28 M Pinoy ‘di pa rin nabakunahan kontra-COVID-19

ni Lolet Abania | January 11, 2022

Ipinahayag ng Malacañang ngayong Martes na tinatayang nasa 28 hanggang 30 milyon Pilipino ang hindi pa rin nababakunahan laban sa COVID-19.

Sa isang press briefing, sinabi ni acting Presidential Spokesperson Karlo Nograles sa bilang na ito, 3 milyon ay mga senior citizens o mga edad 60 at pataas.

Dahil sa patuloy na pagtaas ng COVID-19 cases at sa gitna ng pagkakaroon ng mas nakahahawang Omicron variant, nananawagan si Nograles sa publiko na dapat na magpabakuna na at i-avail ang booster shot matapos ang tatlong buwan na natanggap ang ikalawang dose ng two-dose COVID-19 vaccine at dalawang buwan naman para sa one-dose Janssen vaccine.

“All vaccines work, regardless of the brand,” sabi ni Nograles.

“Why do we need the vaccine and the booster when we could still get infected with it after? The protection that the vaccines provide comes not just in the form of reducing the likelihood of infection but also risk of developing severe symptoms,” dagdag pa ni Nograles.

Sa ngayon, nasa tinatayang 52.8 milyon Pinoy ang fully vaccinated kontra-COVID-19. Sa nasabing bilang, nasa 3.5 milyon ang nakatanggap na ng kanilang booster shot.

Pagbabakuna kontra-COVID-19 sa mga batang edad 0-4-anyos, posible sa second quarter ng taon

ni Jasmin Joy Evangelista | January 11, 2022

Plano ng gobyerno na simulan ang pagbabakuna kontra-COVID-19 sa mga batang nasa edad 0-4 years ngayong taon, ayon kay Sec. Carlito Galvez Jr. sa taped briefing kasama si Pangulong Rodrigo Duterte na inere nitong Lunes nang gabi.

Ayon kay Galvez, plano ng gobyerno na bakunahan ang 11.11 milyong 0-4-year-olds laban sa malalang respiratory disease simula sa second quarter ng taong ito.

Samantala, ang mga batang nasa edad 5-11 ay posibleng masimulan ang pagbabakuna sa katapusan ng Enero.

“We are now making some contingencies to acquire doses that we need to include ages 0 to 4,” ani Galvez.

Layon ng gobyerno na mabakunahan ang 90 milyon indibidwal kontra-COVID-19 sa June 2022 at makapag-provide ng mahigit 72 milyon booster shots para sa matatanda.

Layon din nito na maturukan ng booster shots ang 12 milyon teenagers na 12-17 years old, dagdag pa ni Galvez.

Registration para sa bakuna ng mga edad 5-11 sa San Juan City, bukas na

ni Jasmin Joy Evangelista | January 3, 2022

Nakatakdang buksan ng San Juan City government ang registration para sa COVID-19 vaccination ng mga batang edad 5 hanggang 11 ngayong araw.

Sa inilabas na advisory ng local government unit nitong Linggo, inanunsiyo ni Mayor Francis Zamora na simula ngayong araw, Enero 3, 2022, magsisimula nang tumanggap ng mga registrants sa naturang age group.

Batay sa post, ito ay bilang paghahanda sa opisyal na vaccination roll out para sa mga nakababatang pediatric population na nabigyan na ng emergency use approval ng Food and Drug Authority.

Para sa mga nais iparehistro ang kanilang mga anak na nasa edad 5-11, maaaring mag-register online sa https://vaxreg.sanjuancity.gov.ph/vaccine_registration/public/.

Samantala, patuloy pa ring nakabukas ang registration sa lungsod para sa 1st dose vaccine at booster shots para sa mga nabakunahan na ng 2nd dose sa nakalipas na tatlong buwan.