DOH, nagsumite na ng dokumento ng COVID-19 vax deals sa COA

ni Lolet Abania | December 15, 2022

Nagsumite na ang Department of Health (DOH) ngayong Huwebes ng mga dokumento ng kanilang COVID-19 vaccine procurement deals sa Commission on Audit (COA).

Personal na iprinisinta ni DOH officer-in-charge Maria Rosario Vergeire ang mga dokumento sa COA sa kahilingan na rin ng Senate Blue Ribbon Committee, na una nang nagsiyasat hinggil sa non-disclosure agreements, kung saan pumipigil umano sa mga auditors para alamin ang vaccine procurement.

Ayon kay Vergeire, kabilang sa mga nai-submit na mga dokumento ay supply agreements na magpapagaan sa pag-audit ng multi-billion-peso loans para sa mga vaccines.

“Handa pong harapin ng Kagawaran ng Kalusugan ang anumang katanungan ukol sa ating vaccine procurement sapagkat kampante tayo na lahat ng mga prosesong isinagawa ng ating pamahalaaan sa pagbili ng mga bakuna upang maprotektahan ang ating mga kababayan ay nakaayon sa batas,” saad ni Vergeire sa isang statement.

Kamakailan, nabanggit ng COA na ang DOH ay nag-request ng isang special audit dahil ito ay ini-require ng World Bank at Asian Development Bank, kung saan nagpo-provide ng mga loans para sa pagkuha ng mga COVID-19 vaccines.

“The DOH is confident of the results that the special audit will yield,” ani Vergeire.

“The first time we procured these vaccines, confident tayo dahil alam natin we bought these vaccines to protect Filipino people,” pahayag ni Vergeire sa mga reporters.

21K inmates fully vaccinated na kontra-COVID-19 — DOH

ni Lolet Abania | October 4, 2021

Mahigit sa 21,000 inmates sa bansa ang nakatanggap na ng kumpletong doses ng bakuna kontra-COVID-19, ayon sa Department of Health.

“As of Oct. 1, we have a total of 21,487 out of the 170,404 masterlisted PDLs (persons deprived of liberty) have been fully vaccinated,” ani DOH Undersecretary Maria Rosario Vergeire sa press briefing ngayong Lunes.

Batay sa datos mula sa Bureau of Jail Management and Penology at Bureau of Corrections, sinabi ni Vergeire na mayroong 37,204 persons deprived of liberty (PDLs) ang nakatanggap naman ng first dose ng COVID-19 vaccine.

Aniya pa, ang pagbabakuna sa mga PDL ay isa sa mga prayoridad din ng DOH. “Ang mga PDLs are in an enclosed institution and their vulnerability and risk to infection is very high,” sabi ni Vergeire sa mga reporters.

Nanawagan naman ang DOH sa BJMP, BuCor at lokal na gobyerno sa inalaang alokasyon na COVID-19 vaccines ng ahensiya para sa mga PDL, kung saan prayoridad na sila ay mabakunahan.

5 Nagkalat ng fake news na 'no vaccine, no ayuda', kinasuhan

ni Lolet Abania | August 9, 2021

Sinampahan ng kaso ng mga awtoridad ang limang indibidwal na nagpakalat umano ng fake news hinggil sa COVID-19 vaccination program ng gobyerno, ayon sa Malacañang.

Isinisi naman ng mga opisyal ng gobyerno ang maling impormasyon na natanggap, na ang mga unvaccinated ay hindi bibigyan ng cash aid sa ilalim ng enhanced community quarantine (ECQ), kaya dinumog ng mga tao ang ilang vaccination sites sa Manila at Las Piñas sa Metro Manila at sa Antipolo City sa Rizal.

“The police has said that cases have been filed against five people for unlawful utterances,” ani Presidential Spokesperson Harry Roque sa press briefing ngayong Lunes, batay sa impormasyong ibinigay sa kanila ng Philippine National Police-Directorate for Investigation and Detective Management (PNP-DIDM).

Matatandaang isinailalim ang Metro Manila sa ECQ, ang pinakamahigpit na quarantine level, na nagsimula noong Agosto 6 hanggang 20 para maiwasan ang pagkalat pa ng mas nakahahawang Delta COVID-19 variant.

Noong Hulyo 28, nagbigay naman ng direktiba si Pangulong Rodrigo Duterte sa mga pulis at barangay officials na huwag payagan ang mga hindi pa bakunado na gumala-gala sa kalsada upang maiwasan ang pagkalat ng virus.

Gayunman, nabanggit ni Roque na ayon kay Pangulong Duterte, hindi na dapat sisihin ang mga dumagsang indibidwal na nagtungo sa mga vaccination centers sa Metro Manila.