1 M nabakunahan kontra COVID sa 4 na araw — NTF

ni Lolet Abania | July 2, 2021

Ikinatuwa ng National Task Force na umabot sa 1 milyong doses ng COVID-19 vaccines ang naiturok sa ating mga kababayan sa loob lang ng 4 na araw.

Dahil dito, nasa 11 milyong doses na mula sa iba’t ibang brands ng COVID-19 vaccines ang naibigay ng gobyerno sa mga mamamayan.

“Sa loob lamang po ng apat na araw, mula Lunes hanggang kahapon, one million doses po ang nai-jab natin. At dahil po diyan, 11 million na po ang ating jabs na na-administer sa ating mga kababayan,” ani NTF Deputy Chief Implementer Vince Dizon sa briefing ngayong Biyernes.

“Kung magkakaroon pa tayo ng mas maraming supply ay nakakasiguro tayo na [mas] marami pa tayong maidya-jab sa mga susunod na linggo at buwan,” sabi pa ni Dizon.

Umabot naman sa 17 milyong doses ng COVID-19 vaccine ang supply nito sa bansa na kabilang sa mga brands ay Sinovac, AstraZeneca, Pfizer-BioNTech, Sputnik V at Moderna. Pinakamaraming supply ay mula sa Chinese vaccine na Sinovac.

Patuloy ang COVID-19 vaccination program ng gobyerno, kung saan nagsimula noong March 1 na layong mabakunahan ang 50 hanggang 70 milyong populasyon upang makamit ang herd immunity sa bansa.

Nurse, medtech at Chinese na nagbenta ng Sinovac, arestado

ni Lolet Abania | July 2, 2021

Muling ipinaalala ng Department of Health (DOH) sa publiko na ang mga COVID-19 vaccines ay hindi ipinagbibili matapos na tatlo umanong sellers ng Sinovac doses ang inaresto.

Una nang sinabi ng National Bureau of Investigation (NBI) na nadakip nila ang tatlo sa apat na suspek na sangkot sa pagbebenta ng COVID-19 vaccines.

Isang entrapment operation ang ikinasa ng NBI Task Force Against Illegal Drugs (NBI-TFAID) kung saan nadakip ang isang nurse, isang medical technologist at isang Chinese na nagbebenta umano ng Sinovac vaccines.

Nakatanggap ng impormasyon ang NBI hinggil sa pagbebenta ng grupo ng nasabing bakuna. Isang poseur buyer ang bumili sa mga suspek ng 300 doses ng CoronaVac na nagkakahalaga ng P840,000.

Ayon pa sa NBI, kadalasang buyer nito ay mga Chinese.

Inaalam na rin ng ahensiya kung saan nanggaling ang supply nila ng naturang bakuna. Nagpahayag naman ng kalungkutan si DOH Undersecretary Maria Rosario Vergeire nang mabatid ang insidente.

“Bakit kailangang magkaroon ng ganitong pagkakataon na people are taking advantage of what we have right now?” ani Vergeire sa briefing ngayong Biyernes.

Hinimok naman ng kalihim ang publiko na tumanggap lamang ng COVID-19 vaccine mula sa gobyerno at hindi sa iba pa.

“‘Wag po kayong bibili sa ibang mga tao dahil wala po silang pagkukunan ng bakunang ‘yan, because it is just national government which can access these vaccines for now,” paliwanag ni Vergeire.

“Kahit isang dose lang po ng bakuna ang nasasayang dahil sa mga ganitong pamamalakad ay napakaimportante na po para sa atin,” dagdag niya.

Ang tatlong naarestong indibidwal ay sasampahan ng kaso dahil sa paglabag sa Food and Drug Administration Act.

Todo-kumbinse sa mga balik-trabaho... Magpabakuna na kayo! — MMDA

ni Lolet Abania | July 1, 2021

Hinimok ni Metropolitan Manila Development Authority (MMDA) Chairperson Benhur Abalos ang mga employers at mga manggagawa na magpabakuna na kontra-COVID-19 kasabay ng maraming indibidwal na pinababalik na sa kanilang mga trabaho.

Sa Laging Handa public briefing, ipinunto ni Abalos ang kahalagahan ng lahat ng empleyado na may proteksiyon laban sa virus sa gitna ng pagluluwag sa mga restriksiyon at para hindi na kumalat pa ang sakit.

“Ako’y nananawagan sa employer, sa ating mga kababayan, na sana, magpabakuna tayo. Iba na rin ‘yung protektado ka at bakunado ka. Lumuluwang tayo pero [we need to be] responsible here,” ani Abalos.

Ayon kay Abalos, tinatayang 4 milyong residente sa National Capital Region ang nakatanggap na ng COVID-19 vaccines, kung saan mahigit sa 3 milyon katao ang nabakunahan ng first dose at mahigit 1 milyong indibidwal naman ang nakakuha na ng second dose.

Aniya pa, ang average vaccination na isinasagawa sa rehiyon kada araw ay nasa 114,000.