Voter registration, bukas na ulit sa Hulyo 4-23 — Comelec

ni Lolet Abania | June 23, 2022

Ipagpapatuloy na ng Commission on Elections (Comelec) ang voter registration mula Hulyo 4 hanggang Hulyo 23, 2022. Ayon kay acting Comelec spokesperson John Rex Laudiangco, inaprubahan ng Comelec en banc ang resumption ng voter registration sa kanilang regular session na ginanap nitong Miyerkules.

Sinabi ni Laudiangco na nagdesisyon ang Comelec na ipagpatuloy ang voter registration dahil na rin sa napipintong Barangay and Sangguniang Kabataan Elections (BSKE) na nakatakda sa Disyembre 5, 2022.

“Under RA 8189 (Continuing Voter’s Registration Act), voter registration is prohibited within 120 days prior to elections. Ang BSKE po is on December 5, 2022. Roughly starting August 7, prohibited na,” pahayag ni Laudiangco.

Binanggit naman ni Laudiangco na mayroon ding post-registration activities at requirements na kailangang iproseso ang poll body bago ang susunod na eleksyon.

“Roughly starting August 7, prohibited na. Therefore, we only have July 24 to August 6 to Post/Publish names of voter registration applicants; Calendar/Set the Election Registration Board (ERB) Hearings; Subject registrants to database verification; Conduct said ERB Hearings; Draft and Approve the Project of Precincts; Cluster established precincts as may be necessary,” paliwanag niya.

“Madami po kasing post registration activities and requirements na kailangan bigyan ng sapat na oras. Bukod pa po sa Petitions for Inclusion or Exclusions which will be filed with, heard and decided by MeTCs or MTCs,” saad pa ni Laudiangco.

Gayunman, ani Laudiangco, “the resolution will still be formally promulgated.” Ayon sa Comelec, nasa mahigit 67.5 milyon ang registered voters sa katatapos na national at local elections noong Mayo 9.

John Rex Laudiangco, mananatiling spox ng Comelec

ni Lolet Abania | June 13, 2022

Mananatili si Law Department Director John Rex Laudiangco bilang spokesperson ng Commission on Elections (Comelec). Ito ang nakasaad sa isang memorandum na nilagdaan ni acting Comelec Chairperson Socorro Inting na may petsang Hunyo 10 subalit nai-release lamang ngayong Lunes, Hunyo 13.

Si Laudiangco ay nagsisilbing spokesperson ng poll body sa pamahon ng maikling pamumuno ni dating Comelec Chief Saidamen Pangarungan.

Itinalaga si Pangarungan sa puwesto ni Pangulong Rodrigo Duterte noong Marso 9, subalit ang kanyang appointment at ng apat na iba pa ay nalampasan o na-bypassed ng bicameral Commission on Appointments noong nakaraang buwan.

Si Inting ang naging acting poll chairperson kung saan siya ang pinaka-senior mula sa mga umuupong Comelec commissioners. Ayon kay Pangarungan, mabigat man sa kanyang kalooban tinanggap niya pa rin ang desisyon ng CA hinggil sa nasabing usapin.

P272 M campaign spending ng May 9 elections, idineklara ng partido ni Marcos

ni Lolet Abania | June 6, 2022

Umabot sa P272 milyon ang naging gastos ng Partido Federal ng Pilipinas (PFP), ang political party ni President-elect Ferdinand “Bongbong” Marcos Jr. para sa May 2022 elections, base sa kanilang Statement of Contributions and Expenditures (SOCE).

Ayon kay Atty. George Briones, PFP general counsel, ang P272 milyong halaga ng kanilang mga nagastos sa nakalipas na presidential campaign aniya, “well below the maximum expenditure of P337 million allowed by law for a national political party.”

Ang 400-page SOCE, na inihain sa Commission on Elections (Comelec) ngayong Lunes, ay nilagdaan ni PFP national treasurer Anton Lagdameo na siyang napili ni Marcos na maging Special Assistant to the President (SAP) sa ilalim ng kanyang administrasyon.

Nilinaw naman ni Atty. Rico Alday ng PFP na ang halagang ito ay mga gastusin lamang ng political party. Aniya, ang malaking bahagi nito ay alokasyon para sa mga advertisements sa telebisyon.

Ayon kay Alday, nakapaglaan din ang partido ng malaking bahagi ng P272 milyon para sa mga expenses sa rally. “I think kayo na rin ang makakapagsabi niyan, it’s TV ads. TV ads ‘yung malaking bulk,” pahayag ni Alday sa mga reporters.

“Well of course, voluminous ‘yung document, ngayon lang namin natapos,” dagdag ni Alday nang tanungin siya kung bakit naisumite ang SOCE ngayon lamang Hunyo 6.

Batay sa Section 14 ng Republic Act 7166 ay nakasaad, “every candidate and treasurer of the political party shall, within 30 days after the day of the election, file in duplicate with the offices of the Commission the full, true and itemized statement of all contributions and expenditures in connection with the election.”

Dagdag pa rito: “No person elected to any public offices shall enter upon the duties of his office until he has filed the statement of contributions and expenditures herein required.”