Covid vaccines na malapit nang ma-expire balak i-donate ng Pilipinas sa Myanmar at African countries

ni Jasmin Joy Evangelista | March 9, 2022

Plano ng gobyerno na i-donate sa Myanmar at African countries ang mga COVID-19 vaccines na malapit nang ma-expire, ayon kay Health Undersecretary Myrna Cabotaje nitong Martes.

“We’re working continually with the Department of Foreign Affairs. We are looking at countries like Myanmar…Ang nagkukulang ng vaccines ngayon mga African countries,” ani Cabotaje sa isang press conference.

Ayon pa kay Cabotaje, ni-request na ng DOH sa mga regulatory departments ng mga manufacturers na habaan ang shelf life ng mga bakuna.

Sakaling i-extend ito ng mga manufacturer, ire-request ng DOH ang pag-apruba ng Food and Drug Administration (FDA).

“In terms of donating, kasi may mga..we have sufficient vaccines and some of their shelf life are nearing its expiry,” pahayag pa ni Cabotaje.

“Una, ang ginawa natin ay nag-request tayo sa mga regulatory department ng mga manufacturer kung pwedeng i-extend ‘yung shelf life. Tapos kung okay ‘yan, mag-request sa FDA para ma-approve ‘yan,” aniya.

As of March 6, 2022, nasa 69,164,769 first doses na ang naiturok habang 63,690,890 mga Pinoy naman ang fully vaccinated na. Nasa 10,554,093 booster doses naman ang na-administer na.

Pagbabakuna sa edad 5-11 kontra-COVID-19, start na sa Pebrero 1 – NTF

ni Lolet Abania | January 25, 2022

Nakatakdang simulan ang pagbabakuna kontra-COVID-19 sa mga kabataan na nasa edad 5 hanggang 11 sa Pebrero 1, na inisyal na isasagawa sa National Capital Region (NCR), ayon sa National Task Force Against COVID-19 (NTF).

Sa Laging Handa public briefing ngayong Martes, sinabi ni NTF medical adviser Dr. Ted Herbosa na ang unang batch ng Pfizer COVID-19 vaccines na may formulation para sa naturang age group ay darating sa bansa sa Enero 31.

“Mag-uumpisa tayo sa NCR starting February 1, ang unang linggo ng February 1.

Darating dito ng January 31 ang unang delivery ng 50 million doses na ating in-order,” sabi ni Herbosa.

Ayon kay Herbosa, tinatayang 780,000 doses ng COVID-19 vaccines na nakalaan sa mga kabataan ay inaasahang darating sa Enero 31, habang kasunod nito ang marami pang deliveries sa mga susunod na araw.

Palalawigin naman ng gobyerno aniya, sa buong bansa ang pagbabakuna ng mga edad 5 hanggang 11 sa kalagitnaan ng Pebrero.

Sinabi pa ni Herbosa na nasa tinatayang 7 milyong kabataan, ang bilang ng naturang age group.

Pagbabakuna sa pinagtatrabahuhan kontra-COVID, target ng DOLE

ni Lolet Abania | January 20, 2022

Pinag-iisipan ng Department of Labor and Employment (DOLE) ang posibilidad na payagan ang mga workplaces o mga lugar na pinagtatrabahuhan bilang vaccination sites, para mas maging madali sa mga empleyado na hindi pa nababakunahan laban sa COVID-19 na maturukan ng vaccine.

“Opo, tinitingnan din natin ito. Gawin nating mas accessible ‘yung mga bakuna sa mga manggagawa,” ani DOLE Undersecretary Benjo Santos Benavidez sa Laging Handa briefing ngayong Huwebes.

Ginawa ng opisyal ang pahayag matapos na pitong pharmacies at clinics sa National Capital Region (NCR) ang pinayagan ng gobyerno na mag-administer ng primary doses at booster shots sa gitna ng COVID-19 surge sa bansa.

Tinawag ang programa na “Resbakuna sa mga Botika”, kung saan target na makapagbakuna ng 3,500 shots sa kanilang pilot run na nagsimula na ngayong araw, Enero 20 hanggang 21.

“Ang alam ko ngayon nga ay merong pilot implementation na ang pagbabakuna ay nasa mga piling mga botika na. Sana ‘yung pagbabakuna ay ituloy-tuloy na rin sa mga pagawaan,” sabi ni Benavidez.

Aniya, ang mga nakibahaging mga botika at clinics sa Metro Manila sa nasabing programa ay The Generics Pharmacy, Generika Drugstore, Mercury Drug, Southstar Drug, Watsons, Healthway, at QualiMed Clinic.

Ayon kay Benavidez, ito ay bilang konsiderasyon sa naging usapin hinggil sa “no vaccination, no ride” policy na ipinatupad ng gobyerno, kung saan nagbabawal sa mga unvaccinated individuals na sumakay sa mga pampublikong transportasyon na sinimulan noong Lunes, Enero 17.

Gayunman, matapos ang hinaing ng publiko, nilinaw ng mga opisyal ng gobyerno nitong Martes na exempted ang lahat ng workforce o mga manggagawa mula sa naturang polisiya dahil sa pagbibigay ng mga ito ng kanilang essential services.