Marawi City, 7 pang bayan sa Mindanao, isinailalim sa Comelec control

ni Lolet Abania | April 26, 2022

Inianunsiyo ng Commission on Elections (Comelec) ngayong Martes na inilagay ang Marawi City at pitong iba pang munisipalidad sa Mindanao sa ilalim ng kanilang kontrol, batay sa rekomendasyon mula sa security forces ng gobyerno.

Labintatlong araw bago ang May 9 elections, inilagay sa ilalim ng Comelec control ang walong sumusunod na lugar sa Mindanao:

Sa Maguindanao:

• Buluan

• Datu Odin Sinsuat

• Datu Piang

• Mangudadatu

• Pandag

• Sultan Kudarat

Sa Lanao del Sur

• Marawi City

• Maguing

Ang Marawi City ay tinaguriang “ground zero” dahil sa 5-buwang mahabang labanan sa pagitan ng government security forces at ng ISIS-linked Maute group.

“Upon the joint recommendation of the Philippine National Police and Armed Forces of the Philippines and Regional Election Director Ray Sumalipao, the Committee on the Ban on Firearms and Security Concerns (CBFSC) placed [has placed these areas] under COMELEC control,” saad ni Comelec Chairman Saidamen Pangarungan sa isang statement.

Una na ring isinailalim ng Comelec sa kanilang kontrol ang bayan ng Tubaran at Malabang sa Lanao del Sur.

Sa Comelec Resolution No. 10757, nakasaad na ang isang lugar ay maaaring isailalim sa Comelec control batay sa sumusunod na mga pangyayari:

• History of/or current intense rivalry among contending parties. Such rivalries could motivate people to engage in violent acts;

• Incidents of politically-motivated violence involving aspirants/candidates and other supporters;

• Violence may be facilitated by the employment of Private Armed Groups (PAGs); and

• Serious armed threats posed by the Communist Terrorist Groups (CTGs), & other threat groups including BIFFs, Abu Sayyaf Group, Maute Group, & other analogous threat groups as may be declared by the competent authority or other paramilitary forces, private armies or identifiable armed bands widely perceived to have committed terrorism, fraud or other election irregularities and threaten or disrupt the holding of free, peaceful, honest, orderly, & credible elections in any political division, subdivision, unit or area.

Ayon pa sa Comelec, na-identify na rin nila ang 104 “areas of election concern” sa buong bansa, subalit hindi pa muna nila ilalabas kung saan naka-pending para sa anila, “monitoring".

3 hackers na nagbebenta raw ng 2022 elections win sa mga kandidato, arestado – PNP-ACG

ni Lolet Abania | April 26, 2022

Tatlong hackers ang inaresto ng mga awtoridad dahil sa umano’y pagbebenta ng tiyak na panalo o ‘sure win’ ng mga kandidato para sa 2022 elections, ayon sa Philippine National Police-Anti-Cybercrime Group (PNP-ACG) ngayong Martes.

Nadakip ng PNP-ACG kasama ang Cybercrime Investigation and Coordinating Center (CICC) ang mga suspek sa ikinasang magkahiwalay na entrapment operations sa Imus, Cavite at Sta. Rosa, Laguna noong Abril 23.

“CICC together with the PNP-ACG conducted an entrapment operation in Imus, Cavite, and Sta. Rosa, Laguna against notorious hackers named ‘XSOX Group’,” batay sa PNP-ACG sa isang statement.

Kinilala ang mga naarestong suspek na sina Joel Adajar Ilagan o “Borger”; Adrian De Jesus Martinez o “Admin X”, at Jeffrey Cruz Limpiado o “Brake/Vanguard/Universe/LRR”.

Ayon sa mga awtoridad, ang mga suspek ay kini-claim umano na may access sila sa system ng Smartmatic Inc., ang system provider para sa automated 2022 elections, at maaaring makaimpluwensiya sa resulta ng May 9 polls.

Base sa initial findings, ang mga suspek umano ay lumabag sa Cybercrime Prevention Act of 2012 na may sumusunod na acts:

• hacking of Smartmatic system;

• disrupting the Comelec website;

• hacking the Napocor website;

• hacking of credit cards and other online transactions;

• ransomware committed against some local commercial websites

Sa tulong ng Department of Justice (DOJ) at ng National Prosecution Service (NPS), ayon sa PNP-ACG, nagsampa na ng criminal cases laban sa mga suspek sa paglabag sa Cybercrime Prevention Act of 2012, partikular sa system interference, illegal access, at attempt sa commission of cybercrime.

“With these arrests, we can assure the public that the threat to rig our electoral process through hacking is substantially diminished as these are the only remaining known hackers who are persistently visible on the dark web claiming that they can manipulate election results,” dagdag pang pahayag.

Sa ginanap na press conference ngayong Martes, sinabi ni CICC Executive Director Cezar Mancao II na ang mga operatiba ay nagkaroon na ng tatlong meetings sa mga suspek.

“In fact, nagkaroon ng three meetings. Una, doon sa Solaire, pangalawa doon sa EDSA Shangri-La Hotel, pangatlo doon sa Pansol, Laguna. Hindi nila alam ang kanilang mga kausap ay mga CICC operatives,” saad ni Mancao.

Ani Mancao, nagpanggap ang mga operatiba bilang mga personnel ng ilang politicians, kung saan nangangailangan ng tulong ng mga hacker para ‘dayain’ ang resulta ng May 9 elections. Ang mga suspek ay nakatanggap ng inisyal na P10 million mula sa P16 million na kabayaran na kanilang hinihingi.

Sinabi ni Mancao na ang mga naturang hackers ay totoong may access sa Smartmatic system subalit sa loob lamang ng partial levels.

Ayon kay Mancao, “The three suspects are connected with former Smartmatic employee Ricardo Argana who initially surrendered to the NBI and went into hiding.”

“Argana supposedly passed the access to the Smartmatic system to Limpiado,” ani Mancao.

Sinabi pa ni Mancao na ang mga suspek ay nagkaroon ng mga contacts sa ilang election candidates sa mga probinsiya subalit tumanggi siyang banggitin ang mga pangalan.

Local absentee voting para sa 2022 elections, start na sa Abril 27 – Comelec

ni Lolet Abania | April 26, 2022

Nakatakdang magsagawa ng absentee voting para sa mga indibidwal na naka-duty sa araw mismo ng eleksyon, Mayo 9, 2022, na magsisimula sa Miyerkules, Abril 27.

Ayon sa Commission on Elections (Comelec), nasa 84,357 botante ang pinayagang maka-avail ng local absentee voting (LAV), na tatagal hanggang Biyernes, Abril 29. Subalit, hindi naaprubahan ang mga aplikasyon ng 9,341 indibidwal dahil sila ay hindi nakarehistro o kaya naman ay deactivated na ang mga ito.

Batay sa Comelec, may kabuuang 93,698 military, police, government at media personnel ang nag-apply sa LAV para sa 2022 elections.

Ang mga local absentee voters naman ay manual na boboto para sa national positions: pangulo, bise presidente, mga senador at party-list.

Ayon kay Comelec Commissioner George Garcia, ang pagboto ng mga military, police at government personnel ay isasagawa ng head ng kani-kanilang mga opisina.

“He will be the one to distribute to the local absentee voters their ballots, then the voters will accomplish the ballots,” saad ni Garcia.

Kapag natapos nang i-fill up ang balota, ibabalik ng voter ang balota sa office head. Ang office head ang naatasang magkolekta ng lahat ng envelopes na naglalaman ng accomplished ballots at ita-transmit ito sa Comelec Election Contests Adjudication Department (ECAD).

Samantala, sinabi ni Garcia na ang mga media personnel na nag-avail ng LAV ay boboto sa Regional Election Director-National Capital Region (RED-NCR).

Ang mga LAV votes ay bibilangin kasama ng mga boto na gagawin sa Mayo 9.

“The counting and canvassing of votes on May 9 at 7 p.m. will be done by the CLAV (Committee on Local Absentee Voting) at the 3rd & 4th floors of the Bureau of Treasury sa Palacio del Gobernador,” ani Garcia.

“All candidates will be notified so they can send their watchers to observe,” sabi pa ng opisyal.

Sina Comelec Chairperson Saidamen Pangarungan at Commissioner Aimee Neri ay kabilang sa mag-a-avail ng LAV. Sila ay boboto sa Comelec main office sa Intramuros, Manila.