21 milyong bakuna, naiturok na!

ni Lolet Abania | August 4, 2021

Mahigit sa 21 milyon doses na ng COVID-19 vaccines ang na-administer ng gobyerno sa mga mamamayan hanggang nitong Agosto 3, 2021.

“We would like to present to Congress the good news that the Philippines has already administered 21,883,781 doses of various vaccines, 12,058,315 have taken the first dose while 9,825,466 Filipinos are now fully vaccinated,” ani Vaccine Czar Secretary Galvez sa briefing ng House committee on health sa sitwasyon ng bansa sa COVID-19 ngayong Miyerkules.

Ayon kay Galvez, ang bilang ng mga indibidwal na fully vaccinated ay nasa 13.87% sa target ng gobyerno para sa mga eligible na populasyon na nasa edad 18 at pataas, at nasa 8.85% sa kabuuang populasyon ng Pilipinas Binanggit din ni Galvez na nagkaroon ng “significant” na pagdami ng daily average na pagbabakuna kung saan 529,911 doses ang naibigay sa mga indibidwal mula Hulyo 28 hanggang Agosto 3.

“Many people and even our detractors said that it is very impossible for us to have the 500,000. Now we are breaching more than 600,000 and nearing 700,000 mark,” saad ni Galvez. Nakapagtala ang pamahalaan ng pinakamataas na bilang ng nabakunahan sa isang araw nitong Agosto 3 na umabot sa 673,652 doses ng COVID-19 vaccines.

Samantala, pumalo na sa 3,709,376 mga indibidwal ang nabakunahan sa loob lamang ng isang linggo. Sinabi ni Galvez na sa ngayon, nakatanggap na ang Pilipinas ng 37,275,800 doses ng COVID-19 vaccines simula noong Pebrero.

Para sa buwan ng August, inaasahan ng gobyerno na mai-deliver ang karagdagang 22,726,000 doses ng bakuna. “We analyzed and assessed that in order to meet monthly demand and increasing capacity of all regions, provinces, and districts, the Philippines needs to deliver at least 25 million monthly,” sabi ni Galvez.

Mga ayaw magpabakuna, ibalik sa loob ng bahay 'pag lumabas — P-Du30

Larawan

ni Ronalyn Seminiano Reonico | July 29, 2021

Inatasan ni Pangulong Rodrigo Duterte ang awtoridad na siguraduhing mapapanatili sa loob ng bahay ang mga indibidwal na hindi pa bakunado laban sa COVID-19 dahil sa banta ng COVID-19 Delta variant.

Saad ni P-Duterte, "Itong mga ayaw magpabakuna, sinasabi ko sa inyo, 'wag kayong lumabas ng bahay. Kasi 'pag lumabas kayo ng bahay, sabihin ko sa mga pulis na ibalik kayo sa bahay n'yo. You'll be escorted back to your house because you are a walking spreader."

Aniya pa, "Kaya kung ayaw ninyong makatulong by having the vaccines, 'wag na lang kayong lumabas ng bahay. "Ayaw mong magpabakuna tapos, eh, sabihin ko ako na mismo ang sasagot niyan, kung may idemanda, ako na. 'Yan ang utos ko, ibalik ka roon sa bahay mo. 'Yan ang utos ni Mayor. Kung magdemanda ka balang-araw, idemanda mo siya. Harapin ko 'yan. I assume full responsibility for that."

Aniya, trabaho ng mga barangay kapitan ang alamin kung sinu-sino ang mga residenteng nasasakupan nila na hindi pa bakunado at dapat din umanong siguraduhin nilang hindi makakalabas ng bahay ang mga unvaccinated.

Samantala, inatasan din ng pangulo ang mga local government units na ibigay na lang ang bakunang nakalaan para sa mga indibidwal na ayaw namang magpaturok sa mga nais mabakunahan. Saad pa ni P-Duterte, "'Yung ayaw, 'wag nang hintayin."

'Di nagpabakuna, bawal sa SONA!

ni Lolet Abania | July 19, 2021

Fully vaccinated na indibidwal lang ang papayagang pisikal na makadalo sa huling State of the Nation Address (SONA) ni Pangulong Rodrigo Duterte sa Hulyo 26, ayon kay House Secretary General Mark Llandro Mendoza.

Sa isang virtual interview kay Mendoza, sinabi nitong tinatayang nasa 350 katao ang maaaring dumalo sa SONA. “As of now, ang papayagan sa loob, around mga 350 na tao... magkakasama na lahat, senators, congressmen, mga ibang government officials saka ibang guests,” ani Mendoza ngayong Lunes.

“Ang ginawa natin kasi, ‘yung mag-a-attend nang physically sa SONA, ‘yung papasok, fully-vaccinated actually. ‘Yun ang isa sa requirements na inano ng PSG, ini-require ng House,” sabi ng opisyal.

“Kaya naman dinamihan natin ngayon, karamihan naman kasi is fully-vaccinated na. At the same time, nagluwag na rin ‘yung IATF so 30% ng capacity ng plenary ay puwedeng gamitin. Pero piling-pili rin talaga ang inano namin, ni-require na talagang fully-vaccinated ka,” sabi pa ni Mendoza.

Ayon kay Mendoza, ang mga dadalo sa SONA ay kailangang sumailalim sa RT-PCR at antigen testing. Aniya, ang RT-PCR test ay para sa mga papasok sa plenary habang ang antigen test ay para sa mga hindi kailangan sa loob ng plenary.

“Hindi naman natin pupunuin ‘yung plenary, eh. Plenary siguro, mga around 60... The rest kasi, nasa first and second gallery siya,” saad ni Mendoza. Dagdag niya, ang nasa guest list ay mga dating pangulo, mga bise-presidente, Speakers of the House, at iba pang mahahalagang personalidad na naimbitahan.

Binanggit din niya si dating Pangulong Gloria Macapagal-Arroyo na nagkumpirmang dadalo sa SONA. Gayundin, si VP Leni Robredo ay naimbitahang dumalo subalit wala pang kumpirmasyon mula rito.

Magkakaroon din aniya ng Zoom links para sa mga hindi makaka-attend sa SONA. Samantala, ayon kay Mendoza, ang director ng SONA ngayong taon ni Pangulong Duterte ay mula sa government channel na PTV4.

Isasailalim din sa lockdown simula sa Biyernes, Hulyo 23, ang Batasang Pambansa. “Ginagawa naman talaga ‘yun. Normally by Friday, lockdown na talaga, wala na talagang puwedeng pumasok sa Batasan starting Friday,” ani pa ni Mendoza.