Healthcare workers sa Indonesia, nagpositibo kahit nabakunahan na… Sinovac, epektibo pa rin — DOH

ni Ronalyn Seminiano Reonico | June 19, 2021

Iginiit ng Department of Health (DOH) na epektibo pa rin ang Sinovac ng China laban sa COVID-19 matapos maiulat ang 350 healthcare workers sa Indonesia na naturukan ng nasabing bakuna ngunit nagpositibo pa rin sa Coronavirus.

Pahayag ni DOH Undersecretary Maria Rosario Vergeire, "Let's get the vaccine. Let us not be doubtful. Let's give that confidence.”

Saad pa ni Vergeire, "Hindi po natin maikakaila na may breakthrough infections... pero kailangan pa rin po natin ng kumpletong datos para ma-analyze nang maigi.”

Karamihan umano sa mga healthcare workers na nagpositibo sa COVID-19 sa Indonesia ay asymptomatic at nagse-self-isolate sa bahay, ngunit ang ilan ay kinailangang i-admit sa ospital dahil sa mataas na lagnat at pagbaba ng oxygen-saturation levels, ayon kay Badai Ismoyo, head ng health office ng Kudus District sa Central Java.

Ayon naman kay Vergeire, kung 350 ang nagpositibo sa 5,000 health workers sa Indonesia, 7% lamang ito at masasabing epektibo pa rin ang Sinovac sa natitirang 93%.

Noong Enero nagsimulang magbakuna ang Indonesia sa mga healthcare workers na priority group at ayon sa Indonesian Medical Association (IDI), karamihan sa mga ito ay nakatanggap ng Sinovac COVID-19 vaccine mula sa China.

Ayon din naman sa public health experts sa Indonesia, bumaba ang bilang ng mga healthcare workers na namatay sa COVID-19 noong Enero hanggang Mayo ngunit nababahala sila sa pagtaas ng kaso sa Java.

Saad pa ni Dicky Budiman, epidemiologist ng Australia Griffith University, "The data shows they have the Delta variant (in Kudus) so it is no surprise that the breakthrough infection is higher than before, because, as we know, the majority of healthcare workers in Indonesia got Sinovac, and we still don’t know yet how effective it is in the real world against the Delta variant.”

Samantala, ayon kay Vergeire, hindi dapat mabahala ang mga Pilipino at wala pa umanong naitatalang kaso ng adverse events “which have direct causality with the vaccine."

420,000 doses ng bakuna, ipinadala sa Northern Mindanao

ni Lolet Abania | June 16, 2021

Nasa 420,000 doses ng COVID-19 vaccine ang naipadala na sa Region 10 o Northern Mindanao, ayon kay National Task Force Against COVID-19 Deputy Chief Implementer Vince Dizon ngayong Miyerkules.

Ito ang tugon ni Dizon matapos ang naging kritisismo ni Cagayan de Oro lawmaker at Deputy Speaker Rufus Rodriguez na aniya, ang Mindanao ay napabayaan umano ng gobyerno sa COVID-19 response dahil sa kakulangan ng supply ng bakuna kung saan marami rin sa kanila ang namatay.

“420,000 doses have been delivered to Region 10, and 56,000 of them were delivered yesterday,” ani Dizon sa isang TV interview.

Ayon kay Dizon, sa nai-deliver na 56,000 doses, 35,000 dito ay Pfizer-BioNTech doses habang 21,000 ay Sinovac doses. “We are not leaving anybody behind. We still have scarcity of vaccines, but we will be giving vaccines as fast as we can to those who need them most,” sabi ni Dizon.

Paliwanag niya, ang pagdi-distribute ng bakuna ay base sa pinakamataas na naitatalang panganib ng impeksiyon, kung saan mga lugar na malaki ang populasyon at mga lugar na may malaking kontribusyon sa ekonomiya.

“That is why we are prioritizing NCR Plus 8 (Metro Manila, Pampanga, Bulacan, Cavite, Laguna, Rizal, Metro Cebu and Metro Davao) since these are economic centers,” ani Dizon. “We also have expansion areas, including Cagayan de Oro and Iloilo City. That strategy [of prioritizing economic centers] is what makes the most sense,” dagdag pa niya.

1 milyong Pinoy, natuturukan kada linggo — Galvez

ni Lolet Abania | June 15, 2021

Mahigit sa 7 milyong doses ng COVID-19 vaccines na ang na-administer sa mga mamamayan hanggang nitong Hunyo 14, ayon kay Vaccine Czar Secretary Carlito Galvez, Jr..

“As of yesterday, June 14, we have already breached 7 million jabs administered,” ani Galvez sa isang Senate hearing ngayong Martes.

Sa kanyang presentasyon, binanggit ni Galvez na may kabuuang 7,045,380 doses ang naibigay sa mga kababayan natin simula Marso 1 hanggang Hunyo 14.

Kabilang dito ang 980,471 medical frontliners, 486,945 senior citizens, 429,301 person with comorbidities, at 7,067 essential workers na fully vaccinated na may kabuuang 1,903,784 doses ng COVID-19 vaccines ang naibakuna.

Samantala, may 5,141,596 indibidwal naman ang na-administer ng first doses ng COVID-19 vaccine kabilang ang 1.452 milyong medical workers, 1.753 milyong senior citizens, 1.754 milyon sa persons with comorbidities, at 182,130 sa essential workers.

Sa kasalukuyan, mayroong 3,944 vaccination sites ang nailatag na ng pamahalaan.

Sa 12,705,870 COVID-19 vaccines, nasa 10,374,850 ang nai-deploy ng gobyerno sa mga vaccination sites.

Sa parehong presentation, sinabi ni Galvez na nakamit na ng gobyerno ang isang milyong jabs kada isang linggo na nangyari nitong magkasunod na linggo.