10 rehiyon nakapagbakuna na ng higit 70% ng target population vs.COVID-19

ni Jasmin Joy Evangelista | February 16, 2022

Sampung rehiyon na sa bansa ang nakapagbakuna kontra COVID-19 ng higit 70 porsiyento ng target eligible population sa kani-kanilang lugar, ayon sa National Task Force (NTF) Against COVID-19.

Ang mga lugar na ito ay:

• National Capital Region

• Cordillera Administrative Region

• Ilocos Region

• Cagayan Valley

• Central Luzon, Calabarzon

• Western Visayas

• Northern Mindanao

• Davao Region

• Zamboanga Peninsula.

Sa mahigit 61 milyong fully vaccinated sa Pilipinas, 53 milyon ang galing sa adult population habang 8 milyon naman ang mga batang edad 12 hanggang 17.

148K kabataan edad 5-11, nabakunahan na kontra-COVID — DOH

ni Lolet Abania | February 15, 2022

Tinatayang nasa 148,615 kabataan na edad 5 hanggang 11 ang nakatanggap na ng kanilang unang dose ng reformulated Pfizer vaccine kontra-COVID-19, ayon sa records ng Department of Health (DOH).

Sa nasabing bilang, walo lamang na bata ang nai-report na nakaranas ng non-serious reactions matapos na mabakunahan.

Gayundin, nasa 9.3 milyong minors naman na edad 12 hanggang 17 ang nabakunahan ng naturang vaccine laban sa COVID-19.

Nakatakda namang dumating ang karagdagan pang suplay ng bakuna para sa edad 5 hanggang 11 para sa inisyal na 700,000 doses na inaasahang matatanggap ng bansa.

Tiniyak ni DOH Spokesperson at Undersecretary Maria Rosario Vergeire na ang nasabing bilang ay magiging sapat hanggang sa susunod na tranche ng vaccine na darating.

Samantala, ayon kay Vaccine Expert Panel Chair Dr. Nina Gloriani, pinag-aaralan pa kung anong dosage ng COVID-19 vaccine ang tutugma para sa mga batang edad 4 at pababa.

Binanggit din ni Vergeire na ang “Bayanihan Bakunahan” na vaccination drive ng pamahalaan sa buong bansa, ay nasa ikatlong ulit na habang patuloy ang iba’t ibang istratehiyang ginagawa para rito.

“Part of the problem is always access, ‘yung mga taong malalayo ang lugar, kailangan talaga puntahan sila ng vaccinators natin. Ang vaccinators, nagbabahay-bahay na sila,” paliwanag ni Vergeire sa isang press briefing ngayong Martes.

Ayon naman kay Gloriani, nabawasan na rin ang pag-aatubili ng iba na magpabakuna habang marami na aniya, ang mas nais na makatanggap ng COVID-19 vaccine.

“Malaki ang binaba ng hesitancy. Kung titignan last 2020 nasa 50-60 percent, bumaba nang bumaba yan, ‘yung SWS as of January, nasa 5% na lang,” sabi ni Gloriani.

52K kabataan edad 5-11, nabakunahan kontra-COVID – DOH

ni Lolet Abania | February 11, 2022

Mahigit sa 50,000 kabataang edad 5 hanggang 11 ang nabakunahan na kontra-COVID-19 mula nang isagawa ng gobyerno ang rollout ng vaccination program noong Pebrero 7, ayon sa Department of Health (DOH).

Sinabi ni DOH Undersecretary Maria Rosario Vergeire na umabot sa kabuuang 52,262 minors mula sa naturang age group ang nakatanggap ng unang dose ng bakuna sa 56 vaccination sites.

Sa nasabing bilang, apat lamang na mga bata ang nakaranas ng mild adverse events following immunization (AEFI) gaya ng masakit sa injection site, rashes o pamamantal, bahagyang pagtaas ng blood pressure, lagnat, at pagsusuka.

Gayunman, ani Vergeire ang mga bata ay agad ding nakarekober.

“Paalala po sa ating mga magulang na ‘wag po tayong matakot at mangamba dahil handa po ang ating mga healthcare workers at ang vaccination sites upang tugunan ang ano mang AEFI na maaaring maramdaman ng inyong mga anak,” paliwanag ng kalihim.

“Kaya naman po muli po amin pong hinihikayat ang aming mga magulang, ang ating mga legal guardian, iparehistro na po natin ang ating mga kabataan edad 5 hanggang 11 taon para sa karagdagang proteksyon,” dagdag niya.

Ayon kay Vergeire, ang mga bata na below 5-anyos, ang may pinakamataas na kaso ng fatality rate na kabilang sa pediatric age group mula noong Marso 2021 na umabot hanggang Enero 2022, bukod dito noong Disyembre 2021.

“Pinakamataas ang naitalang case fatality rate noong Nobyembre kung saan tumama ito sa 1.47%,” sabi ni Vergeire.

Gayunman aniya, ang kaso ng pagkamatay o death percentage ng COVID-19 cases ay nananatili pa ring pinakamataas mula sa mga senior citizens dahil sa kanilang comorbidities.