Voter registration, iiklian

ni Ronalyn Seminiano Reonico | March 21, 2021

Pansamantalang iiklian ng Commission on Elections (Comelec) ang voter registration nang 2 oras simula sa Lunes, March 22 hanggang sa Linggo, April 4 dahil sa patuloy na pagtaas ng kaso ng COVID-19.

Ayon sa Comelec, ang oras ng voter registration tuwing Lunes hanggang Huwebes ay mula 8 AM hanggang 3 PM at ang issuance naman ng voter certificatioin ay hanggang 5 PM. Tuwing Biyernes ay magsasagawa naman ng disinfection ang Comelec.

Pansamantala ring sinuspinde ng ahensiya ang satellite registration sa mga barangay halls, daycare centers, covered courts atbp. satellite offices.

Nagpaalala rin ang Comelec sa mga magpaparehistro na sumunod sa health and safety protocols.

Pahayag pa ni Comelec Spokesperson James Jimenez, “Wearing of face mask and face shield is mandatory. To minimize physical contact, the accomplishment of the application form and setting of appointment via irehistro.comelec.gov.ph is encouraged.”

Mga empleyado, na-COVID... Comelec sa Intramuros, ipinasara

ni Lolet Abania | March 11, 2021

Pansamantalang ipinasara ang mga opisina ng Commission on Elections (Comelec) sa Intramuros, Manila nang dalawang linggo matapos na maitala ang pagkakahawa-hawa ng COVID-19 ng kanilang mga empleyado.

Sa isang pahayag ni Comelec Spokesperson James Jimenez, isasara ang main office at ang mga opisina ng regional election director ng National Capital Region, Region IV-A at Region IV-B mula Marso 11 hanggang Marso 24.

“We wish to assure the public, however, that work remains unhampered,” ani Jimenez.

“Preparations for the Palawan plebiscite as well as the 2022 national and local elections are underway and will continue to be undertaken by the officials and employees responsible,” dagdag pa ni Jimenez.

Hindi naman binanggit ni Jimenez ang detalye ng mga empleyadong tinamaan ng virus.

Gayunman, aniya, maaaring makipagtransaksiyon sa mga nasabing opisina sa regular na oras gamit ang kanilang official e-mail address at iba pang online communication platforms ng ahensiya.

Dagdag pa ni Jimenez, maaari ring pumunta sa official Facebook at Twitter accounts ng Comelec para matugunan ang iba pa nilang katanungan.

Pagpaparehistro sa COMELEC, extended kahit holidays

ni Mary Gutierrez Almirañez | February 14, 2021

Magsisimula na sa ika-20 ng Pebrero ang extended holiday registration para sa 2022 national elections, ganap na alas-8 nang umaga hanggang alas-5 nang hapon tuwing Martes hanggang Sabado.

Maaaring mag-walk-in ang aplikante sa pinakamalapit na opisina ng COMELEC, ngunit upang maging prayoridad sa pila ay pinapayuhang magpa-appointment at magparehistro muna sa irehistrocomelec.gov.ph.

Kailangang pumunta sa takdang petsa kung kailan nagpa-appointment bitbit ang mga hinihinging dokumento tulad ng application form, proof of residency, at valid ID.

Sa pahayag ni Spokesperson Director James Jimenez, mula noong Setyembre 1 ay wala pang naitatalang COVID-19 transmission ang COMELEC dahil sa online registration at ipinapatupad na health protocols. Tuwing Lunes ay nagdi-disinfect sa mga opisina upang masiguro ang kaligtasan ng bawat aplikante laban sa virus.

Gayunman, mahigit 4 million pa ang aasahang botante, sapagkat 1.3 million pa lamang ang mga nakarehistro mula noong nakaraang taon.