Sa Nob. 29- Dis. 1.. Nat’l vaccination drive, aarangkada na — P-Du30

ni Lolet Abania | November 10, 2021

Ipinahayag ni Pangulong Rodrigo Duterte nitong Martes ng gabi na isasagawa ng gobyerno ang 3-araw na national vaccination drive sa Nobyembre 29 hanggang Disyembre 1, kasabay ng paggunita ng Bonifacio Day sa Nobyembre 30.

Sa kanyang weekly Talk to the People, ayon sa Pangulo layon ng vaccination drive na maiparating ang mensahe na sa bawat Pilipino na magpapabakuna laban sa COVID-19, sila ay itinuturing na mga bayani.

“Ang gusto sabihin dito ng gobyerno na kayong lahat na nagpabakuna ay heroes. Lahat kayo hero. ‘Yong hindi nagpabakuna, mga pangit,” ani Pangulo.

Una nang sinabi ni vaccine czar Secretary Carlito Galvez Jr. na plano ng gobyerno na magkaroon ng 3-day national vaccination drive dahil aniya, bulto-bulto na ng mga supplies ng COVID-19 vaccine ang dumarating sa bansa.

Ani Galvez, halos 30 milyong Pinoy na rin ang fully vaccinated kontra-COVID-19, magmula nang opisyal na umpisahan ang vaccination program ng pamahalaan noong Marso 1.

Sa lahat ng kabataan Pagbabakuna kontra-COVID-19, start na sa Nob. 3 — Galvez

ni Lolet Abania | October 27, 2021

Posibleng simulan na ang pagbabakuna kontra-COVID-19 sa lahat ng kabataan edad 12 hanggang 17-anyos sa buong bansa sa Nobyembre 3, ayon kay Vaccine Czar Carlito Galvez Jr.

“We will open up ’yung (vaccination ng) 12 to 17 years old sa November 3 dahil nakita natin na maganda naman ang naging result ng ating trials at pilot sa hospitals. Nakita natin very minimum ‘yung adverse effects,” ani Galvez sa isang interview ngayong Miyerkules.

Ayon sa opisyal mahigit sa 14,000 menor-de-edad na may comorbidities na ang kanilang nabakunahan. “Nakapagbakuna na tayo ng more than 14,000, io-open na po natin para wala nang tinatawag nating bottleneck,” paliwanag ni Galvez.

Sinabi ni Galvez na ang mga pribadong kumpanya ay maaari na ring isagawa ang pagbabakuna sa mga minor dependents ng kanilang mga empleyado.

“Puwede na po ‘yun, just in case sa November 3 puwede na po mag-start. They have to coordinate with the different LGUs... coordinate with the National Vaccination Operation Center (NVOC) para ma-inspect at sa training,” sabi ni Galvez.

Binanggit naman ni Galvez na nasa tinatayang 40 hanggang 50 pang ospital sa buong Pilipinas ang nakatakdang magsagawa ng pediatric vaccination. “Magkakaroon na tayo ng more than 50, (There will be) additional 50 hospitals all throughout the Philippines,” sabi naman ni Galvez sa hiwalay na interview nito sa CNN Philippines.

Samantala, ipinahayag ng Department of Health (DOH) na mananatiling Pfizer at Moderna vaccines ang gagamitin para sa nationwide rollout.

“Further details and the guidelines with regard to the nationwide expansion of pediatric vaccination will be released once finalized,” sabi ni DOH Undersecretary Maria Rosario Vergeire.

Hinimok din ng DOH ang mga nasa populasyon ng mga adult o matatanda, lalo na iyong mga nasa A2 at A3 priority groups na magpabakuna na kontra-COVID-19 para sa dagdag na proteksyon laban sa sakit.

9,928 minors na may comorbidities nabakunahan na kontra-COVID-19 – DOH

ni Lolet Abania | October 25, 2021

Umabot na sa kabuuang 9,928 menor-de-edad na may comorbidities ang nabakunahan laban sa COVID-19 sa ngayon, ayon sa Department of Health (DOH).

“Ito naman po ay kino-consider na natin that it was successful, no? Naging maayos po ‘yung ating mga proseso,” ani DOH Undersecretary Maria Rosario sa isang media briefing ngayong Lunes.

Sinabi rin ni Vergeire na sakaling ang dalawang phase ng pediatric vaccination ay maging matagumpay, palalawigin na ito sa iba pang mga rehiyon.

“So ‘yan po ay pinagplaplanuhan, pinag-uusapan na at magbibigay tayo ng information in the coming days,” sabi ni Vergeire.

Samantala, ayon kay Vergeire, 10 kabataan ang nakaranas ng reactions sa COVID-19 vaccines. “Tatlong mga bata ay nagkaroon ng allergic reactions but all were managed.

"Tatlo po ay nagkaroon ng anxiety-related reactions, at ‘yung apat po mga minor lang po,” pahayag ni Vergeire.

“So far, wala pa po tayong serious at adverse reactions that were noted,” dagdag pa ng kalihim.

Tiniyak naman ni Vergeire na ang DOH ay patuloy na mino-monitor ang sitwasyon ng mga naturang menor-de-edad.

“Katulad ng sabi natin, hindi lang natapos ang monitoring namin pagkatapos lang ng bakunahan. We will monitor them for this whole month para makita natin if there will still be other reactions na mangyayari,” paliwanag ni Vergeire.

Una nang sinabi ng ahensiya na ang mga kabataang magpapabakuna ay kailangang makakuha ng clearance mula sa kanilang mga doktor at dapat na magbigay ng kanilang consent at pagsang-ayon.

Ayon sa DOH, ang mga kabataan na may comorbidities na eligible sa pagbabakuna kontra-COVID-19 ay iyong may medical conditions gaya ng medical complexity, genetic condition, neurologic conditions, metabolic o endocrine diseases, cardiovascular diseases, obesity, HIV Infection, tuberculosis, chronic respiratory disease, renal disorders, at hepatobiliary disease, at may mga immunocompromised dahil sa sakit o treatment.