Mayor Sara at Buhay Party-list Rep. Atienza, absent sa VP debate — Comelec

ni Lolet Abania | March 20, 2022

Pito lamang mula sa siyam na kandidato sa pagka-bise presidente ang maghaharap sa unang vice presidential debate na sponsored ng Commission on Elections (Comelec) ngayong Linggo.

Ayon kay Comelec spokesman James Jimenez, kabilang sina Walden Bello, Rizalito David, Manny Lopez, Willie Ong, Francis Pangilinan, Carlos Serapio, at Vicente Sotto III ang nag-commit na dadalo sa una na dalawang vice presidential debates ng Comelec.

Hindi naman inaasahang lalahok sina Davao City Mayor Sara Duterte-Carpio at Buhay Party-list Rep. Lito Atienza sa VP debate.

Si Atienza, na running-mate ni presidential candidate Senador Manny Pacquiao, ay pormal na tumanggi dahil aniya sa medical reasons habang si Duterte-Carpio, na runningmate naman ni presidential aspirant Ferdinand “Bongbong” Marcos Jr. ay nagpasyang hindi dumalo sa anumang debate kaugnay sa May 9 elections.

Sa kabila ng pagiging absent ng dalawa, nagtakda pa rin ang Comelec ng 9 lecterns onstage, na katumbas sa bilang ng mga kandidato para sa ikalawang pinakamataas na posisyon sa bansa. Bawat VP candidate ay maaaring magdala ng 5 staff members lamang sa venue na magsisilbi bilang miyembro ng audience.

Ayon sa Comelec, mahigit 300 pulis at traffic personnel ang idineploy sa venue sa Pasay City para sa seguridad at pagmo-monitor ng traffic.

Nakatakda naman ang ikalawang vice presidential debate sa Abril 23, kung saan isasagawa ito bilang town hall format. Una nang sinabi ng Comelec na ang mga kandidato na hindi dadalo sa kanilang mga debate ay hindi papayagan na gamitin ang kanilang e-rally platform.

Unang presidential debate para sa elections 2022, handa na — Comelec

ni Lolet Abania | March 19, 2022

Handang-handa na ang PiliPinas Debates 2022 para sa mga presidential candidates ngayong Sabado, Marso 19, sa Pasay City, ayon sa Commission on Elections (Comelec).

Asahang mahigit sa 30 pulis at mga traffic personnel ang naka-deploy para i-secure ang venue na gaganapin sa Sofitel Hotel Tent at i-monitor ang lagay ng trapiko sa lugar.

Limitado naman ang bilang ng mga indibidwal na maaaring makapasok sa venue, at 5 staff members lamang bawat presidential aspirant ang papayagan sa loob at magsisilbi silang audience.

Mayroong 10 lecterns onstage na katumbas sa bilang ng mga kandidatong tumatakbo sa pinakamataas na elective post sa bansa.

Ang mga kandidato ay magdo-draw ng lots upang madetermina ang unang speaker, habang ang susunod na mga speakers ay ia-arranged alphabetically. Hindi papayagan ang mga notes onstage o sa entablado.

Alas-2:00 ng hapon, kanina ay nagsagawa ang Comelec ng isang media walkthrough sa venue. Lahat ng presidential bets ay nagkumpirma ng kanilang attendance, maliban kay dating Senador Ferdinand “Bongbong” Marcos Jr.

Kabilang sa nagkumpirmang magpa-participate ay sina Ernesto Abella, Leody de Guzman, Isko Moreno Domagoso, Norberto Gonzales, Panfilo Lacson, Manny Pacquiao, Faisal Mangondato, Jose Montemayor Jr., at Leni Robredo.

Ang PiliPinas Debates 2022 ay ipapalabas sa lahat ng local channels at magiging streamed simultaneously sa social media platforms ng Comelec na Facebook, Twitter, at YouTube.

Emergency polling place, ilalaan sa mga senior, PWDs at buntis — Comelec

ni Lolet Abania | February 23, 2022

Naglabas na ang Commission on Elections (Comelec) ng kanilang pangkalahatang panuntunan sa proseso ng pagboto ng mga persons with disability (PWD), senior citizens, at iyong heavily-pregnant o malaki nang nagbubuntis para sa 2022 elections.

Batay sa Resolution 10761, maglalagay ng mga Emergency Accessible Polling Places (EAPPs) sa mga voting centers at piling lugar na nakalaan para sa mga PWDs, senior citizens, at heavily-pregnant na mga botante.

Ang EAPP ay isang silid o makeshift/temporary polling place na nakalatag sa unang palapag o sa ground floor ng isang voting center o sa labas nito subalit may kalapitan sa botohan, kung saan ang PWD, senior citizen at heavily pregnant voters ay makakaboto sa Election Day.

“The Commission shall ensure that the voting procedures in the EAPP, including the facilities and materials therein are appropriate, accessible and easy to understand and use, and that reasonable accommodation shall be granted to persons with disabilities, senior citizens and heavily pregnant voters in order that they may fully exercise their right to suffrage,” paliwanag ng Comelec.

Ayon sa Comelec, ang isang EAPP ay dapat na itayo sa mga lugar na mayroong isa hanggang pitong barangay, dalawa para sa walo hanggang 14 barangay, at tatlo para sa 15 at pataas na mga barangay.

“All EAPPs must have an ample space capable of accommodating at least 10 PWD, SC, and/or heavily pregnant voters, including wheelchair-users and assistors, at any given time,” pahayag pa ng komisyon.

Sinabi rin ng Comelec na mahalagang accessible ang EAPPs sa mga naturang botante, na dapat mayroon ditong mga rampa, malalaking print signages at mga directional signs naman sa entrance ng voting precinct patungo sa EAPP, madaling makitang mga washroom, at Filipino Sign Language Interpreter kung kakayanin pa nito.

Ayon pa sa poll body, ang isang PWD, senior citizen o heavily-pregnant ay maaaring bumoto sa EAPP o sa polling precinct kung saang presinto siya naka-assign.

Ang pagboto sa EAPP ay magsisimula ng alas-6:00 ng umaga hanggang alas-5:00 ng hapon habang ang pagboto sa mga satellite EAPPs ay mula naman ng alas-6:00 ng umaga hanggang alas-2:00 ng hapon.