Pagpatay sa 9 aktibista, iimbestigahan ng DOJ

ni Ronalyn Seminiano Reonico | March 8, 2021

Magsasagawa ng imbestigasyon ang Department of Justice (DOJ) sa pagpatay sa 9 na aktibista sa isinagawang raid ng security forces sa Calabarzon noong Linggo.

Ayon sa awtoridad, nagsagawa ng simultaneous raid upang maghain ng search warrant sa mga aktibista sa ilang lugar sa Calabarzon na sangkot diumano sa kasong "illegal possession of firearms.”

Ayon naman kay Justice Secretary Menardo Guevarra, ang insidente ay napapaloob sa hurisdiksiyon ng Administrative Order 35 Task Force at nakatakdang magsagawa ng pagpupulong sa ikatlo o ikaapat na linggo ng Marso.

Samantala, magsasagawa rin ng imbestigasyon ang Commission on Human Rights (CHR) sa insidente. Pahayag ni Spokeswoman Jacqueline de Guia,

"Activists are not necessarily terrorists and there should be a differentiation between those who take up arms and those who merely exercise their constitutional right to form and join associations, organizations as well as petition the government for redress of its grievances.”

Yantok vs. mga pasaway sa health protocols, self-defense lang — CHR

ni Thea Janica Teh | December 7, 2020

Magsisilbi lang umanong paalala at self-defense sa mga lalabag sa health protocols ang paggamit ng yantok ng mga pulis, paglilinaw ng Joint Task Force (JTF) COVID Shield ngayong Linggo.

Ito ay matapos mabahala ang Commission on Human Rights (CHR) sa paggamit ng yantok ng mga pulis panlaban sa mga lumabag sa health protocols. Ayon kay Police Lt. Gen. Cesar Binag, head ng JTF COVID Shield, gagamitin lang din ng mga pulis ang yantok bilang panukat sa isang metrong physical distancing.

Bukod pa rito, isa rin umano itong paalala sa publiko na kung may lumabag sa patakaran at manlaban ay mapipilitan ang mga pulis na gamitin ito bilang self-defense.

Dagdag pa ni Binag, maaaring humantong sa pagkakakulong ang hindi pagsunod sa health protocols kaya dapat itong seryosohin at hindi ipagsawalang-bahala.

Samantala, pinaalalahanan naman ng CHR ang mga awtoridad na dapat isipin pa rin ng mga ito ang karapatang-pantao kahit sa panahon ng pandemya.

Tinatayang umabot na sa 439,834 ang kabuuang bilang ng kumpirmadong kaso ng COVID-19 sa Pilipinas ngayong Linggo.