Duterte vs. Duterte sa VP race, hindi magdudulot ng kalituhan sa balota — Comelec

ni Jasmin Joy Evangelista | November 15, 2021

Hindi magdudulot ng pagkalito sa mga botante ang pagkakaroon ng dalawang Duterte sa VP race.

Ito ay matapos ang mga substitution o pagpapalit ng mga kumakandidato sa national post nitong Sabado.

Si Inday Sara Duterte-Carpio na dapat ay tatakbo sanang alkalde uli ay biglang pinalitan ang kandidato sa pagka-bise presidente ng Lakas-CMD na si Lyle Uy.

Umatras naman sa laban si Sen. Bato dela Rosa bilang pambato ng PDP-Laban habang umakyat sa laban sa pagka pangulo si Sen. Bong Go mula sa kanyang VP bid, pero sa ilalim ng Pederalismo ng Dugong Dakilang Samahan kapalit si Grepor Belgica.

Posible namang tumakbo sa pagka-bise presidente si Pangulong Rodrigo Duterte base sa pahayag ni Communications Secretary Martin Andanar.

Ayon sa Comelec, hindi magdudulot ng kalituhan ang pagtakbo ni Duterte kahit pa tatakbo rin bilang bise presidente ang anak nito na si Davao City Mayor Sara Duterte-Carpio.

“Wala naman pong problema dahil pre-printed naman 'yung balota natin. … Hindi naman … magco-cause ng confusion ‘yan because number 1 the first names are there and number 2 … they will be in the same column but there will be no confusion,” anila. 

Tungkol naman sa usapin sa substitution, walang limitasyon ang withdrawal-substitution basta pasok sa itinakdang petsa pero maaaring higpitan ng kaunti ang batas, batay sa Comelec.

“Dapat siguro lagyan ng konting regulasyon. Lagyan ng konting pagbabawal kasi ngayon masyadong bukas yung proseso eh,” anila. 

Handa na ang Comelec sa Lunes para sa huling araw ng substitution.

Final list ng kandidato sa 2022 elections, posibleng sa mid-December pa mailabas — Comelec

ni Jasmin Joy Evangelista | November 12, 2021

Posibleng sa kalagitnaan ng buwan ng Disyembre na mailalabas ng COMELEC ang pinal na listahan ng mga tatakbo para sa 2022 national at local elections dahil na rin sa mga nakabinbin pang reklamo gaya ng kanselasyon ng mga certificate of candidacy (CoC) sa ilang mga kandidato.

Ayon kay Comelec Spokesperson James Jimenez, nasa 91 ang mga petisyon na tatalakayin ng komisyon bago ang final printing ng mga balota sa Disyembre.

Aniya, ang mga petisyon ay kinabibilangan ng mga tatakbo sa pagka-pangulo, bise presidente, senators at partylist representatives.

Samantala, kahit marami raw ang maghahain ng kanilang withdrawal o magsa-substitute ay hindi na papalawigin pa ng Comelec ang itinakdang deadline sa Lunes.

Mananatiling bukas ang mga tanggapan ng Comelec kahit Sabado pero sarado sa Linggo at muling magbubukas sa Lunes o ang mismong deadline para sa withdrawal ng kandidatura.

Mula 6AM-7PM.. Oras ng pagboto sa 2022 elections, extended — Comelec

ni Lolet Abania | November 10, 2021

Inianunsiyo ng Commission on Elections (Comelec) ngayong Miyerkules na ang oras ng pagboto para sa Mayo 9, 2022 national at local elections ay mula alas-6:00 ng umaga hanggang alas-7:00 ng gabi o pinahaba ng isang oras kumpara sa itinagal nito noong 2019 midterm polls.

Sa ginanap na pagdinig sa House Committee on Suffrage and Electoral Reforms ngayong Miyerkules, sinabi ni Comelec commissioner Marlon Casquejo sa mga mambabatas na inaprubahan na ng en banc ang resolusyon hinggil sa itatakdang voting hours.

“Just this morning the en banc already approved general instructions for the Electoral Board... Voting hours start 6 in the morning and end at 7 [p.m.],” ani Casquejo.

Ang mga botante na ayon sa opisyal, “within 30 meters” sa labas ng mga polling precincts na umabot sa closing time ay kanila pa ring pagbibigyang makaboto.

“However, at 7 there’s still voters outside the polling place in front, 30 meters, we will still continue w/ the voting... We do not expect it will end at 7 but we will continue until such time... [that voters within] 30 meters in front will be catered,” sabi pa ni Casquejo.

Kung ikukumpara, ang naging voting hours sa panahon ng eleksyon bago pa ang pandemya ng COVID-19, 2019 midterm polls -- 6AM-6PM; 2016 national at local polls – 6AM-5PM.

Matatandaang sinabi na rin ng mga Comelec officials na “tiyak” na extended ang voting hours sa Mayo 9, 2022, kung saan hindi nila sinang-ayunan ang panukalang magkaroon ng isang multi-day election sa gitna ng COVID-19 pandemic.