mga EUA natin, after one year ‘yan, mag-e-expire na po lahat ‘yan at ang maaari na lamang gamitin ay mga fully approved product,” paliwanag pa ni Domingo.