Nabakunahan sa ‘Pinas kontra-COVID, lagpas 1 million na!

ni Ronalyn Seminiano Reonico | April 12, 2021

Mahigit isang milyong katao na ang nabakunahan laban sa COVID-19, kumpirmasyon ng Malacañang ngayong Lunes.

Ayon kay Presidential Spokesperson Harry Roque, 1,007,356 na ang nakatanggap ng first dose ng bakuna at 132,288 naman ang nakatanggap na ng second dose. Sa kabuuang bilang ay umabot na sa 1,139,644 ang mga nabakunahan sa bansa.

Saad pa ni Roque, "Importanteng achievement po ito dahil lumampas na po tayo ng one million na nabakunahan."

Samantala, 70 million Pinoy ang target mabakunahan ng pamahalaan ngayong taon laban sa coronavirus. Sa bilang ng mga nabakunahan, ayon kay Roque, 965,169 doses ang naibakuna sa mga healthcare workers na nangungunang prayoridad ng pamahalaan sa isinagawang vaccination program.

Ayon din kay Roque, karamihan sa mga nabakunahan ay taga-Metro Manila na sinundan ng Central Luzon, Calabarzon, Central Visayas, Davao Region, SOCCSKSARGEN, Ilocos, Northern Mindanao, at Western Visayas regions.

Matatandaang nakatanggap ang Pilipinas ng 2.5 million COVID-19 vaccine doses mula sa Sinovac Biotech at 525,600 AstraZeneca vaccine ng COVAX Facility.

Health workers, para 'wag matakot… Mayor Romualdez ng Tacloban, nagpabakuna na kahit bawal pa

ni Mary Gutierrez Almirañez | March 24, 2021

Nilinaw ni Tacloban Mayor Alfred Romualdez na ang ginawa niyang pagpapaturok kontra COVID-19 ang humikayat sa ibang healthcare workers ng lungsod na magpaturok din, ayon sa panayam sa kanya ngayong umaga, Marso 24.

“Alam n’yo nu'ng nabakunahan ako, ‘yung 350, naging 790,” kuwento pa niya.

Iginiit niyang natatakot magpabakuna ang mga healthcare workers ng Tacloban kaya nagdesisyon siyang magpabakuna gamit ang Sinovac upang tumaas ang kumpiyansa ng mga ito at para hindi na bawiin ang mga bakuna pabalik sa National Capital Region (NCR).

Aniya, "Tinatanong nila sa akin, Mayor, sabay na lang ako sa 'yo 'pag nabakunahan ka. Sabi ko, 'Hindi ako priority.' Akala nila siguro, naghihintay ako, baka may mas magandang bakuna.

Sasabay sila sa akin." Bagama’t hindi kasama sa prayoridad ang alkalde ay nagpabakuna pa rin siya.

Nakahanda naman siyang sagutin ang mga kumukuwestiyon sa kanya at makikipagtulungan siya sa gagawing imbestigasyon ng pamahalaan.

2 araw matapos mabakunahan… Pakistan Prime Minister Khan, positibo sa COVID

ni Ronalyn Seminiano Reonico | March 22, 2021

Nagpositibo sa COVID-19 si Pakistani Prime Minister Imran Khan noong Sabado, dalawang araw matapos siyang mabakunahan laban sa Coronavirus.

Ayon kay Health Minister Faisal Sultan, si Khan ay mayroong mild cough at fever ngunit "in good health" naman at naka-self-isolate na.

Aniya pa ay posibleng dinapuan na ng COVID-19 ang 68-anyos na si Khan bago pa ito mabakunahan noong Huwebes. Hindi naman binanggit ng awtoridad kung ano ang natanggap ni Khan na bakuna.

Samantala, ayon sa ulat, 3,876 ang naitalang kaso ng COVID-19 sa Pakistan noong Sabado at umabot na sa 620,000 ang kabuuang bilang nito.

Umabot na rin sa 13,799 ang bilang ng mga pumanaw matapos maitala ang karagdagang 42 deaths.