2-day liquor ban ipapatupad ng Comelec sa eleksiyon 2022

ni Jasmin Joy Evangelista | December 23, 2021

Magpapatupad ng liquor ban ang Commission on Election mula May 8, 2022 hanggang May 9, 2022, araw ng eleksiyon.

Ito ay nasa ilalim ng Comelec Resolution 10746 dated December 16 pero ini-release ngayong Huwebes, Disyembre 23.

"It shall be unlawful for any person, including owners and managers of hotels, resorts, restaurants, and other establishments of the same nature to sell, furnish, offer, buy, serve, or take intoxicating liquor anywhere in the Philippines," ayon sa resolusyon.

Ang mga hotels, resorts, restaurants, at iba pang establisimyentong tulad nito na duly certified ng Department of Tourism bilang ‘tourist-oriented and habitually in the business of catering to foreign tourists’ ay maaaring ma-exempt, ayon sa Comelec, "but only if they secure prior written authority from the competent officers and upon showing that there are justifiable reasons."

"Only foreign tourists taking intoxicating liquor in said authorized hotels or establishments are exempted from the prohibition," pahayag pa sa resolusyon.

Para sa iba pang detalye at anunsiyo, maaaring bisitahin ang website ng Comelec sa comelec.gov.ph

Ex-CJ sa Comelec: Mga petisyon vs. BBM resolbahin

ni Chit Luna | December 7, 2021

Hinimok ni retired Chief Justice Artemio Panganiban ang Comelec 2nd Division na agarang resolbahin ang mga petisyon laban sa kandidatura ni presidential aspirant at dating Senador Bongbong Marcos lalo’t maaari itong makarating hanggang Korte Suprema.

Dalawa sa pitong petisyon na ito ang humihiling sa poll body na ibasura ang certificate of candidacy ni Marcos habang ang isa ay nais siyang ipadeklarang nuisance candidate.

Ang ikaapat naman ay inihain ng grupo ng mga biktima ng human rights violations noong Martial Law at iginiit na convicted ang dating senador dahil sa kabiguan umanong magbayad ng income tax returns mula 1982 hanggang 1985.

Ipinunto ni Panganiban na iba ang petisyong inihain upang kanselahin ang certificate of candidacy ni Marcos sa mga mas bagong petisyon na inihain naman para ipa-diskuwalipika siya sa 2022 presidential election.

Nilinaw ng dating Punong Mahistrado na ang disqualification ay maaari lamang i-file laban sa isang kandidato na nakagawa ng election offenses sa ilalim ng Omnibus Election Code.

Hindi katulad ng cancellation ng CoC, pinapayagan sa disqualification na magkaroon ng substitution, ng isa pang kandidato mula sa isa pang political party na may kahalintulad na apelyido.

Sakali aniyang kanselahin ang CoC ni Marcos ay hindi na maaaring magkaroon ng substitution dahil mangangahulugan itong hindi kailanman umiral ang CoC.

Dahil dito, hindi mabibilang ang mga boto para kay Marcos at ang kandidatong may susunod na mataas na bilang ng boto ang idedeklarang panalo.

E-raffle isasagawa para malaman ang puwesto ng mga party-list sa balota

ni Jasmin Joy Evangelista | December 7, 2021

Nasa kabuuang 164 party-list groups ang kabilang sa e-raffle upang malaman ang pagkakasunod-sunod ng mga ito sa balota para sa May 2022 polls.

Isasagawa ito sa pamamagitan ng virtual raffle sa Commission on Elections (Comelec) Session Hall sa 8th floor ng Palacio del Gobernador sa Disyembre 10, 2021.

Batay sa datos, 152 grupo na ang aprubado habang 12 naman ang pending pa.

Nasa 107 grupo naman ang na-deny kabilang ang 1-Abante Masang Pinoy Aasenso, Batang Pinoy, Ayuda sa may Kapansanan, Coalition of Concerned Workers, LGBTQ Plus, Organisasyong Nagsusulong ng Libreng Internet Ngayon sa Edukasyon, and Values Voice Philippines.

Sa inilabas na COMELEC resolution, limitado lamang sa isa kada party-list group, organization o coalition, citizens’ arms, at media organizations ang papayagang mapabilang ng online raffle. Walang representative na papayagan sa physical venue.

“Those with pending incidents, participation in the raffle is without prejudice to the resolution of pending incidents and the exclusion on the official ballot, if applicable,” pahayag ng Comelec.

Ang final listing ay ipa-publish sa dalawang pahayagan at sa official website 15 araw matapos ang raffle.

Samantala, sa oras na maitakda na ang puwesto sa balota ng mga party-list ay wala nang magiging re-raffle.