AstraZeneca sa ‘Pinas, ubos na — DOH

ni Ronalyn Seminiano Reonico | April 5, 2021

Ubos na ang AstraZeneca COVID-19 vaccines sa bansa, ayon sa Department of Health (DOH) ngayong Lunes.

Kaugnay nito, ayon kay Health Undersecretary Maria Rosario Vergeire, hinihintay na ng Food and Drug Administration (FDA) ang mga karagdagang dokumento mula sa Sinovac Biotech upang masigurong ligtas gamitin ang kanilang bakuna sa mga nakatatanda.

Aniya, “We have coordinated [with Sinovac] already because we know na kailangan natin sa ating country because naubos na ang AstraZeneca doses natin.

“Gusto nating mabakunahan ang mga matatanda, ang ating mga senior citizens that’s why we are closely coordinating so we can get the evidence, so FDA can amend their EUA for senior citizens if ever the pieces of evidence will come in.”

Ayon sa AstraZeneca, 80% ang efficacy rate ng kanilang COVID-19 vaccine sa mga matatanda. Ang Sinovac naman ay inirerekomenda lamang ng FDA sa mga edad-18 hanggang 59.

Ngunit noong Pebrero, ayon sa opisyal ng Sinovac, maaari ring gamitin ang kanilang bakuna sa mga senior citizens.

Samantala, sa ngayon ay 2.5 million COVID-19 vaccine doses pa lamang ang natatanggap ng Pilipinas kung saan 525,000 lang ang mula sa AstraZeneca at ang iba ay Sinovac.

Sa 2.5 million doses, tinatayang aabot sa 1.5 million ang naipamahagi sa mga inoculation centers at 740,000 ang naiturok na.

75% ng COVID vaccine, inilaan sa NCR Plus bubble

ni Mary Gutierrez Almirañez | March 28, 2021

Ililipat na sa storage facility ng NCR Plus Bubble ang 75% ng mga bakuna kontra COVID-19 matapos itong maging sentro ng pandemya at muling sumailalim sa enhanced community quarantine (ECQ).

Ayon sa panayam kay Health Undersecretary for Field Implementation and Coordination Team Dr. Myrna Cabotaje ngayong araw, Marso 28, "Ang ginawa natin, nag-reallocate tayo sa 75% ng 400,000 to about 300,000 doses ng vaccines, mapupunta sa NCR, sa Region III specifically in Bulacan at sa Region IV-A.

“Naka-deploy na ang karamihan ngayon. Nag-i-start na, kasi nga, nag-decide na dahil hotspot ngayon ang Manila at NCR Plus bubble, medyo iko-concentrate ang pagbabakuna sa NCR.”

Paliwanag pa niya, ang natitirang 25% ay ilalaan sa mga healthcare workers ng Cordillera, Cebu, Davao at Region VI.

Samantala, sa ngayon ay 712,442 na ang naitalang kaso ng COVID-19, kung saan 81.6% o 581,161 ang gumaling at 1.85% o 13,159 naman ang namatay.

Dalawang magkasunod na araw na ring pumalo sa mahigit siyam na libo ang nagpositibo sa virus at karamihan sa mga naitala ay nagmula sa Metro Manila.

Remdesivir at tocilizumab na gamot kontra-COVID, nagkakaubusan na

ni Ronalyn Seminiano Reonico | March 26, 2021

Nagkakaubusan na ng stock ng gamot sa COVID-19 o ang mga investigational drugs na remdesivir at tocilizumab dahil sa patuloy na pagtaas ng kaso ng coronavirus sa bansa, ayon sa Department of Health (DOH).

Dahil sa insidente, ayon sa DOH ay daragdagan nila ang pondo para sa mga ospital “to ensure unhampered supply of COVID-19 therapeutics. “The DOH will be downloading P5 million to each DOH hospital including specialty hospitals in NCR, Central Luzon and CALABARZON.

“This will allow our hospital to replenish their COVID-19 medicine supply.” Saad pa ng DOH, “The current stocks of remdesivir and tocilizumab are running low. The remaining supplies being used by selected hospitals are donations from the WHO (World Health Organization).”

Ang remdesivir ay isang antiviral medication na isinailalim sa clinical trials ng WHO bilang panggamot sa COVID-19 ngunit kalaunan ay inalis din sa trial dahil sa diumano'y kakulangan ng ebidensiya sa effectiveness nito.

Saad din ng DOH, “However, due to recent developments, the WHO Solidarity Trial has struck out the inclusion of remdesivir among its investigational drugs citing that it ‘had little or no effect on overall mortality, initiation of ventilation and duration of hospital stay in hospitalized patients.’”

Ang tocilizumab naman ay isang anti-inflammatory drug na nag-a-undergo ng clinical trials sa ibang bansa bilang panggamot sa COVID-19.

Pinahihintulutan ng Food and Drug Administration ang paggamit ng mga naturang investigational drugs sa ilalim ng compassionate use permits.

Samantala, ngayong araw ay nakapagtala ang DOH ng pinakamataas na bilang ng karagdagang kaso ng COVID-19 sa bansa na 8,773.