3,500 shots para sa pilot run ng COVID-19 booster vax sa mga botika

ni Lolet Abania | January 18, 2022

Target ng administrasyong Duterte na makapag-administer ng 3,500 shots sa pilot run ng COVID-19 booster vaccinations sa pitong pharmacies sa National Capital Region (NCR), ayon sa Malacañang ngayong Martes.

Tinukoy ni acting presidential spokesperson Karlo Nograles na ang pilot run ng booster vaccinations ay gagawin sa Mercury Drug, Watsons, Rose Pharmacy, Southstar Drug, at The Generics Pharmacy, gayundin sa mga clinic na Healthway at QualiMed, sa tulong ito ng mga personnel ng naturang private entities na nakatakda sa Enero 20 hanggang 21.

“This is only for booster shots, and people need to pre-register so we can manage the flow [of foot traffic],” sabi ni Nograles sa isang Palace briefing.

“The allocation is 500 per week per botika or clinic, so times seven, 3,500 is the initial [target]. [Gagawin natin ito] para makita natin ng flow ng demand,” paliwanag pa ni Nograles.

Sinabi ni Nograles na ang implementasyon ng naturang programa ay nabuo sa magkatuwang na responsibilidad ng mga pribadong sektor gaya ng pharmacies at clinics, at ng local government units (LGUs) na siyang magpo-provide ng suplay ng mga COVID-19 vaccines.

“Ultimately, we want to expand this nationwide,” sabi ni Nograles.

Ayon pa kay Nograles, mayroong tinatayang 54 milyong Pilipino na ang fully vaccinated kontra-COVID-19 hanggang ngayong Martes, Enero 18.

Para ipaliwanag ang bisa ng bakuna…Mga doktor ipinadala sa unvaccinated communities

ni Jasmin Joy Evangelista | January 16, 2022

Idineploy sa mga probinsiyang marami pang hindi bakunado ang ilang doktor upang ipaliwanag ang mga benepisyo ng pagiging bakunado kontra-COVID-19, ayon sa isang opisyal ng Union of Local Authorities of the Philippines (ULAP).

Ayon kay ULAP president at Quirino Governor Dakila Cua, inaalam ng mga barangay captain kung sino ang mga hindi pa bakunado upang mahikayat ngunit nahihirapan umano ang mga ito na kumbinsihin ang ilang residente.

"Sila (barangay captains) talaga ang sumusuyod. Alam nila kung sino-sino (ang 'di pa bakunado) at na-i-re-report naman sa atin. Ang hirap pilitin. Hindi puwedeng i-force 'yung bakuna sa ating mga kababayan," ani Cua.

Aniya, ayaw magpabakuna ng ilan dahil sa religious beliefs.

"May certain percent of population na hindi komportable magpabakuna  whether it is for religious reasons or medical reasons. 'Yun 'yung generic nilang binibigay na dahilan," paliwanag ni Cua.

Upang mabigyang-pansin ang issues hinggil sa mga unvaccinated, sinabi ni Cua na nagpapadala na ng mga doktor ang ilang LGU sa mga komunidad upang ipaliwanag ang kahalagahan ng bakuna ngayong panahon ng pandemya.

"Pero at least na-i-identify kung sino-sino ito ang strategy natin. Pinapapunta ang doctor sa malalayong lugar para doktor ang magpaliwanag... Puwede sila magtanong, puwedeng malaman ang updates sa bakuna at effectivity nito," ani Cua.

Nagsimula nang mag-implement ng iba’t ibang estratehiya ang mga LGU upang ma-restrict ang mga unvaccinated sa paglabas at pagpunta sa mga establisimyento, batay na rin sa direktiba ni Pangulong Rodrigo Duterte.

168K doses ng J&J COVID vaccine, dumating na

ni Lolet Abania | January 11, 2022

Nasa kabuuang 168,000 doses ng Johnson & Johnson (J&J) COVID-19 vaccine ang dumating sa bansa ngayong Martes ng hapon.

Lumapag ang shipment ng mga nasabing bakuna sa Ninoy Aquino International Airport Terminal 3 pasado alas-4:00 ng hapon.

Ang single-shot vaccines, na manufactured ng J&J subsidiary Janssen Pharmaceuticals, ay donasyon ng United States at ipinadala sa Pilipinas sa pamamagitan ng global vaccine-sharing na COVAX facility.

Sa ngayon, nakapag-administer na ang bansa ng 114,249,221 COVID-19 vaccine doses.

Habang tinatayang nasa 52 milyon Pilipino ang fully vaccinated at nasa 3.5 milyon indibidwal ang natanggap ang kanilang booster shots.