Sa 3 buwan... 2M Pinoy pa lang ang fully vaccinated — DOH

ni Lolet Abania | June 13, 2021

Dalawang milyon pa lamang mula sa populasyon na 109.48 milyong Pilipino ang nakatanggap ng dalawang doses ng COVID-19 vaccines o fully vaccinated na halos tatlong buwan matapos simulan ng pamahalaan ang programa ng pagbabakuna sa bansa.

Ito ang ibinigay na ulat ni Department of Health (DOH) Undersecretary at treatment czar Leopoldo Vega hinggil sa pinakabagong bilang at updates ng vaccination program ng gobyerno.

“This will take a long time because we know that as of now, we have only fully vaccinated around 2% of our population. That's far from our target before the end of the year on vaccinating 50% to 70% of [the population],” ani Vega sa isang radio interview ngayong Linggo.

Ayon kay Vega, para makamit ang tinatarget na bilang, kinakailangang 500,000 indibidwal ang mabakunahan araw-araw. Gayunman, aminado si Vega na ang kakulangan sa supply ng vaccines ang nagiging dahilan kaya naantala at tumatagal ang pagbabakuna ng COVID-19 sa mga mamamayan.

Matatandaang humingi ng paumanhin si Vaccine Czar Carlito Galvez Jr., dahil sa pagka-delay ng delivery ng bakuna sa ilang local government units (LGUs).

Ayon kay Galvez, tinatayang 10 milyong doses ng bakuna laban sa COVID-19 ang ide-deliver sa bansa nitong Hunyo at 11 milyon naman ang darating sa Hulyo.

Batay sa datos ng gobyerno noong 2020, ang Pilipinas ay may populasyon na 109.48 milyon, habang inaasahang pumalo ito ng 110.88 sa katapusan ng 2021.

Samantala, ipinaliwanag ni Vega na ang transportation at temperature ang nagiging rason kaya nagkakaroon ng pagkaantala sa delivery ng bakuna sa ilang mga probinsiya.

Payo ni Vega, ang mga bakuna na AstraZeneca, Sinovac at iba pang vaccine brands na hindi sensitibo sa tinatawag na storage temperatures ay maaaring dalhin sa mga malalayong lugar sa bansa para mabakunahan ang mga kababayan natin.

Mga manggagawa, binakunahan na

ni Ronalyn Seminiano Reonico | June 12, 2021

Sinimulan na ang pagbabakuna sa mga economic frontliners laban sa COVID-19 sa Valenzuela City ngayong Sabado.

Pahayag ni Valenzuela Mayor Rex Gatchalian, “Right now we're opening 'yung industry vaccination site namin kung saan ang mga may appointment doon, mga industriya na rito sa Valenzuela. Nag-appointment doon, hindi lang indibidwal kundi korporasyon, para sa manggagawa nila.”

Ayon kay Gatchalian sa isang teleradyo interview, tinatayang umabot na umano sa 25,000 economic frontliners ang nakapagpa-register na para mabakunahan laban sa COVID-19.

Aniya, may inilaang vaccination sites para sa mga industry workers upang hindi maapektuhan ang ongoing na vaccination program para sa priority sectors na kinabibilangan ng mga health workers, senior citizens at mga may comorbidities.

Saad pa ni Gatchalian, “Dito sa Valenzuela, ang mga factories namin, may mga 3,000 empleyado. Gusto naming nakahiwalay sila pero sabay-sabay na binabakunahan today.”

Mayor Vico Sotto, nabakunahan na ng AstraZeneca

ni Ronalyn Seminiano Reonico | May 23, 2021

Nabakunahan na ng AstraZeneca COVID-19 vaccine si Pasig City Mayor Vico Sotto noong Sabado. Ipinost ni Sotto sa Facebook ang larawan niya habang binabakunahan at aniya ay pang- 57,858 Pasigueño na siyang nabakunahan.

Saad pa ni Sotto, “Ilang linggo na rin akong kinukulit ng Vaccination Team natin na magpabakuna na. Nasa kategoryang A1 ang mga mayor. Gusto ko naman talagang magpabakuna, pero lagi kong naiisip na may mga mas dapat unahin na high risk, katulad ng seniors... pero napagtanto ko na ang pagbabakuna ay hindi lang para sa sarili ko, kundi para sa lahat ng nakakasalamuha ko... kahit na nag-iingat ako at umiiwas ako sa physical contact, hindi pa rin maiiwasan ang makipag-meeting at bumaba sa ground para sa trabaho.”

Hindi na siya umano nakihati pa sa mga may nais maturukan ng Pfizer kaya AstraZeneca ang ginamit sa kanya. Saad pa ni Vico, “Para po sa mga magtatanong, AstraZeneca po ang ginamit sa 'kin.. hindi na ako nakihati sa dami ng humihingi ng Pfizer - bakit pa?? Eh, ganu’n din naman ‘yun... Lahat ng aprubadong brand, nasa 100% ang proteksiyon sa severe at bumababa ang tsansa na makapanghawa kung magkasakit man ang nabakunahan na.”

Ayon din kay Sotto, limitado pa sa ngayon ang suplay ng bakuna kasabay ng panawagan niya sa publiko na ihanda ang mga sarili para makapagpabakuna kapag dumami na ang suplay sa susunod na mga buwan.

Aniya pa, “Limitado pa rin po ang supply pero inaasahan natin, dadami na ito sa susunod na mga buwan. Kaya habang naghihintay, ihanda na natin ang mga sarili natin. Makinig sa eksperto at 'wag sa forwarded message sa Viber. Tandaan natin, hindi lang ito para sa mga sarili natin, kundi para sa ating lahat.”