Karagdagang 37,800 Sputnik V, dumating na

ni Ronalyn Seminiano Reonico | July 11, 2021

Dumating na kagabi sa Ninoy Aquino International Airport (NAIA) Terminal 1 ang Korean Air flight KE623 na lulan ang karagdagang 37,800 doses ng Sputnik V vaccine mula sa Russia.

Ang mga opisyal ng Department of Health Bureau of International Health Cooperation na sina Dir. Maria Soledad Antonio at Dr. Arthur Dominic Amansec ang sumalubong sa pagdating ng naturang bakuna.

Samantala, ayon kay Vaccine Czar Sec. Carlito Galvez Jr., ang ilang lugar sa Metro Manila, CALABARZON, Central Luzon, Ilocos Region, Cagayan Valley, Visayas at Mindanao ang target na makatanggap ng Sputnik V vaccines.

Higit 1M AstraZeneca na donasyon ng Japan, sinalubong ni P-Du30

ni Ronalyn Seminiano Reonico | July 9, 2021

Dumating na kagabi sa Villamor Air Base ang 1,124,100 doses ng AstraZeneca COVID-19 vaccines mula sa Japan.

Si Pangulong Rodrigo Duterte, kasama ang Japanese embassy officials, National Task Force (NTF) Against COVID-19, at Inter-Agency Task Force for the Management of Emerging Infectious Diseases (IATF-EID) executives ang sumalubong sa pagdating ng mga bakuna.

Pinasalamatan ni P-Duterte ang Japan at aniya, “Japan continues to be our strong partner in various development programs, our cooperation in fighting the pandemic is truly an indication of the deep friendship between our two countries.

“Let me assure everyone that throughout our vaccination rollout, we will prioritize the safety and quality of all vaccines that we are distributing across the country.”

Nanawagan din ang pangulo sa publiko na magpabakuna na laban sa COVID-19 at patuloy na sumunod sa mga ipinatutupad na health protocols.

Saad ng pangulo, “I, therefore, urge everyone to get vaccinated and help prevent the further spread of the virus. We should all continue to follow safety rules and health protocols even when fully vaccinated.”

Israel at South Korea, magpapalitan ng COVID vacccines

ni Lolet Abania | July 6, 2021

Napagkasunduan ng Israel at ng South Korea na magpalitan ng mga doses ng COVID-19 vaccines para sa kanilang mga mamamayan bilang proteksiyon laban sa naturang virus.

Magde-deliver ng nasa 700,000 doses ng Pfizer-BioNTech COVID-19 vaccine ang Israel sa South Korea sa huling linggo ng Hulyo, habang ibabalik naman ng South Korea sa Israel ang pareho ring bilang ng bakuna na kanila nang na-order mula sa Pfizer sa Setyembre at Oktubre.

Ang mga COVD-19 vaccines ay agad naipapamahagi ng South Korea sa kanilang mga kababayan, subalit nahihirapan silang makakuha ng sapat na doses sa tamang panahon sa gitna ng kakulangan sa global supplies nito, partikular na sa Asia.

“This is a win-win deal,” ani Israeli Prime Minister Naftali Bennett sa isang statement ngayong Martes.

“Together we will beat the pandemic,” saad pa ni Bennett.

Matapos ang agarang pagbabakuna kontra-COVID-19, nakapag-administer na ang Israel ng dalawang shots ng vaccine sa tinatayang 55 percent ng kanilang populasyon at nakitaan agad ng pagbaba ng kaso ng sakit.

Ayon kay Korea Disease Control and Prevention Agency (KDCA) Director Jeong Eun-kyeong, dahil sa kanilang naging deal, pinayagan ang South Korea na i-accelerate ang kanilang programa sa pagbabakuna, kabilang na ang pagbibigay ng vaccine sa mga empleyado sa ilang sektor na may maraming bilang ng nakakasalamuhang tao.

Sinabi ni Jeong, ang mga local authorities ang nagdedesisyon kung sino ang makakakuha ng vaccines subalit aniya, posible ring mabigyan agad ang mga street cleaners, delivery workers at retail employees.

Sa pahayag ng South Korean authorities noong nakaraang linggo, umaasa silang makakamit ang herd immunity ng mas maaga kumpara sa una nilang target na Nobyembre kung saan mababakunahan ang tinatayang 70 percent ng kanilang populasyon kahit na unang dose pa lamang ng Pfizer ng mRNA ang naibigay sa kanilang mamamayan.

Sinabi pa ni Jeong, sakaling ang kanilang pagbabakuna ay matapos batay sa plano at makakuha pa ang South Korea ng mga surplus doses ng COVID-19 sa huling buwan ng taon habang naibalik na rin ang napagkasunduang doses sa Israel, makapagbibigay din ang kanilang bansa ng mga naipong bakuna kontra-COVID sa ibang bansa.

Bagamat ang South Korea ay walang humpay na nakikipaglaban sa kaunting outbreak lamang, ipinagpaliban pa rin ng mga opisyal ang pagluluwag ng social distancing rules.

Samantala, naireport ng KDCA na nasa 746 ang bilang ng COVID-19 cases ngayong linggo na umabot na sa kabuuang bilang na 161,541, kabilang ang 2,032 nasawi.