COVID-19 vaccines sa edad 12-15, next!

ni Lolet Abania | May 12, 2021

Pinaplano ng pharmaceutical giants na Pfizer at Moderna na kumuha ng Emergency Use Authorizations (EUA) para sa COVID-19 vaccines na ilalaan sa mga kabataan, ayon sa Department of Science and Technology (DOST).

Ayon kay Dr. Nina Gloriani, head ng vaccine expert panel ng DOST, target ng Pfizer na makakuha ng EUA sa September umano ng kasalukuyang taon, habang ang Moderna ay maaaring magkaroon na ng tinatawag nilang child-friendly vaccines sa katapusan naman ng taon.

“Ang mga pag-aaral ng Pfizer ay napakabilis for these younger children... Hintayin na lang po natin na mag-apply sila ng EUA sa atin,” ani Gloriani.

“We look forward to that kasi maa-address niya ‘yung pagbabakuna sa isang age group na hindi natin makakaya with the other vaccines,” dagdag niya.

Kamakailan, inaprubahan na ng United States ang paggamit ng Pfizer vaccines para sa mga kabataang nasa edad 12 hanggang 15-anyos.

Ayon kay Gloriani, ang mga batang nabakunahan ng Pfizer vaccines ay nagpakita ng magandang resulta dahil wala sa 1,000 mga bata na naturukan ng bakuna ang na-infect ng COVID-19.

Sinabi pa ni Gloriani, nagsasagawa na rin ang Pfizer at Moderna ng mga pag-aaral sa efficacy ng kanilang COVID-19 jabs para sa mga bata na nasa edad 6 na buwan hanggang 11-anyos.

“This is a bigger study. Siguro mga 6,000 to 7,000 ang kailangan na participants hindi kagaya nitong mga 12-15 years old na hanggang 3,000 lang ang naging participants,” sabi ni Gloriani.

Matatandaang noong Marso 2020, ipinag-utos ng pamahalaan na dapat manatili lamang ang mga menor-de-edad sa loob ng bahay matapos na isuspinde ang face-to-face classes upang maiwasan ang pagkalat ng COVID-19 sa mga classrooms at eskuwelahan at mahawahan sila ng nasabing sakit.

193K na Pfizer vaccine, sa Lunes ang dating

ni Lolet Abania | May 8, 2021

Tinatayang nasa 193,000 doses ng Pfizer COVID-19 vaccine ang inaasahang darating sa Lunes, ayon kay Department of Health (DOH) Secretary Francisco Duque III.

Ayon kay Duque, ang mga nasabing bakuna ay ibibigay sa NCR Plus -- National Capital Region, Bulacan, Cavite, Laguna, Rizal, kabilang din ang Cebu, Davao, at iba pang pangunahing lungsod na kayang makasunod sa temperature requirements ng Pfizer.

Kinumpirma ng pinakamalaki at pinakamalawak na pag-aaral sa buong mundo ng Pfizer vaccine na ang naturang bakuna ay nakapagbibigay ng mahigit sa 95 percent protection laban sa COVID-19.

Gayunman, nabatid din na bumababa ang lebel nito kapag ang isang indibidwal ay nakatanggap lamang ng isa sa dalawang prescribed doses. Ayon pa kay Duque, ang Pilipinas ay inaasahang mabibigyan ng 1.1 milyong doses ng Pfizer mula sa COVAX Facility, 500,000 doses ng Sinovac vaccine, at 2 milyong doses Sputnik V vaccine ngayong taon.

Emergency use ng Sinopharm, aprub sa WHO

ni Ronalyn Seminiano Reonico | May 8, 2021

Inaprubahan na ng World Health Organization (WHO) ang emergency use ng Sinopharm COVID-19 vaccine ng China noong Biyernes.

Ito ang kauna-unahang Chinese vaccine na binigyan ng WHO ng emergency use approval laban sa infectious disease.

Pahayag ni WHO Director-General Tedros Adhanom Ghebreyesus, "This expands the list of COVID-19 vaccines that COVAX can buy, and gives countries confidence to expedite their own regulatory approval, and to import and administer a vaccine."

Kabilang din sa mga COVID-19 vaccines na nakatanggap na ng emergency approval ng WHO ay ang Pfizer-BioNTech, AstraZeneca, Johnson & Johnson, at Moderna.

Noong April 26 nagkaroon ng pagpupulong ang technical advisory group ng WHO kung saan ni-review ang clinical data at manufacturing practices ng Sinopharm.

Saad pa ng WHO, "Its easy storage requirements make it highly suitable for low-resource settings.”

Ayon kay Tedros, inirekomenda naman ng Strategic Advisory Group of Experts (SAGE) ang pagbabakuna ng two doses ng Sinopharm sa mga edad 18 pataas.

Saad ng WHO, "On the basis of all available evidence, WHO recommends the vaccine for adults 18 years and older, in a two-dose schedule with a spacing of three to four weeks."

Tinatayang aabot naman sa 79% ang efficacy rate ng Sinopharm na dinevelop ng Beijing Biological Products Institute.

Samantala, pahayag din ng WHO, "Few older adults (over 60 years) were enrolled in clinical trials, so efficacy could not be estimated in this age group."

Noong Miyerkules naman, nagsagawa ng review ang mga eksperto ng WHO sa Sinovac Biotech na gawa rin ng China.

Pahayag ni WHO Technical Advisory Group Chair Arnaud Didierlaurent, "We have started to review the report from Sinovac. We actually requested additional information to the manufacturer... which we hope to receive very soon to make a decision."