Campaign ads sa socmed, babantayan — COMELEC

ni Lolet Abania | May 28, 2021

Tinatayang 59 milyong voters ang nakarehistro na para sa halalan sa 2022, ayon sa Commission on Elections (COMELEC).

Ayon kay Comelec Commissioner Antonio Kho, Jr., sa mga nagnanais na magparehistro bilang botante, ito ay maaaring gawin hanggang sa Setyembre.

“We are inviting all our voters, prospective voters to register and go to our offices para makapagrehistro sila at puwede silang bumoto,” ani Kho sa isang televised public briefing ngayong Biyernes.

“As of April... mayroon na po tayong around 59 million voters registered,” dagdag ni Kho.

Sinabi rin ni Kho na dahil sa panganib ng COVID-19 pandemic, nagsagawa ang Comelec ng isang internet portal para sa voter registration. Magtatalaga rin sila ng mga personnel sa mga komunidad habang maglalagay ng satellite registration sa mga lugar.

“Hopefully with all these measures, we will increase our registration... We expect to reach around 60 million plus,” ani Comelec official.

Aniya, aabot sa 61.8 registered voters ang naitala noong 2019 senatorial elections.

Ayon pa kay Kho, tinatayang 7 milyong voters ang na-deactivate ng Comelec sa dahilang sila ay nabigong bumoto nang dalawang beses.

Samantala, masusing imo-monitor ng Comelec ang mga political o campaign ads ng mga kandidato na tatakbo sa eleksiyon sa susunod na taon.

Papayagan ang mga campaign ads ng mga kandidato, subalit limitado lamang ang airtime nito sa radio at television broadcast. Ang political ads naman sa mga print ay kanilang ire-regulate batay sa laki at placement nito sa mga diyaryo o sa billboard habang ang social media ay nasa ilalim ng broadcast.

“Campaign ads are divided between print and broadcast which is TV and radio. Social media will be under broadcast. We will control in terms of expenses incurred in entering contracts with social media carriers,” ani Kho.

Asahan aniya, ang mga pangangampanya ng mga kandidato, gamit ang social media habang mababawasan naman ang mga political rallies dahil sa ipinagbabawal ang pagkakaroon ng mass gatherings sa gitna ng COVID-19 pandemic.

“Sa campaign, we cannot really remove the political rallies. Nandiyan talaga ‘yan sa ating history. Tradisyon na ‘yan sa kampanya. But there will be a strict implementation of safety measures,” sabi ni Kho.

Eleksiyon 2022, tuloy kahit may pandemya – Comelec

ni Lolet Abania | May 3, 2021

Tuloy ang nakatakdang 2022 presidential polls sa May 9, 2022 sa kabila ng COVID-19 pandemic, ayon sa Commission on Elections (Comelec).

Ito ang tiniyak ni Director at Comelec Spokesperson James Jimenez sa publiko kung saan isang taon at anim na araw na lamang ang nakaiskedyul na eleksiyon.

“We have started our countdown dahil alam natin na matutuloy ang halalan. Walang dahilan para hindi matuloy ang halalan,” ani Jimenez sa isang radio interview.

“We expect that we will hold the elections in the middle of the COVID-19 pandemic, that herd immunity is not yet assured at that point,” dagdag niya.

Naitala na mas mababa pa sa 1% ang populasyon ng mga fully vaccinated kontra-COVID-19 habang matatawag na mayroong herd immunity na ang bansa kapag umabot na ang nabakunahan sa tinatayang 70% ng kabuuang populasyon.

Gayunman, sinabi ni Jimenez na ang bilang ng mga precincts para sa 2022 polls ay nasa 110,000, mas marami kumpara sa 84,000 precincts na nagamit noong 2019 polls. Ito ay para maipatupad ang social distancing.

Bukod sa karagdagang precincts, ayon kay Jimenez, pinag-aaralan ng Comelec na palawakin ang absentee voting, kung saan papayagan ang mga indibidwal na bumoto bago ang election day, dahil limitado lamang noon ang pagboto na para sa mga tatakbo at kandidato sa national posts.

“Ang namumuro ngayon ay ang pag-expand ng absentee voting. This is a privilege given to government employees who perform election day service and to the members of the media, but we are looking at expanding it to vulnerable sectors such as those persons with disabilities and senior citizens,” paliwanag ni Jimenez.

“That way, we will be able to decongest the polling places and the task will be manageable,” sabi pa ni Jimenez.

Subali't ayon kay Jimenez, wala sa opsiyon ng Comelec ang pagsasagawa ng mail-in voting sa dahilang ang postal system ng bansa ay hindi pa modernized at hindi kakayanin nito na ipadala at matanggap ng mga botante ang mga ballots sa lahat ng sulok ng bansa sa oras o tamang panahon.

“Postal voting for overseas absentee voting has long been in place because it uses the postal system of the host country [where the OFW is]. But here [in our country], the modernization of our postal system is still in midway and we don’t see it done in time for the 2022 elections,” ani Jimenez.

Samantala, base sa records ng Comelec, tinatayang nasa 61 milyon ang registered voters para sa 2022 elections, subali't nilinaw ni Jimenez na maaaring nakasama pa sa kabuuang bilang na ito ang mga namatay na dahil sa COVID-19.

Nanawagan naman si Jimenez sa mga kaanak ng nasawi sa COVID-19 na i-report sa mga lokal na opisina ng Comelec sa kanilang lugar ang pagkamatay ng mga mahal nila sa buhay.

Aniya, dapat na ipaalam ng isang miyembro ng pamilya ang tungkol sa nasawi nilang kamag-anak, kung saan maaari silang magpunta sa Comelec office at magdala lamang ng identification card at ang death certificate ng kanilang kaanak.

“It used to be the role of the Office of the Civil Registrar to inform Comelec of these deaths, but I imagine they are also overwhelmed amid the pandemic that is why I am calling on the public to join our efforts in cleaning the voters’ list,” ani Jimenez.

Voter registration, iiklian

ni Ronalyn Seminiano Reonico | March 21, 2021

Pansamantalang iiklian ng Commission on Elections (Comelec) ang voter registration nang 2 oras simula sa Lunes, March 22 hanggang sa Linggo, April 4 dahil sa patuloy na pagtaas ng kaso ng COVID-19.

Ayon sa Comelec, ang oras ng voter registration tuwing Lunes hanggang Huwebes ay mula 8 AM hanggang 3 PM at ang issuance naman ng voter certificatioin ay hanggang 5 PM. Tuwing Biyernes ay magsasagawa naman ng disinfection ang Comelec.

Pansamantala ring sinuspinde ng ahensiya ang satellite registration sa mga barangay halls, daycare centers, covered courts atbp. satellite offices.

Nagpaalala rin ang Comelec sa mga magpaparehistro na sumunod sa health and safety protocols.

Pahayag pa ni Comelec Spokesperson James Jimenez, “Wearing of face mask and face shield is mandatory. To minimize physical contact, the accomplishment of the application form and setting of appointment via irehistro.comelec.gov.ph is encouraged.”