COVID-19 vaccines, babawiin sa probinsiya

ni Mary Gutierrez Almirañez | March 19, 2021

Magkakaroon ng redeployment ng COVID-19 vaccines mula sa mga probinsiya pabalik sa Metro Manila sapagkat tumigil na ang ilang local government units (LGUs) sa pagbabakuna matapos maubos ang mga bakunang nakalaan sa kanila, ayon sa pahayag ni Department of Health (DOH) Secretary Francisco Duque III ngayong umaga, Marso 19.

Aniya, “’Yung mga hindi pa nagagamit sa ibang regions, ipadala na, bawiin. Dalhin lahat sa Metro Manila, para ‘yung mga barangay health workers, 'yung mga healthcare workers doon sa quarantine and isolation facilities, mabigyan. Maghintay-hintay lang either today or tomorrow, magre-redeployment tayo.”

Paliwanag niya, babawiin ang mga ipinamahaging sobrang bakuna sa bawat probinsiya dahil mas kailangan ng Metro Manila ang proteksiyon kontra COVID-19 na silang episentro ng virus.

Tinatayang umabot na sa 640,984 ang kabuuang bilang ng naitalang kaso sa bansa at karamihan sa mga nadagdag na positibo ay na-detect sa NCR. Nananawagan na rin ang ilang alkalde para sa karagdagang suplay ng mga bakuna sa kanilang lungsod.

Ayon pa kay Quezon City Mayor Joy Belmonte, “Kung puwede sana kaming matulungan na makipag-ugnayan. Nawawala ‘yung momentum kasi payag na sila, eh. Happy na sila. Excited na nga silang magpabakuna pero wala naman tayong maibigay na bakuna. Baka naman nasasayang lang po ang ating efforts kung sobra na nating ikinakampanya ang vaccination program and yet, wala tayong maibigay sa kanila.”

Dagdag naman ni Marikina Mayor Macy Teodoro, “Hindi po puwedeng malalaking ospital lamang ang mabigyan ng bakuna kundi lahat ng medical frontliners... Mag-concentrate kung nasaan ‘yung epicenter ng Covid cases, sa ground zero dapat, para ma- contain natin 'yung spread.” Sumang-ayon naman dito si Dr. Guido David ng OCTA Research Team at aniya, dapat munang ilaan ang mga bakuna sa Metro Manila dahil hindi na biro ang sitwasyon sa bansa.

Giit niya, “Hindi na ‘to biro, hindi na ito parang ‘yung dati na ok lang tayo, chill lang tayo. Ngayon, medyo seryoso ‘yung nagiging problema natin. ‘Yun ‘yung reality. Hindi natin puwedeng i-sugarcoat ‘yan na sabihin natin na ok 'yung sitwasyon natin kasi hindi naman. Alam naman ‘yan pati ng mga doctors, alam naman ‘yan na talagang tumataas ‘yung bilang ng mga kaso sa mga ospital.” Sa ngayon ay ilang frontliners na ang nahawa sa virus at patuloy ang hawahan sa loob ng ospital dahil sa lumolobong kaso ng COVID-19 sa Metro Manila.

“Unfortunately nga ho, marami ho sa kanila, nagkakaroon na rin ho ng COVID,” saad pa ni Legal Officer at Makati City Spokesperson Atty. Arthur Camina.

6-7 COVID-19 vaccines, pinagpipilian ng 'Pinas

ni Thea Janica Teh | December 28, 2020

Anim hanggang pitong magkakaibang COVID-19 vaccines ang pinaplanong bilhin ng pamahalaan, ayon kay Health Undersecretary Maria Rosario Vergeire ngayong Lunes at sinabing hindi lang isang brand ng vaccine ang pinapaboran ng mga ito.

Aniya, nabanggit na umano ng vaccine czar kay Pangulong Rodrigo Duterte ang mga bibilhing vaccine na may efficacy rate na pasok sa standard ng World Health Organization.

Ibinahagi rin ni Vergeire ang sagot nito sa mga paratang ng ibang senador na may isang vaccine lamang ang pinapaboran ng pamahalaan at ito ay ang Sinovac na gawang-China na may 50% efficacy rate at dumadaan pa sa late-stage trial. “Hindi po tayo kumikiling sa iisa lang na bakuna.

Hindi rin po tayo papayag na papasok ang bakuna rito na hindi dumadaan doon sa ating regulatory process, which will ensure that the vaccine will be safe and effective for our population.” Sinabi rin ni Vergeire na marami umanong option na COVID-19 vaccine ang pamahalaan.

“Kailangan pong maintindihan ng ating mga kababayan, we are getting portfolio of the vaccine. Ibig sabihin, hindi lang po isa kundi marami po tayong pinagpipilian,” dagdag ni Vergeire.

Samantala, nitong Linggo, sinabi ni Senate Majority Leader Juan Miguel Zubiri na piliin ang best COVID-19 vaccine para sa Pilipinas batay sa efficacy, efficiency at cost-effectiveness nito.

Pfizer-BioNTech COVID-19 vaccine, aprub na sa Canada

ni Ronalyn Seminiano Reonico | December 10, 2020

Inaprubahan na ng Canada ang paggamit ng Pfizer-BioNTech COVID-19 vaccine noong Miyerkules. Saad ng Health Canada, "The data provided supports favourably the efficacy of Pfizer-BioNTech COVID-19 vaccine as well as its safety.

"The efficacy of the vaccine was established to be approximately 95 percent. The vaccine was well tolerated by participants and has no important safety concerns. The benefit-to-risk assessment for Pfizer-BioNTech COVID-19 vaccine is considered favourable."

Pahayag ni Canadian Deputy Chief Public Health Officer Howard Njoo, “At last we have a reason to feel optimistic and excited about returning to the lives we led pre-COVID.”

Paalala naman ni Prime Minister Justin Trudeau, “It doesn’t mean we can let our guards down.”

Samantala, naaprubahan man, hindi pa rin sigurado kung gaano katagal ang efficacy ng Pfizer vaccine kaya magsasagawa pa rin umano ng "risk management plan" ang Health Canada upang ma-monitor ang tagal ng bisa nito at makakalap ng iba pang data para rito.