Pagbabakuna sa polling precincts, ‘di tama – Garcia

ni Lolet Abania | May 4, 2022

Mariing tinanggihan ni Commission on Elections (Comelec) Commissioner George Garcia ang paglalagay ng mga COVID-19 vaccination sites sa mga polling precincts dahil hindi aniya ito ang tamang venue at posibleng magdulot ng kalituhan sa mga botante para sa eleksyon.

Sa ginanap na Kapihan sa Manila Bay forum ngayong Miyerkules, ipinaliwanag ni Garcia na kahit hindi pa natatanggap ng kanyang opisina ang anumang recommendation letter mula sa Department of Health (DOH) hinggil sa paglalagay ng mga vaccination centers para sa mga botante sa nalalapit na May 9 elections, hindi niya ito aaprubahan dahil ang pagsasagawa nito aniya, “not the proper time.”

“Ako po personally, as a member of the Commission, mukhang hindi po yata tama, sa aking palagay. With all due respect sa DOH, siyempre po we have to focus sa elections muna. We have to allow our voters to vote first. ‘Wag na muna natin isabay sa pagboto,” giit ni Garcia.

Ipinunto rin ng opisyal na ang pagkakaroon ng mga vaccination sites sa mga polling precincts ay maaaring magdulot sa mga botante ng maling impresyon na kailangan muna nilang magpabakuna bago sila papayagang makaboto.

“Baka sabihin ng mga botante na requirement pala ang pagbabakuna eh, baka matakot ‘yung iba na pumunta lalo na ‘yung unvaccinated dahil sa kanilang paniniwala kung personal man o religious o whatever,” dagdag ni Garcia.

Nitong Lunes, sinabi ni infectious disease expert Dr. Edsel Salvana, na miyembro rin ng DOH Technical Advisory Group, na mas mabuti para sa mga botante kung mabibigyan sila ng oportunidad na makuha ang kanilang COVID-19 vaccines o booster shots na isasagawa malapit sa mga voting precincts upang madagdagan ang vaccine coverage ng bansa.

Sa kabila ng pagdidiin na hindi siya laban sa pagbabakuna, iginiit ni Garcia na ang Mayo 9 ay dapat para lamang sa eleksyon at ang mga polling centers ay fully-controlled na ng Comelec, kaya aniya anuman ang mangyari sa panahong iyon, sakop ito ng kanilang hurisdiksyon.

Kaugnay nito, tinanong si Garcia kung imumungkahi niya sa gobyerno ang pagsuspinde ng national COVID-19 vaccination sa May 9 elections para mapayagan ang publiko na makaboto, aniya, “Yes. Siguro naman hindi malaking kawalan din kung isang araw na lang ‘yun ay ma-reserve na natin sa pagboto ng mga kababayan natin.”

Una nang ipinahayag ni Garcia na hindi mandatory para sa mga registered voters na magprisinta ng COVID-19 vaccination card at negative result ng RT-PCR o antigen test bago bumoto. Ang kailangan lamang ng mga botante ay magdala at isuot ang kanilang face masks, gayundin, hindi na required sa mga polling precincts ang pagsusuot ng face shields.

Close contact ng COVID-19 positive, bawal lumabas sa Election Day – DOH

ni Lolet Abania | May 2, 2022

Inihayag ni Department of Health (DOH) Secretary Francisco Duque III ngayong Lunes na kahit na mga naging close contacts ng indibidwal na nagpositibo sa test sa COVID-19 ay dapat na manatili sa tirahan at iwasan ang lumabas sa panahon ng May 9 elections.

Sa isang radio interview, tinanong ang opisyal kung ang mga miyembro ng pamilya ng isang nag-COVID-19 positive ay puwedeng lumabas at bumoto sa Election Day, ani Duque, “Hindi. Kung meron naka-isolate, dapat let them stay in where they are kasi kasama ‘yan sa ating Disease Notifiable Act of 2021 or RA 11332.”

“Kung may sakit, naka-isolate ka, let them stay. Hindi puwedeng palalabasin mo tapos magkakalat. Hindi naman tama ‘yun from a public health point of view,” dagdag niya.

Giit ni Duque, kahit na ang mga miyembro ng pamilya ng isang nag-COVID positive ay dapat na ipagpalagay o i-assume na na-contract na nito ang virus dahil sa magkasama sila sa bahay at ang Omicron variant ay mas nakahahawa kumpara sa Delta variant.

Samantala, ang Commission on Elections (Comelec) ay nananatili sa naging pahayag na ang mga COVID-19 positives at kahit na iyong may mga sintomas ng COVID-19 sa Election Day ay papayagan na bumoto sa mga isolation polling precincts.

“May posibilidad din po na ‘yung mismong may findings na, na talagang COVID-19 positive ay nakalabas ng bahay o isolation facility kung saan siya nando’n, wala tayong magagawa kundi pabotohin sila,” paliwanag ni Comelec Commissioner George Garcia sa isa ring interview.

Gayunman, ayon kay Duque, ang naturang isyu ay pag-uusapan pa rin kasama ang Comelec para sa tinatawag na “fine-tuning” na kung ikokonsidera, ito ang unang pagkakataon na ang bansa ay magsasagawa ng eleksyon sa gitna ng pandemya.

Omicron, pinaka-dominant COVID-19 variant na sa ‘Pinas — PGC

ni Lolet Abania | April 29, 2022

Iniulat ng Philippine Genome Center (PGC) na ang pinaka-dominant o nangungunang COVID-19 variant sa ngayon sa bansa ay ang Omicron.

“Masyadong mababa ang ating mga kaso kaya konti rin po ang mga samples na sinu-submit sa amin sa PGC. Starting po ng end ng December 2021 up to the present the most dominant variant in the Philippines is not Delta, it is already Omicron,” ani PGC executive director Dr. Cynthia Saloma sa Laging Handa briefing ngayong Biyernes.

Ayon kay Saloma, mula sa mga Omicron variants, ang pinakamaraming bilang ng mga kaso na na-detect ay ang BA.2.3 Omicron sublineage, base ito sa resulta ng latest sequencing na kanilang ginawa.

“Among the Omicron variants ang pinakamarami po talaga sa ating bansa ay itong BA.2.3. Ito pong BA.2.3 po sa ating latest sequencing results for the months of March at saka April siya po ‘yung mga 95% of our sequenced cases are in the BA.2.3 sublineage po,” paliwanag ni Saloma.

Batay sa mga reports, ang Omicron BA.2.3 strain ay nabatid na kumakalat na sa ibang mga bansa kabilang na ang Denmark, Japan, at China.

Sinabi naman ni Saloma na kakaunti na lamang ang Delta cases na na-detect sa pagitan ng Marso at Abril.

“From time to time nakikita pa rin po namin may mga pa-ilan-ilang mga Delta sequences sa iba’t ibang bahagi ng Pilipinas. But these are very, very minor if I remember correctly between March and April we only detected about four cases in the Southern Philippines,” saad ni Saloma.

Una nang inanunsiyo ng Department of Health (DOH) nitong Miyerkules na na-detect ng health authorities ang unang kaso ng Omicron BA.2.12 sa Baguio City.

Ang bagong sublineage BA.2.12 ay na-detect mula sa isang 52-anyos na babaeng Finnish national na dumating sa bansa mula Finland noong Abril 2.

Base sa kasalukuyang contact tracing, ang pasyente ay nagkaroon ng 44 close contacts kabilang na iyong nasa Quezon City, 5 sa Benguet, at 30 indibidwal na nakasama niya sa eroplanong sinakyan patungo sa Manila.