Printing ng opisyal na balota para sa 2022 elections, kumpleto na – Comelec

ni Lolet Abania | April 2, 2022

Nakumpleto na ng Commission on Elections (Comelec) ang pag-imprenta ng mga official ballots para sa 2022 national at local elections.

“The last of the 67.4M official ballots for the polls was printed at approximately 10:28 AM today, April 2,” anunsiyo ng Comelec sa kanilang Twitter account ngayong Sabado.

Ayon sa poll body, matapos ang printing, ang mga balota ay sasailalim naman sa isang verification process.

Sinabi rin ng Comelec na sinimulan ang proseso ng pag-imprenta ng mga balota noong Enero 23 at natapos ito ng Abril 2 na agad nakumpleto bago pa ang kanilang deadline sa Abril 25.

Sa Mayo 9, nakatakda ang 2022 national at local elections.

Comm. Ferolino, Task Force Kontra Bigay chief — Comelec

ni Lolet Abania | March 30, 2022

Itinalaga si Commission on Elections (Comelec) Commissioner Aimee Ferolino bilang head ng inter-agency task force na mag-iimbestiga sa mga reports ng vote-buying. Ito ang inanunsiyo ni Comelec Commissioner George Garcia ngayong Miyerkules, kung saan si Ferolino ang mamumuno ng Task Force Kontra Bigay, at naatasan din siya na mag-draft ng karagdagang guidelines hinggil sa mga ulat ng vote-buying.

“Si Commissioner Aimee Ferolino po ang naitalaga na head o [chairperson] ng Task Force Kontra Bigay. Therefore, siya ang magpapatawag agad ng meeting ng task force, magda-draft ng necessary additional guidelines,” pahayag ni Garcia sa mga reporters.

“At the same time, magpapatupad ng mandato nitong Comelec mandate either to moto propio or accept complaints patungkol sa vote buying,” sabi pa ng opisyal. Ayon kay Garcia, ang Comelec en banc ang nagdesisyon para i-designate si Ferolino na siya anila, ang kuwalipikado para sa posisyon dahil sa kanyang karanasan.

“It is actually the en banc ... Una, si Commissioner Ferolino ay napakatapang na commissioner. Pangalawa, siya po ang vice chairman ng ating gunban at security personnel exemption, at Pangatlo, siya rin ay ang [chairperson] ng iba’t ibang committee tulad ng shipping, at lalo na ‘yung kanyang karanasan sa field,” giit ni Garcia.

“Si Commissioner Ferolino ay dating nagsilbi as a field personnel mula field official natin bago siya natalaga dito sa Comelec, ‘yung kanyang karanasan pagkatapos nu’ng kanyang tapang ‘pag pinagsama-sama mo ‘yan ay napakagandang ingredient para sa pagiging chairman ng Task Force para sa Kontra Bigay,” paliwanag pa ni Garcia.

Una nang sinabi ni Garcia na ang Task Force Kontra Bigay ay bubuuin ng maraming mga ahensiya, kabilang dito ang National Bureau of Investigation (NBI), Philippine National Police (PNP), Armed Forces of the Philippines (AFP), at ang Philippine Information Agency (PIA). Ang task force ay inaasahan para kumilos na motu proprio, gayundin sa mga pormal na mga reklamo kaugnay ng vote-buying.

Nangako naman si Department of Justice (DOJ) Secretary Menardo Guevarra na lilikha siya ng isang team na binubuo ng National Prosecution Service (NPS), NBI, Public Attorney’s Office (PAO), at ang DOJ Action Center para asistihan ang task force.

Sa ilalim ng Omnibus Election Code, sinumang indibidwal na napatunayang nagkasala ng election offense ay dapat parusahan ng pagkakakulong ng hindi bababa ng isang taon subalit hindi hihigit sa anim na taon.

Gayundin, ang mapapatunayang guilty ay pagkakaitan ng karapatang bumoto at ipagbabawal na humawak sa public office, at anumang political party na mapapatunayang nagkasala ng vote-buying ay pagmumultahin.

‘Mayroong pagbabago sa debate format sa April 3 — Comelec commissioner

ni Jasmin Joy Evangelista | March 30, 2022

Asahan ang mga pagbabago sa susunod na presidential debate na inorganisa ng Commission on Elections (Comelec) para sa Linggo, April 3, ayon kay Commissioner George Erwin Garcia.

“There will be changes in the debate format this [S]unday. Expect more clash of wits and the passions will be high among themselves,” ani Garcia sa mensahe sa mga reporter.

Hindi na nagbigay pa ng ibang detalye si Garcia hinggil sa mga pagbabago ngunit ayon sa kanya ay idi-discuss niya ito sa mga miyembro ng media sa Huwebes, March 31.

Ang unang Comelec presidential debate noong March 19 ay tumagal ng tatlong oras na may isang moderator at walang live audience.

Ang kandidatong unang sasagot sa tanong ay pinili sa pamamagitan ng draw lots habang ang mga sumunod na tanong ay sinagot ng mga kandidato batay sa pagkakasunod-sunod, alphabetically.

Sa 10 presidential candidates, tanging si Ferdinand “Bongbong” Marcos Jr. ang hindi dumalo sa unang Comelec presidential debate.