4 nakaranas ng matinding epekto nang mabakunahan ng COVID-19 vaccine

ni Lolet Abania | March 1, 2021

Apat katao ang naitalang dumanas ng masamang pakiramdam matapos na maturukan ng Sinovac COVID-19 vaccine sa Veterans Memorial Medical Center (VMMC) kung saan isinagawa ng kauna-unahang pagbabakuna sa bansa ngayong Lunes.

Ayon sa mga doktor, ang nai-report na sintomas ay kinokonsiderang mild side effects subalit inaalam pa nila kung ito ay dahil sa itinurok na Sinovac vaccine. Ipinaliwanag din ng mga doktor na maaaring ang kanilang mga naranasan ay dulot ng anxiety tungkol sa pagbabakuna.

Base sa ulat, ang apat ay dinala sa emergency room. Isa sa apat na kaso ay staff ng VMMC na sumama ang pakiramdam na nagkaroon ng rashes at pamumula ng balat matapos na maturukan ng vaccine.

Isang lalaking staff naman ng Department of National Defense (DND) ay dinala ng ambulansiya makaraang mabakunahan ng Sinovac vaccine dahil sa pagkahilo, pananakit ng ulo at high blood pressure. Isa pang babaeng DND personnel ang nagkaroon ng rashes sa kanyang katawan.

Ang huli na sumama ang pakiramdam ay nagkaroon ng palpitations o pagbilis ng tibok ng kanyang puso. Sa apat na kaso, dalawa ang nakalabas na ng ospital habang minomonitor naman ang dalawang iba pa.

Samantala, tinatayang nasa 125 ang nabigyan ng vaccine doses sa Philippine General Hospital sa Manila, 85 sa Dr. Jose N. Rodriguez Memorial Hospital sa Tala, Caloocan; at 30 sa AFP Medical Center sa V. Luna Avenue, Quezon City. Patuloy ang isasagawang roll out ng pamahalaan para sa 600,000 doses ng Sinovac vaccine sa maraming ospital sa Metro Manila.

180 health workers sa Tala, babakunahan ng Sinovac

ni Mary Gutierrez Almirañez | March 1, 2021

Unang dinala ang 600 doses ng Sinovac COVID-19 vaccines sa Tala Hospital sa Caloocan City kaninang 12:40 nang madaling-araw, Marso 1. Eksaktong 1:08 AM nang tanggapin ng ospital ang bakuna at bawat vial nito ay katumbas ng .5 millimeter na kaagad idiniretso sa cold storage facility na nasa bandang Pharmacy section ng ospital kung saan nandu'n ang freezer na may 2 hanggang 8 degree celsius na temperatura.

Noong nakaraang linggo pa nasimulan ang pre-registration at ngayong 10:30 AM nakatakdang simulan ang pagbabakuna.

Magsisimula ang proseso sa Waiting Area na makikita sa labas ng ospital. Dito sila uupo habang hinihintay tawagin ang pangalan papunta sa Registration Area. Pagkarating sa Registration Area, dito ibe-verify ang kanilang pangalan.

Pagka-verify ay didiretso sa Vital Signs Area upang ma-check kung nakakaranas ng high blood, allergy o mga sintomas ng COVID-19.

Hindi babakunahan ang taong mayroon ng mga ito. Kapag nakapasa sa Vital Signs Area, didiretso sa Screening Area kung nasaan ang doktor para i-double check ang mga naunang proseso at katanungan bago bakunahan.

Kapag nakapasa sa ika-apat na steps ay didiretso na sila sa actual procedure ng pagbabakuna. Matatagpuan sa second floor ang Holding Area kung saan hihintayin matawag ang pangalan para mabakunahan.

Sisiguraduhing naipapatupad ang social distancing at iba pang health protocols upang makatiyak na hindi magdidikit-dikit ang binakunahan at mga naghihintay mabakunahan. Pagdating sa Vaccination Area ay dito na isasagawa ang pagbabakuna.

Matapos mabakunahan, didiretso sa Monitoring Area kung saan kailangang manatili nang 15 minuto para obserbahan at masiguro na walang magiging adverse reaction sa bakuna.

Sakaling magkaroon ng reaction sa Sinovac ay kaagad ididiretso sa Treatment Area ang indibidwal na nakaranas ng side effect.

Ngunit kapag sobrang tindi ng naging reaction ay kaagad itong isusugod sa Emergency Room upang doon gamutin at bigyang lunas.

Kung wala namang nararanasang side effect ay puwede nang umuwi.

Ayon sa survey, 180 healthcare workers ng Tala Hospital lamang ang pumapayag na mabakunahan ng Sinovac sa mahigit 1,165 na sumagot. Ganunpaman ay hindi ito ikinakabahala ng mga executives ng ospital.

Anila, "Wala itong puwersahan. Kung ayaw nila ng Sinovac na ito, ang kanilang option is to wait for the arrival, kung ano mang vaccine 'yun."

Walang MGCQ, bakuna muna!– P-Duterte

ni Lolet Abania | February 22, 2021

Hindi isasailalim ang buong bansa sa maluwag na klasipikasyon na modified general community quarantine (MGCQ) hanggang walang pagbabakuna ng COVID-19 na nagaganap.

Sa isang statement, sinabi ni Presidential Spokesman Harry Roque, Jr. na mas matimbang kay Pangulong Rodrigo Duterte ang kalusugan at kaligtasan ng publiko kesa sa ekonomiya ng bansa.

"President Rodrigo Roa Duterte gave his directive to the Cabinet that the Philippines would not be placed under modified general community quarantine unless there is a rollout of vaccines," ani Roque sa pagpupulong ngayong Lunes nang gabi.

"The Chief Executive recognizes the importance of reopening the economy and its impact on people's livelihoods. However, the President gives higher premium to public health and safety," dagdag ng kalihim.

Ayon kay Roque, nais ng Pangulo na simulan na ang pagbabakuna kontra COVID-19 sa lalong madaling panahon upang aniya, maisailalim na ang bansa sa maluwag na community quarantine.

Matatandaang sinabi rin ni Senator Bong Go na naniniwala si P-Duterte na ang pagsasailalim sa MGCQ ay hindi makabubuti ngayon sa bansa. "No vaccine rollout, no MGCQ muna -- PRRD," ani Go sa isang interview.