Pfizer magsasagawa ng trial sa third dose ng COVID-19 vaccine sa mga batang edad 4 pababa

ni Jasmin Joy Evangelista | December 18, 2021

Nakatakdang magsagawa ng clinical test ang Pfizer ng kanilang third dose COVID-19 vaccines sa mga batang below 5 years old.

Ito ay para makita kung ang low dosage na kanilang bakuna ay magiging epektibo sa mga maliliit na bata at kung magbibigay ito ng katulad na proteksiyon sa mga mas matandang kabataan.

Bilang parte ng clinical trials, 3 micrograms per injection lamang ang ituturok sa mga batang edad 6 months hanggang less than 5 years. Ito ay sampung beses na mas mababa sa 30 microgram doses na ibinibigay sa matatanda, at mas mababa naman ng 10 micrograms sa mga itinuturok sa mga batang edad 5-11.

Sa mga batang nasa edad dalawang taon hanggang limang taon ay mayroong 10 micrograms na bakuna na nagdulot ng lagnat sa mga ito kaya minabuti nila na bawasan ito.

Ngunit sa dalawang injections ng 3 micrograms, ang immune response ng mga ito ay mas mahina kumpara sa mga adolescents at young adults na nabigyan ng bakuna.

Dahil dito ay nagdesisyon ang Pfizer na magsagawa ng third dose para sa mga nabakunahan at least two months matapos ang ikalawang dose.

Ang unang dalawang shots ay mananatili nang 3 linggo ang pagitan.

"This adjustment is not anticipated to meaningfully change our expectations that we would file for emergency use authorization and conditional approvals in the second quarter of 2022," ani Kathrin Jansen, Pfizer's head of vaccine research.

Inanunsiyo rin ng Pfizer na sinimulan na nito ang trials sa 600 teenagers edad 12 to 17 upang i-test ang booster dose ng 10 o 30 micrograms.

1M doses ng Moderna vaccine, dumating na

ni Lolet Abania | December 17, 2021

Dumating na sa bansa ang 1,020,500 doses ng Moderna COVID-19 vaccine na donasyon ng German government ngayong Biyernes.

Ayon sa National Task Force Against COVID-19, lumapag ang latest batch ng vaccine doses ng COVID-19 sa Ninoy Aquino International Airport Terminal 3, bago mag-alas-4:00 ng hapon ngayong araw.

Pinasalamatan naman ni NTF chief implementer at vaccine czar Secretary Carlito Galvez Jr. ang gobyerno ng Germany para sa donasyon nito sa pamamagitan ng COVAX facility.

Sinabi rin ng task force na may karagdagang 940,800 doses pang Moderna vaccine na donasyon ng Germany ang darating ngayong Biyernes ng gabi.

Pahayag naman ng National Vaccination Operations Center (NVOC), nakapag-administer na ang bansa ng kabuuang 100,019,137 ng COVID-19 vaccine doses nationwide hanggang nitong Disyembre 16.

Hinggil sa mandatory COVID-19 vaxx... GenSan residents, naghain ng reklamo vs. IATF

ni Lolet Abania | December 13, 2021

Naghain ng reklamo ang ilang residente ng General Santos City laban sa Inter-Agency Task Force for the Management of Emerging Infectious Diseases (IATF) hinggil sa mandatory vaccination kontra-COVID-19 sa ilang mga lugar sa bansa.

Sa ulat, ito ay may kaugnayan sa issuance ng IATF Resolution No. 148-B, kung saan nagre-require sa mga onsite workers na magpabakuna kontra-COVID-19.

Batay sa resolution, bagaman ang mga empleyado ay maaaring hindi matanggal sa trabaho, ang mga unvaccinated employees ay kailangang sumailalim sa RT-PCR tests at sagutin ang lahat ng gastusin dito.

Sa 5-pahinang dokumento, ayon sa mga complainants na sina Nenit Caminoy, Mary Ann Doce, Norma Marquez, Marylin Reynoso at Vivien Viernes, ito ay ilegal na gawin, ang pagbabakuna ng mandatory o sapilitan gaya ng nakasaad sa Republic Act 11525 na ang vaccination cards ay hindi kinakailangan sa employment.

Anila pa, mahalaga ang pagkakaroon ng voluntary consent para sa pagbabakuna laban sa COVID-19.

Giit din ng mga residente na ang RT-PCR tests ay napakamahal, habang anila, posibleng magresulta ito sa ilang mga manggagawa na mag-resign na lamang sa kanilang mga trabaho.

Gayundin, ayon sa grupo ang experimental antiviral pill molnupiravir ay gagawing available bilang alternative medicine.

Ang mga respondents ng kanilang complaints ay sina Department of Health (DOH) Secretary Francisco Duque III, acting presidential spokesperson Karlo Nograles, at ang abogadong si Charade Mercado-Grande.

Sa ngayon habang isinusulat ito ay wala pang ibinigay na komento sina Duque at Nograles hinggil sa isyu.

Kinumpirma naman ni Ombudsman Samuel Martires na natanggap na ng kanyang opisina ang naturang complaint noong Disyembre 6 at iniimbestigahan na nila ang tungkol dito.