Sa Enero 2022... Edad 5-11, target bakunahan kontra-COVID-19

ni Lolet Abania | November 29, 2021

Plano ng gobyerno na simulan na ang pagbabakuna kontra-COVID-19 ng mga batang edad 5 hanggang 11 sa Enero ng susunod na taon.

Ayon kay vaccine czar Secretary Carlito Galvez Jr., agad nilang isasagawa ito kapag binigyan na ng Food and Drug Administration (FDA) ng emergency use authorization (EUA), ang mga vaccines para gamitin ng mga bata, sa katapusan ng Disyembre.

“Ang plano namin once na lumabas ito, immediately, we will execute it. Ang plano namin is first quarter ng 2022 so January mag-start tayo. We want to finish that immediately sa first quarter,” sabi ni Galvez sa isang interview.

Sinabi rin ni Galvez na target naman ng pamahalaan na matapos ang pediatric vaccination sa unang quarter ng 2022 na sakto lang sa planong muling pagbubukas ng klase.

“So that ‘yung ating opening ng classes ay magsimula na at maprotektahan natin ‘yung ating children because of the Omicron. We don’t know yet the possibilities, ‘yung vulnerabilities ng mga children with this variant,” ani pa ni Galvez.

Sa ngayon, inumpisahan na ng gobyerno ang pagbabakuna ng mga minors na nasa edad 12 hanggang 17.

Una nang sinabi ng FDA na pinag-iisipan nila ang ibang formulation at ibaba ang dosage ng Pfizer vaccine para sa pagbabakuna ng mga batang edad 5 hanggang 11 laban sa COVID-19.

Ayon naman kay FDA director general Dr. Eric Domingo, inaasahan ng ahensiya ang Pfizer na mag-a-apply ng isang emergency use authorization para sa pagbabakuna ng mga batang edad 5 hanggang 11 sa Disyembre.

3 milyon senior citizens, hindi pa rin bakunado — Galvez

ni Jasmin Joy Evangelista | November 29, 2021

Nasa 3 milyong senior citizens pa ang hindi nababakunahan kontra-COVID-19, ayon kay vaccine czar Carlito Galvez Jr.

“Nakita natin 'yung mga nabakunahan is more or less 62%. Meaning, mayroon pa tayong more or less na 3 million na senior na 'di pa nababakunahan," ani Galvez.

As of November 27, nakatala sa National COVID-19 Vaccination Dashboard na 4.4 million seniors na ang nakatanggap ng first dose habang 5.1 million naman ang fully vaccinated. Nasa 48,491 senior citizens naman ang nakatanggap ng kanilang booster dose.

Sa kabila ng marami pa rin sa mga senior citizens ang hindi pa nababakunahan kontra-COVID-19, sinabi ni Galvez na ang mga local government units ay nagpapatupad naman ng mga istratehiya tulad ng pagbibigay ng incentives at pagbabahay-bahay sa pagbabakuna.

Makakatulong din aniya para mahikayat ang mga nakatatanda na magpabakuna kung magkakaroon ng restrictions sa galaw ng mga hindi pa bakunado.

"May tinatawag na mandating senior citizens na kapag i-allow natin yung mga vaccinated seniors puwede silang lumabas and then we will restrict those senior na di makapag-vaccinate," pahayag ni Galvez.

Grupo ng mga manggagawa: “Mandatory vaccination sa mga manggagawa, ibasura!”

ni Jasmin Joy Evangelista | November 26, 2021

Umaapela ang mga grupo ng manggagawa sa pamahalaan na ibasura ang IATF Resolution 148B.

Laman ng resolusyon na simula Disyembre 1, ire-require na ang bakuna sa mga manggagawa sa iba’t ibang mga trabaho, at maging sa mga konsyumer sa iba’t ibang establisimyento.

Ayon sa Alliance of Nationalist and Genuine Labor Organizations, tinututulan nila ang pamimilit at panggigipit ng resolusyong ito.

“Ang paggawang mandatory sa bakuna at ang kaakibat na mga resolusyon dito hinggil sa trabaho ay labag sa karapatan sa trabaho (right to work), freedom of choice (kalayaang pumili), at discriminatory sa mga di pa nababakunahan sa iba’t ibang dahilan”, pahayag pa ng grupo.

Sa kasalukuyan ay mayroon nang 3,585 signs ang online petition na inilunsad ng grupo at mayroon ding Worker’s Legal Assistance booth na itinayo sa iba’t ibang panig ng Metro Manila .

Nanawagan din ang grupo sa mga mamamayan at manggagawa na makiisa sa pagkilos upang depensahan ang trabaho ay karapatang pantao ng bawat Pinoy.