Target, 'di pa naaabot… Bakuna sa mga guro, mamadaliin bago magsimula ang klase

ni Lolet Abania | July 19, 2021

Mahigit sa 300,000 guro pa lang ang nabakunahan kontra-COVID-19, ayon kay Department of Education (DepEd) Secretary Leonor Briones.

Sa Laging Handa briefing ngayong Lunes, sinabi ni Briones na batay sa datos, nasa 15 lamang mula sa 17 rehiyon ang na-administer ng COVID-19 vaccines dahil ang DepEd offices sa Region 4B at Bangsamoro Autonomous Region in Muslim Mindanao ay hindi pa nakapagsumite ng kanilang report.

Aniya, target nilang makapagbakuna ng malaking bilang ng mga guro bago matapos ang Agosto o ilang linggo bago naman magbukas ang klase sa Setyembre 13.

Matatandaan noong nakaraang buwan, binanggit ng DepEd na nakatuon sila sa paghikayat sa mga guro at personnel na magpabakuna kontra-COVID19 bilang paghahanda umano sa face-to-face classes sa low-risk areas.

“Should the President and the IATF (Inter-Agency Task Force for the Management of Emerging Infectious Diseases) allow limited face-to-face classes based on the gains of our COVID-19 mitigation efforts, DepEd shall still employ stringent conditions and safety protocols in our field offices and schools that will participate in the pilot implementation of face-to-face classes,” ayon sa isang statement ng DepEd noong Hunyo 14.

Gayunman, noong Hunyo 21, hindi pinayagan ni Pangulong Rodrigo Duterte ang panukala ng DepEd na magkaroon ng limitadong face-to-face classes, dahil ayon sa pangulo, “I did not want to gamble on the health of the children,” habang sinabing mas mahalaga pa rin sa kanya ang pagbabakuna kontra-COVID-19.

Walang nagpalista, nilangaw.. Walk-in, puwede nang magpabakuna

ni Lolet Abania | June 23, 2021

Papayagan ang mga indibidwal na makatanggap ng COVID-19 vaccine sa ilalim ng walk-in policy subalit kinakailangang sumunod pa rin sa ipinatutupad na minimum public health standards, ayon sa Department of Interior and Local Government (DILG).

Ito ang tugon ni DILG Assistant Secretary Odilon Pasaraba, kaugnay sa isinasagawa ni Manila City Mayor Isko Moreno, ang pahintulutan ang mga walk-ins na makatanggap ng bakuna, matapos na naging matumal ang pagdating ng mga tao para magpabakuna sa apat na vaccination sites ng lugar dahil sa polisiya na limitado ang bibigyan ng vaccine shot na para lamang sa mga naka-register sa vaccination.

“DILG Secretary Eduardo Año encourages local chief executives to develop strategies to ramp up vaccination. Hence, any strategy done without offending our established health and vaccination protocols is welcome,” ani Pasaraba sa Laging Handa briefing ngayong Miyerkules.

Base sa data mula Manila Public Information Office, umabot sa 4,402 indibidwal lamang ang nabakunahan bago pinayagan ang walk-ins noong June 21.

Gayunman, nang payagan na ni Moreno ang walk-ins na makatanggap ng bakuna ng alas-4:30 ng hapon sa pareho ring araw, ito ay nadagdagan ng 7,347 katao na nabakunahan, kaya umabot sa kabuuang 11,749 indibidwal ang naturukan ng COVID-19 vaccine.

Sa ngayon, mayroon nang tinatayang 12 milyon doses ng COVID-19 vaccine supply ang Pilipinas. Sa bilang na ito, 8 milyon doses ng COVID-19 vaccine na ang naibigay sa mga indibidwal, kung saan 2.6 milyon naman ang nakatanggap ng dalawang doses ng bakuna na kinakailangan.

Panggabing turukan ng Covid vaccine, sinimulan na

ni Ronalyn Seminiano Reonico | June 17, 2021

Naglunsad ang pamahalaan ng Quezon City ng panggabing COVID-19 vaccination services para sa mga manggagawang hindi magawang lumiban sa trabaho sa umaga.

Saad pa ng QC local government unit, “Layon nitong mabakunahan ang mga essential workers na hindi makapagliban sa kanilang trabaho sa umaga, lalo na ang mga no work-no pay personnel.”

Alas-6 nang gabi nagsisimula ang pagbabakuna hanggang 10 PM.

Umabot na rin umano sa 2,000 pre-registered essential workers na kabilang sa A4 priority group ang nabakunahan na sa Quezon City Hall Grounds kagabi.

Saad pa ni QC Mayor Joy Belmonte, "Ngayon, hindi na nila kailangang mamili kung arawang kita ba muna o bakuna. We will inoculate them at a time most convenient to them.”