Mga kandidato, mag-espiya sa kalaban, isumbong ang paglabag — Comelec

ni Lolet Abania | March 28, 2022

Hinimok ng Commission on Elections (Comelec) ang mga kandidato na mag-espiya sa kanilang mga kalabang kandidato at i-report ang posible nitong election violations habang umiinit ang kampanyahan na mahigit isang buwan na lamang bago ang May 9 elections.

“Doon po sa magkakalaban, maganda po mag-monitoran kayo, maganda kayo mismo ang titingin, papansin sa mga kalaban n’yo sa posisyon at isumbong n’yo sa amin at ‘yan po ay aaksyunin namin,” sabi ni Comelec Commissioner George Garcia sa isang public briefing ngayong Lunes.

Ginawa ni Garcia ang pahayag matapos ang mga reports ng umano’y vote-buying na nagaganap sa mga campaign sorties, kung saan agad na bumuo ang Comelec ng isang inter-agency task force. Ayon kay Garcia, ang task force ay maaari na sariling mag-imbestiga kahit na walang mga complainants.

“Huwag po kayong mag-alala. Hindi po kami bingi at bulag sa mga ganyang realidad,” saad ng opisyal. Sinabi pa ni Garcia na ang poll body ay nagmo-monitor ng mga aktibidad ng mga kandidato sa social media.

“Akala siguro ng ibang kandidato hindi namin kayo namo-monitor kahit prior to the campaign period... Hahabulin namin kayo. ‘Yung mga may social media accounts kitang-kita may pa-raffle, may papremyo na ganito. Kami po sa Comelec ay naka-monitor,” diin ni Garcia.

Ini-report din ng opisyal na ilang insidente ng umano vote buying ay naisangguni na sa kanilang field personnel para sa malalimang imbestigasyon.

“Nagsimula na kaming mag-endorse sa aming mga field personnel upang sila mismo ay mag-submit ng mga reports sa amin. ‘Yung mga kababayan natin na may mabigat at credible na ebidensya sa vote buying, puwede n’yo pong isulat ‘yan sa amin sa Comelec law department,” paliwanag pa ni Garcia.

Nakasaad sa ilalim ng Omnibus Election Code, “giving, offering, or promising money or anything of value... in order to induce anyone or the public in general to vote for or against any candidate or withhold his vote in the election is prohibited.”

87.2 % ng mga balota para sa May 9 elections, naimprenta na — Comelec

ni Lolet Abania | March 24, 2022

Nasa 87.2 porsiyento na ng mga balota na gagamitin para sa 2022 elections ang nai-print na, ayon sa Commission on Elections (Comelec).

“As of today, we are able to print already 58,838,453 of the 67,442,616 ballots that we will be using in the 2022 national and local elections,” sabi ni Comelec Commissioner George Garcia sa isang press conference ngayong Huwebes.

“The 58 million something represents 87.2% of the total number of ballots that we are supposed to print,” dagdag ng opisyal. Sinabi ni Garcia na sa mahigit 58 milyong balota, nasa 39,433,714 ang nakapasa sa pinakamataas na quality control at beripikasyon na isinagawa.

Ang bilang naman ng mga depektibong balota ay nasa 105,853 na nagre-represent ng 0.18% ng kabuuang balota, kung saan mas mababa ito kumpara sa 0.19% na nai-record noong Marso 21.

Ayon kay Garcia, ang vote counting machines naman ay nasa 61.7% na handa na para i-dispatch, ang external batteries na nasa 91.09%, transmission devices na nasa 100%, at ang consolidation and canvassing systems ay nasa 55.54% na.

Binuksan naman ng Comelec ang mga pintuan ng National Printing Office (NPO) para maipakita ang proseso ng ballot printing sa iba’t ibang kasapi sa eleksyon.

Kahit election ban.. Programa ng opisina ni VP Leni at iba pa, tuloy na — Comelec

ni Lolet Abania | March 23, 2022

Ipinahayag ng bagong appointed na si Commission on Elections (Comelec) Commissioner George Garcia ngayong Miyerkules na na-grant o pinayagan ng en banc ang mga petisyon ng Office of the Vice President (OVP) at mga ahensiya ng gobyerno at local government units (LGUs) na ipagpatuloy ang kanilang mga proyekto at mga programa sa kabuuan ng campaign period para sa 2022 elections.

“In an executive session today, the En Banc granted the Petition for Exception of the Office of the Vice President of certain projects and programs during the 45-day period of the campaign,” ani Garcia sa isang interview.

Gayunman, ayon kay Garcia, may ilang tinatawag na mga petitions for exception din ang na-denied o granted partially. Ang COVID-19 initiatives ng OVP ay pansamantalang natigil dahil ang campaign period para sa 2022 elections sa mga kandidatong tatakbo sa national positions ay opisyal na nagsimula noong Pebrero 8.

Ayon kay Vice President Leni Robredo, na tatakbo sa pagka-pangulo sa May 9 elections, ang OVP ay naghain ng isang petisyon sa Comelec upang payagan ang opisina, hindi sa kanya partikular, na ipagpatuloy ang pandemic response nito kahit sa panahon ng campaign period.

Aniya pa, nais din niya na i-isolate ang mga programa nito mula sa pulitika. Sinabi naman ni Garcia na ang mga resolutions at iba pang mga detalye hinggil sa mga petisyon ay ilalabas nila ngayon ding araw.