Manila Zoo muling binuksan; mga bibisita puwedeng magpabakuna

ni Jasmin Joy Evangelista | January 20, 2022

Makalipas ang halos tatlong taon matapos ipasara dahil umano sa dulot na polusyon sa Manila Bay, muling binuksan ang Manila Zoo pero limitado lamang ang puwedeng pumasok dahil sa COVID-19 pandemic.

Kasama ni Manila Mayor Isko Moreno ang mga city officials sa unang araw ng pagbubukas nito kung saan limitado lamang ang bilang ng mga papapasukin bilang pag-iingat at pagsunod sa health and safety protocols.

Ayon kay Moreno, ang 5-hectare facility na ito ay kayang mag-accommodate ng hanggang 16,000 katao pero dahil sa pandemya, lilimitahan lamang sa 1,000 katao ang papayagan aylt bibigyan ng free entrance sa Manila Zoo.

“Mga lolo’t lola ko, mga senior citizen, yung apo ninyo pwede nyo nang ipasyal dito, tapos may bakuna pa. So two birds in one stone,” ani Domagoso sa isang interview.

Bukas ang zoo hanggang Jan. 31 at pag-aaralan ng mga local officials kung babaguhin ang protocols sa mga susunod pang araw.

“We will see kung gaano mangyari, then we can make it bigger in terms of numbers and foot traffic, para nang sa ganun, maiwasan pa din natin yung pagsasama-sama na hindi masyado naayos,” pahayag ng alkalde.

Ginamit din ng Manila LGU ang zoo bilang pasilidad sa pagbabakuna sa mga kabataang edad 11-17, at maging mga senior citizens.

Para sa mga nais pumunta at magpabakuna, mag-enroll lamang sa www.manilacivod19vaccine.ph.

Ito ay parte ng programa ng Manila LGU para ma-expand ang access ng mga residente sa bakuna.

“Mayroon silang health center, school, malls, tapos yung ating drive thru sa 2-wheel dun sa Kartilya, tapos yung 24/7 na booster caravan drive thru sa Luneta, tapos ito sa Manila Zoo,” pahayag ng alkalde.

Bakunahan sa Muntinlupa, hindi muna tatanggap ng mga walk-in

ni Jasmin Joy Evangelista | January 10, 2022

Simula ngayong araw ng Lunes, January 10, hindi muna tatanggap ng walk-in sa mga vaccination site sa Muntinlupa hanggang sa Miyerkules, January 12.

Ito ay para sa gagawing tatlong araw na pediatric vaccination sa lungsod.

Ayon sa Muncovac, iniiwasan nila ang maraming tao na magkumpulan sa vaccination site ngayong linggo. Ang mga puwede lamang magpabakuna ay ang mga nakakuha ng text schedule at mga menor de edad na 12-17 years old.

Nananawagan din ang lokal na pamahalaan sa mga residente na magrehistro na para sa sa vaccination ng 5 to 11 years old.

Anila, ito ay pre-registration pa lang sakaling magbigay na ng go signal ang Department of Health sa pagbakuna ng mga bata.

Sa pinakahuling datos, may 1,695 active cases sa lungsod. Higit 400 dito ay mga bagong kaso lang sa isang araw.

Pagbabakuna sa edad 5-11 kontra-COVID-19, target gawin sa Pebrero — DOH

ni Lolet Abania | January 7, 2022

Target ng gobyerno na gawin ang pagbabakuna kontra-COVID-19 sa mga kabataang edad 5 hanggang 11 sa unang linggo ng Pebrero ngayong taon.

Ayon kay Department of Health (DOH) Undersecretary Myrna Cabotaje, hinihintay na lamang ng pamahalaan ang delivery ng doses ng Pfizer vaccine na inorder para sa pagbabakuna ng nasabing age group.

“Ang tinitingnan nating date, earliest first week of February, maumpisahan natin ‘yung pagbabakuna ng ating 5 to 11,” ani Cabotaje sa Laging Handa briefing ngayong Biyernes.

Binanggit naman ni DOH Undersecretary Maria Rosario Vergeire na posibleng dumating ang first tranche ng mga Pfizer vaccines sa katapusan ng Enero o sa unang linggo ng Pebrero.

“We have to understand there is a global shortage of these 5 to 11 years old na bakuna coming from this manufacturer, kaya nagkakaroon ng allocation per country sila ngayon,” paliwanag ni Vergeire.

“Hopefully, ‘yung commitment nila that they will provide us by the end of January until first week of February with the initial tranche for our vaccines [ay matuloy],” saad pa ni Vergeire.

Matatandaang na nito lamang huling bahagi ng Disyembre 2021 inaprubahan ng Food and Drug Administration (FDA) ang emergency use authorization (EUA) ng Pfizer vaccine para sa edad 5 hanggang 11.