Dahil sa isyu sa Sofitel... VP at presidential townhall debates, ipinagpaliban — Comelec

ni Lolet Abania | April 22, 2022

Inianunsiyo ng Commission on Elections (Comelec) ngayong Biyernes na ang vice presidential at presidential townhall debates na nakaiskedyul ng Abril 23 at Abril 24, 2022, base sa pagkakasunod, ay kanilang ini-reschedule.

Sa isang press briefing, sinabi ni Comelec Commissioner George Garcia na ang mga debates ay ini-reschedule dahil sa ilang mga pangyayari o “circumstances”.

“We will not be able to proceed with the debate for tomorrow and Sunday. Hindi po natin ito matutuloy pero hindi po siya cancelled. Reset lang po by next week, by April 30 and May 1,” ani Garcia.

Ayon kay Garcia, ang Kapisanan ng mga Brodkaster ng Pilipinas (KBP) ang magiging partner ng Comelec sa ini-reschedule na mga debate. Aniya, ang KBP ay nag-alok ng tulong para sa isasagawang mga debate nang “libre”.

Na-postpone ang mga debates matapos na mai-report nitong Huwebes na ang contractor ng Comelec, na Impact Hub Manila, ay hindi pa naibigay ang full payment sa Sofitel Garden Plaza, ang official venue ng event, kung saan nag-udyok sa Philippine Plaza Holdings, Inc. (PPHI), ang owner ng Sofitel, para magbanta ito na i-pull out ang kanilang agreement.

Batay sa mga reports, nag-demand na ang PPHI ng payment matapos na ang mga tseke na inisyu ng Impact Hub ay tumalbog.

Sinabi ni Garcia na nabatid lamang ng poll body ang tungkol dito nang ang mga representatives mula sa Sofitel ay personal na nagpunta sa Comelec para ipaalam sa kanila ang tungkol sa mga bouncing checks na galing sa kanilang event partner.

“Nalaman namin ‘yung problemang ‘yan noong mga nakaraang araw lamang. Personal na pumunta rito ‘yung representatives ng Sofitel upang sabihin na may mga tseke nga raw na nag-bounce sa kanila ng aming partner,” paliwanag ni Garcia.

Sinabi pa ng opisyal na humingi na ang mga Sofitel representatives ng assistance mula sa Comelec para makolekta nila ang bayad mula sa kanilang partner.

Ayon naman kay Commissioner Aimee Ferolino, sa pareho ring briefing, ang Comelec ay hindi isang tinatawag na party to the contract sa pagitan ng Impact Hub at PPHI. Binanggit din ni Ferolino na ang venue para sa susunod na mga debates ay mababago na.

Humingi naman ng paumanhin si Comelec Commissioner Rey Bulay sa mga kandidato dahil sa pagpapaliban ng mga townhall debates.

“Humihingi kami ng paumanhin sa mga kandidato. Sa maikli na ngang panahon na allowed mangampanya, hindi pa namin nasabi kaagad na hindi matutuloy ang 'yung debates, tomorrow and Sunday,” saad ni Bulay.

“Naintindihan namin na na-set n'yo na ‘yan sa inyong kalendaryo sa pangangampanya at humihingi po kami ng paumanhin,” dagdag ni Bulay.

Para sa agreement sa KBP, ayon kay Garcia, ang Comelec na ang mag-iimbita sa mga kandidato upang dumalo sa rescheduled debates, kung saan ito ang huling pagsabak ng mga ito bago ang May 9 elections.

“Sa kasalukuyan, ongoing ang aming pakikipag-ugnayan sa ating mga kandidato sa pamamagitan ng kanilang representante,” sabi ni Garcia.

Voter education para sa kabataan, nabuo ng Comelec at CHED

ni Lolet Abania | April 21, 2022

Bumuo ng isang kolaborasyon ang Commission on Elections (Comelec) at Commission on Higher Education (CHED) upang isulong ang voter education para sa mga kabataan bago pa ang May 9 elections.

Isang memorandum of agreement (MOA) ang nilagdaan nina Comelec Executive Director Bartolome Sinocruz Jr. at CHED Executive Director Cinderella Filipina Jaro na may kaugnayan sa kanilang partnership, sa Palacio del Gobernador sa Intramuros, Manila ngayong Huwebes.

“Without [a] doubt ang partnership na ito will enhance tremendously the voters’ education capability… This will also increase voter turnout and moreso siguro, yung sinasabi nating voters’ understanding [of] how the election processes are being conducted,” saad ni Sinocruz sa kanyang speech.

“Ang mas importante talaga is the total understanding of how the election process is being done so that they can vote intelligently and efficiently which, in turn, will complete our orderly and peaceful elections,” sabi ng Comelec executive.

Sa ilalim ng partnership, isang voters’ education forum ang isasagawa sa lahat ng higher education institutions (HEIs) sa bansa. Layon nitong makapag-produce ng mga mahuhusay na mga botante sa pamamagitan ng pagpapabatid sa mga kabataan ng kanilang karapatan na bumoto, paano at kailan dapat magparehistro, sinu-sino ang mga tatakbong kandidato, at ang mga mechanics ng electoral process at iba pa.

Gayunman, nilinaw ng mga opisyal na nasimulan na ang mga forums sa maraming lugar, kung saan ini-report ni Jaro na ang mga katulad na talakayan ay isinagawa sa Region 9.

Ayon kay Jaro, tinatayang nasa 3.6 milyon estudyante ang naka-enrolled sa HEIs sa buong bansa. Aniya, karamihan sa mga estudyante ay nasa edad 18 – ang voting age sa Pilipinas – at pataas.

Ballots para sa 2022 elections, ipinakalat na – Comelec

ni Lolet Abania | April 20, 2022

Sinimulan na ng Commission on Elections (Comelec) ang pagpapakalat ng mga balota na gagamitin para sa May 9 national at local elections nitong Martes nang gabi.

Sa isang advisory ng Comelec, ang mga ballots ay idineploy mula sa warehouse ng Comelec sa Pasig City patungo sa mga opisina ng city/municipal treasurer nationwide.

Ayon kay Comelec Commissioner Aimee Ferolino, na siyang head ng komite na in charge sa pagpapadala o shipping ng mga balota, umaasa sila na matatapos nila ang deployment nito hanggang Mayo 5.

Tiniyak din ni Ferolino sa publiko na isinasagawa nila ang mga nararapat na security measures para protektahan ang mga balota habang patungo ang mga ito sa kanilang mga destinasyon.

“Escorted itong mga cargoes natin and they have road security so lahat ng security preps nakalatag na,” sabi ni Ferolino sa mga reporters kaugnay sa pagpapakalat ng mga balota.

Una nang nakumpleto ng Comelec ang printing ng 67.4 million official ballots noong Abril 2 para gamitin sa darating na 2022 elections.