500 taga-Makati, unang naturukan ng Pfizer COVID-19 vaccine

ni Lolet Abania | May 12, 2021

Ang mga residente ng Makati City na nagtungo sa Makati Medical Center (MMC) ngayong Miyerkules para mabakunahan ng inaasahan nilang Sinovac COVID-19 vaccine ay naging mga unang nakatanggap sa lungsod ng Pfizer vaccine.

Ayon sa medical director ng ospital na si Dr. Saturnino Javier, naging maayos ang inisyal na pagbabakuna ng hinihintay na vaccine brand sa tinatayang 300 hanggang 500 residente sa unang araw pa lamang nito.

“So far, the challenge is we need to make sure that we maintain the proper temperature requirement of the vaccine,” ani Javier. Dagdag niya, kailangan lamang nilang isaayos nang mabuti ang ilang isyu hinggil sa proseso ng vaccine administration na pinaghandaan nila nang matagal. Sinabi ni Javier na mahigit sa 5,000 Pfizer doses ang inilaan ng Makati City habang katuwang ang MMC para sa pag-store ng nasabing bakuna sa mga ultra low freezers.

Aniya, kinakailangan ng naturang vaccine na mailagay sa isang temperatura sa pagitan ng -70 to -80 degrees Celsius.

Ayon pa kay Javier, natanggap ng ospital kahapon ang 195 vials na bawat isa ay naglalaman ng 5 hanggang 6 doses.

Agad itong inilagay sa isang bio-ref para i-thaw o matunaw ang vaccine bago i-administer sa loob ng 3 hanggang 5 araw.

“My recollection is that within 15 minutes you should be able to do it. So they only aspirate when they are here already.

So there may be some degree of waiting for the vaccinees because we want to make sure they receive the vaccine in its optimum condition,” saad ni Javier.

Isa ang Makati sa mga nakatakdang lugar sa bansa na maaaring makakuha ng unang batch ng Pfizer vaccines na nakalaang ibigay sa Pilipinas mula sa COVAX Facility. At upang masunod ang mga COVAX requirements, ang mga priority groups gaya ng medical frontliners, senior citizens, at person with comorbidities ang maaari lamang tumanggap ng naturang bakuna.

Target ng MMC na mabakunahan ang hanggang 600 katao kada araw na aabutin hanggang weekend at maubos ang Pfizer vaccine. “We’re very particular of the wastage because these are limited quantities of vaccines so we want to make sure that we don’t have any vaccine that goes to waste,” sabi pa ni Javier.

Samantala, ang lokal na pamahalaan ng San Juan City ay nagsimula na ring magbakuna kontra-COVID-19 gamit ang Pfizer-BioNTech vaccine ngayong Miyerkules. Sa isang Facebook live, sinabi ni San Juan City Mayor Francis Zamora na 11,700 doses ng Pfizer vaccine ang nai-deliver sa lungsod, para maibigay ang 2 doses sa 5,850 na mga residente.

Bakuna kontra-COVID sa lahat ng manggagawa sa Saudi, ipatutupad

ni Ronalyn Seminiano Reonico | May 8, 2021

Magpapatupad ang pamahalaan ng Saudi Arabia ng mandatoryong pagbabakuna laban sa COVID-19 sa lahat ng mga manggagawa, pampubliko at pribado, ayon sa human resource ministry noong Biyernes.

Hindi sinabi ng ahensiya kung kailan ito magiging epektibo ngunit saad ng Ministry of Human Resources and Social Development sa Twitter, "Receiving a coronavirus vaccine will be a mandatory condition for male and female workers to attend workplaces in all sectors (public, private, non-profit).

"The ministry will soon clarify the mechanisms of the decision and its implementation date.”

Sapilitang pagbabakuna sa mga kasambahay sa HK, ipinatigil

ni Lolet Abania | May 5, 2021

Pansamantalang itinigil ng gobyerno ng Hong Kong ang plano na gawing mandatory ang pagbabakuna ng COVID-19 vaccines sa mga dayuhang kasambahay matapos na umapela ang human rights group dahil anila, isang uri ito ng diskriminasyon.

Batay sa ulat na inilabas ng Reuters, ipinag-utos umano ng Hong Kong authorities na ipa-test sa COVID-19 ang lahat ng dayuhang kasambahay bago sumapit ang Mayo 9.

Ibinaba ang kautusan makaraang madiskubre na nagpositibo sa mas nakakahawang variant ng COVID-19 ang isang kasambahay na nanggaling sa Pilipinas. Gayundin, kinakailangan na mabakunahan na kontra-COVID-19 ang kasambahay bago ma-renew ang kanilang kontrata.

Gayunman, ayon kay Hong Kong leader Carrie Lam, sinuspinde na nila kahapon ang direktiba na mandatory vaccination dahil sa mga reklamo ng mga grupo ng mga manggagawa, pati na rin ang ilang opisyal sa Pilipinas.

“I have asked the secretary for labor to review the whole policy, and to consult advisers and consulates for the countries where domestic workers primarily come from as to whether compulsory vaccinations can be done,” ani Lam.

Subalit giit ni Lam, hindi maituturing na discriminatory ang gagawing mandatory COVID-19 vaccination habang target naman nilang tapusin ang mandatory testing para sa lahat ng domestic workers sa Mayo 9. Karamihan ng mga babaeng kasambahay ay galing sa Pilipinas, Indonesia, Nepal at Sri Lanka, kung saan naninirahan sila sa kanilang mga amo. Ikinatuwa naman ng chairperson ng United Filipinos in Hong Kong na si Dolores Balladares, ang suspensiyon ng mandatory vaccination sa mga domestic workers.

“We welcome the suspension of mandatory vaccines, but we are calling for scrapping the mandatory testing and vaccine policy entirely, as it punishes and criminalizes domestic workers,” ani Balladares sa Thomson Reuters Foundation.

“We are in favor of testing and vaccination on a voluntary basis. But singling us out and making it mandatory is discriminatory and leads to further stigmatization,” dagdag pa ni Balladares