267K estudyante, next na bakunahan kontra-COVID-19

ni Lolet Abania | September 15, 2021

Plinaplano na ng lokal na pamahalaan ng Quezon City na makapagbakuna ng 267,000 estudyante na nasa 12 hanggang 17, habang naghahanda para sa vaccination rollout ng mga menor-de-edad.

Sa inilabas na press statement ngayong Miyerkules, ayon sa local government ang kanilang QC Task Force Vax to Normal ay nakikipag-ugnayan na sa mga pribado at pampublikong paaralan ng lungsod para ilista ang bilang ng mga enrolled students ngayong academic year 2021-2022.

Ayon kay task force co-chairman Joseph Juico, inihahanda na nila ang online booking system para sa programa ng pagbabakuna sa mga kabataan kapag ang mga supplies ay dumating na.

Bukod sa mga estudyante, sinabi pa ni Juico na kabilang din sa vaccination program aniya, “out-of-school youth, homeschooled, and students enrolled outside the city.”

Ang Quezon City ay nagsimulang maghanda para sa vaccination ng mga kabataan matapos na umabot ang lungsod na makapagbakuna ng mahigit 80% ng mga eligible population o mga nasa edad 18 pataas.

“It is now time to shift our attention to minors because they are also vulnerable to the virus. Moreover, they comprise about 30% of the city’s approximately 3.1 million population and it is impossible to reach herd immunity or 80% of total population without including them,” pahayag ni Quezon City Mayor Joy Belmonte.

Hanggang nitong Setyembre 15, ang Quezon City ay nakapag-administer na ng 1,750,537 ng unang dose o 102.97% ng kanilang target population. Sa bilang na ito, ang mga fully vaccinated individuals ay nasa 1,232,681 o 72.51% ng target na populasyon.

Samantala, iba pang local government units sa Metro Manila na nagbukas na rin ng registration ng pagbabakuna ng mga kabataan ay Pateros, Manila, Caloocan, Mandaluyong, at Taguig.

Kasambahay ng senior citizen, babakunahan na rin — DOH

ni Lolet Abania | August 15, 2021

Pinag-iisipan ng Department of Health na isama sa priority sector ng pagbabakuna ng gobyerno kontra-COVID-19 ang mga kasambahay ng mga senior citizens kasabay ng patuloy na paghahanap ng mga awtoridad ng supply ng bakuna.

Ayon kay DOH Undersecretary Myrna Cabotaje, binubuo na nila ang mga guidelines para sa polisiya sa gitna ng pagdami ng bilang ng mga fully vaccinated na seniors sa buong bansa na umabot na sa 43% ang kabuuan.

“We are coming up with another strategy – ‘yung A2 (senior citizens) plus one. Ibig sabihin, senior citizen, dinala ng household member, pati ang household member, babakunahan,” sabi ni Cabotaje, chairwoman din ng National Vaccine Operations Center (NVOC).

Sinabi pa ni Cabotaje na posibleng isama sa pagbabakuna ang household member na nag-aalaga mismo sa senior citizen. Gayundin, ayon sa kalihim, ang mga nasa A3 o people with comorbidity members at kanilang caretakers ay maaari na ring mabakunahan. Samantala, hanggang nitong Agosto 12, nakapagtala na ang National Task Force against COVID-19 ng 12,282,006 Pilipino o 17.19% ng eligible target na populasyon ng bansa na nakakumpleto ng dalawang dose ng COVID-19 vaccines.

Ang mga eligible target population ay mga nasa edad 18 at pataas. Nasa 26,677,269 doses naman ng COVID-19 vaccines ang na-administer na mula sa 41,515,350 doses ng bakuna na na-secure ng pamahalaan mula sa iba’t ibang manufacturers.

Siyam sa 10 nasa ICU, hindi bakunado — NTF

ni Ronalyn Seminiano Reonico | August 08, 2021

Karamihan sa mga pasyenteng nasa intensive care units (ICUs) ay hindi bakunado laban sa COVID-19, ayon kay Dr. Ted Herbosa, special adviser ng National Task Force against COVID-19.

Aniya sa isang panayam, "Mga taong infected sa ICU, nine out of 10, hindi vaccinated. 'Yung may bakuna, mild lang, may sipon lang.

Hindi nila kailangang maospital, doon lang sila sa isolation facilities.” Nanawagan din si Herbosa sa publiko lalo na sa mga senior citizens at mga may comorbidities na magpabakuna na laban sa COVID-19.

Samantala, noong Sabado, sumipa sa 11,021 ang naitalang bagong kaso ng COVID-19 at pumalo na sa 1,649,341 ang total cases sa bansa kung saan 1,544,443 ang gumaling na at 28,835 ang mga pumanaw.