Dapat botante nu’ng 2018... ‘Di bumoto sa brgy. elections, tanggal sa listahan – Comelec

ni Zel Fernandez | April 26, 2022

Nilinaw ng Commission on Elections (Comelec) na kabilang ang 2018 barangay elections sa ikinokonsidera para matukoy kung ang isang indibidwal ay matatanggal sa listahan ng mga aktibong botante para sa darating na 2022 elections.

Ayon kay Comelec Commissioner George Garcia, karamihan sa mga nawala sa listahan ng mga aktibong botante ay nakalimutang bumoto noong 2018 barangay elections, kaya nagrereklamo ang mga ito at iginigiit na tanging 2019 elections lang ang kanilang nalagpasang botohan at nakaboto pa noong 2016.

Paliwanag ni Garcia, batay sa desisyon ng Korte Suprema hinggil sa reklamo ng mga hindi aktibong botante, ang hindi pagboto sa barangay elections bilang regular na eleksiyon ay ginagamit na basehan upang matanggal ang pangalan sa voters' list.

Dagdag pa ni Garcia, sorry na lang umano sa mga natanggal na botante. Gayunman, maaari naman aniyang magpa-activate ulit ang mga nawala sa listahan sa darating na Hulyo.

Mga ulat sa nawawalang pangalan ng kandidato sa balota, ‘fake news’ — Comelec

ni Lolet Abania | April 25, 2022

Mariing pinabulaanan ni Comelec Commissioner George Garcia ang mga reports na ang pangalan ni Vice President Leni Robredo ay na-omit mula sa isang balota sa New Zealand, kung saan tinawag niya ang insidente na “fake news".

Sa isang interview ngayong Lunes, sinabi ni Garcia na ang mga balota ay iniimprenta by batch, kaya aniya, marami dapat na mga reklamo silang matatanggap kung ang naturang alegasyon ay totoo.

Ayon kay Garcia, isang dating miyembro ng New Zealand’s parliament na si Paulo Reyes Garcia, ang nagkumpirma ng receipt ng isang ballot na lahat ng mga pangalan ng mga kandidato ay present sa balota.

“Maniwala po kayo. Sa ating mga kababayan, hindi po totoo ‘yan, fake news po. Nagdeklara na po ang ating embahada diyan po sa New Zealand. Wala po silang natanggap kahit isa man na reklamo mula sa mga kababayan sa New Zealand,” giit ni Garcia.

“’Pag nagpi-print po kasi ng balota… hindi po kasi pwedeng isang piraso lang ang print. Batch po ‘yun. Kung isang halimbawa po, ‘yung number ng New Zealand ay isang buong batch ng isang libong balota, eh ‘di sana po kahapon pa lamang ay may isang libo na po tayong mga kababayan na nagreklamo na wala ang pangalan ng isang kandidato,” diin ni Garcia.

Samantala, nanawagan naman ang Philippine Embassy in New Zealand sa mga Pilipino na nagke-claim na nakatanggap ng balota na walang pangalan ng isang presidential candidate na agad itong ibalik sa diplomatic post para sa beripikasyon.

Ito ay matapos na isang larawan ng balota, kung saan nag-circulate sa social media nitong weekend, na na-omit umano ang pangalan ni Robredo sa listahan ng mga kandidato.

“Anyone who claims they have received a ballot with an erasure/non-appearance of any of the entries is requested to return the entire ballot package to the embassy so that we can verify the claim. The embassy is coordinating with the COMELEC accordingly,” batay sa statement ng embassy.

Ayon sa Philippine Embassy in Wellington, “it is committed to upholding the integrity of the national elections as we stand by our oath as career civil servants to uphold the values of patriotism, integrity, professionalism, excellence.”

Sinabi pa ni Garcia, na siyang head ng Comelec’s task force against fake news, patuloy nilang iimbestigahan ang insidente.

Debates, stop! Presidential at VP interviews na lang – Comelec

ni Lolet Abania | April 25, 2022

Hindi na isasagawa ng Commission on Elections (Comelec) ang vice presidential at presidential town hall debates, kung saan kanilang ini-reschedule sa Abril 30 at Mayo 1. Sa halip, ayon sa Comelec ay magkakaroon na lamang ng panel interview sa bawat kandidato dahil anila sa tinatawag na, “inevitable scheduling conflicts".

“The Kapisanan ng mga Brodkaster ng Pilipinas (KBP), has announced that the concluding event of the PiliPinas Debates 2022 Series will no longer be Vice-Presidential and Presidential Town Hall Debates,” saad ni Comelec Commissioner George Garcia sa isang mensahe sa mga reporters ngayong Lunes.

“In consideration of the inevitable scheduling conflicts as the candidates approach the homestretch of the campaign period, and as advised by the KBP, the COMELEC will now be adopting a Single Candidate/Team - Panel Interview format,” dagdag niya.

Sinabi ni Garcia na ang interviews sa mga kandidato ay ipapalabas mula Mayo 2 hanggang 6.

“All will be entitled to a 1 hr panel interview,” ani Garcia na dagdag niya, ang mga kandidato ay maaaring dumalo nang virtual o face-to-face.

Binanggit naman ni Garcia sa isang panayam na ang gagawing interview ay puwedeng one-on-one o may “partner” o “tandem".

Ayon pa sa opisyal, mag-iisyu rin ang Comelec ng advisory kaugnay sa naturang event.

Ang KBP na ang magiging partner ng Comelec sa event, dahil ito sa isyung kinasangkutan ng Impact Hub Manila, ang kanilang dating partner sa naunang presidential at vice presidential debates.

Unang naitakda ang town hall debates — ang pinal na mga debate bago ang May 9 elections — na gaganapin sana noong Abril 23 at 24. Subalit, iniurong ito nang Abril 30 at Mayo 1 sa gitna ng mga reports na ang Impact Hub Manila ay nabigong makapagbayad nang buo sa Sofitel Garden Plaza, ang official venue ng mga debates, para sa mga natapos nang mga debate.