COVID restrictions, luluwagan na… Bisita sa bahay, puwede na, bars at resto, bukas na rin sa Norway

ni Ronalyn Seminiano Reonico | June 19, 2021

Luluwagan na ang COVID-19 restrictions sa Norway simula sa Linggo, June 20, kung saan maaari nang tumanggap ng 20 bisita sa mga bahay at maaari na ring magbukas ang mga bars at restaurants hanggang gabi, ayon kay Prime Minister Erna Solberg.

Papayagan na rin ang mas maraming manonood sa mga sports arena simula sa Linggo, ayon kay Solberg.

Aniya, bubuksan na rin sa mga overseas visitors ang Norway ngunit required pa rin ang testing at kailangan pa ring sundin ang mga quarantine requirements.

Saad ni Solberg, "The infection situation is still unpredictable in many parts of the world, and there is uncertainty linked to mutations.”

Samantala, nakapagtala ang Norway ng 130,000 kaso ng COVID-19 simula nang tumama ang pandemya noong nakaraang taon at ang kabuuang bilang naman ng mga nasawi ay 790.

Ayon sa Norwegian Institute of Public Health (FHI), 33% ng adult population ng Norway ang fully vaccinated na laban sa COVID-19 habang 16% ang nakatanggap na ng first dose ng bakuna.

Magsisimba, 30% na ang puwede — IATF

ni Lolet Abania | May 21, 2021

Itinaas na ng Inter-Agency Task Force for the Management of Emerging Infectious Diseases (IATF) sa 30 porsiyento ang seating capacity para sa mga religious gatherings sa NCR Plus at iba pang mga lugar sa bansa, ayon kay Department of Justice (DOJ) Secretary Menardo Guevarra.

Sinabi ni Guevarra na ang bagong polisiya, kung saan maisasagawa rin sa mga lugar sa ilalim ng general community quarantine (GCQ) with heightened restrictions, ay inaprubahan ng IATF kahapon matapos ang hiling at pakiusap ng mga simbahan.

Gayunman, ito ay ipapatupad nang hanggang May 31.

“This applies to all religious faiths, sects, and denominations,” ani Guevarra.

Matatandaang ipinatupad ng gobyerno ang limitadong 10% venue capacity para sa mga religious gatherings upang maiwasan ang pagkalat pa ng COVID-19.

Gayunman, isinailalim ni Pangulong Rodrigo Duterte ang Metro Manila at karatig-probinsiya gaya ng Bulacan, Rizal, Cavite, at Laguna – na tinatawag na NCR Plus -- sa GCQ with heightened restrictions mula May 15 hanggang May 31.

Paglabas-masok sa NCR, mas hinigpitan

ni Mary Gutierrez Almirañez | March 23, 2021

Mahigpit na sinusuri sa checkpoint ang mga ID at dokumento ng bawat motorista na lumalabas-masok sa boundary ng Metro Manila, Bulacan, Cavite, Laguna at Rizal o ang tinatawag na ‘NCR Plus bubbles’ sa pagpapatuloy ng ipinatutupad na bagong guidelines ng Inter-Agency Task Force (IATF) kontra COVID-19 ngayong umaga, Marso 23.

Batay sa ulat, iniisa-isa ang mga motorsiklo, pribado at pampublikong sasakyan sa boarder ng Quezon City - Batasan Road, San Mateo Rizal at sa Payatas Road - Rodriguez Rizal upang masigurado na sila ay essential workers, authorized person outside residence (APOR) at may importanteng lakad upang papasukin o palabasin sa boarder.

Tinatayang aabot ng 30 segundo hanggang 1 minuto ang pag-iinspeksiyon sa bawat I.D. at posible pa iyong tumagal kung hahanapan ang motorista ng supporting documents maliban sa company I.D. o Driver’s license na nagdudulot ng mahabang pila sa checkpoint.

Kaugnay nito, mahigpit ding ipinapatupad ang seguridad sa labas ng NCR Plus bubbles, kung saan ilang residente na ang pinauwi mula sa checkpoint ng Tagaytay City at Talisay, Batangas dahil hindi sila authorized person outside residence (APOR) at wala ring maipakitang dokumento para pahintulutang lumabas-masok sa mga boarder.

Kabilang sa mga napabalik sa pinanggalingan ay ang mag-asawang iginiit na papasok sila sa trabaho ngunit wala namang maipakitang I.D. o dokumento. Sinita rin ang motorista galing sa Tanawan, Batangas sapagkat may kasama itong menor-de-edad, pero pinayagan ding makatawid sa boarder pauwing Silang, Cavite dahil sa humanitarian consideration.

Sa ngayon ay patuloy ang paghihigpit sa bawat checkpoint upang mapigilan ang mabilis na hawahan ng COVID-19, partikular na sa Metro Manila na sentro ng virus.