Para sa mga Pinoy abroad.. Online voting sa 2025, aprub

ni Madel Moratillo | May 18, 2023

Aprubado na ng Commission on Elections (Comelec) ang internet voting para sa overseas voters kaugnay ng 2025 National and Local Elections.

Ayon kay Comelec Chairman George Garcia, layon nitong makakuha ng mas mataas na turnout sa overseas voters.

Tatrabahuhin naman ngayon ng poll body ang roadmap para sa internet voting.

Noong Hunyo ng 2021, lumagda sa isang memorandum of agreement ang Comelec sa 3 solutions providers para sa live test runs ng internet voting systems.

Noong September 2021, ginawa ito ng information technology firms na Indra, Smartmatic, at Voatz.

Bahagi ito ng pag-aaral kung posible ba ang internet voting.

Hirit ng Comelec.. Bagong voting machines sa 2025

ni Madel Moratillo | May 5, 2023

Para sa 2025 midterm polls, gustong gumamit ng Commission on Elections ng bagong makina.

Ayon kay Comelec Chairman George Garcia, mula sa Vote Counting Machines ang gusto na nilang gamitin ay Automated Election Machine.

Ayon kay Garcia, para sa 2025 ay hindi na nila puwedeng gamitin ang mga VCM dahil mga luma na ito at hindi na puwedeng i-refurbish... wala na umanong mga piyesa ito.

Ang ACM ay upgraded optical mark reader paper based automated election system with direct recording electronic capabilities.

Dalawang teknolohiya ito na pinagsama sa isang makina o hybrid machine.

Dahil bago na ang makina, babaguhin na rin ang paraan ng pagboto.

Kung dati ay kailangang i-shade ang hugis itlog sa tabi ng pangalan ng kandidato, sa bagong sistema ay stamping pen na ang gagamitin.

Sa wish list ng Comelec, dapat ang screen ng makina ay 12 inches o higit pa.

Kung dati ang trasmission ng resulta ay patungo sa Central at Transparency server, sa bagong teknolohiya ay send to all ito nang sabay sabay o mula sa electoral board patungo sa consolidation and canvassing system, Central Server, Majority Server,

Minority Server, Media Server, at Citizens' Arms.

Umaasa naman ang poll body na maaaprubahan ang pondo sakaling dumulog na sila sa Kongreso.

Kung walang 'K' ang kandidato.. COC, 'di na tatanggapin ng COMELEC

ni Madel Moratillo | April 23, 2023

Puwede nang tanggihan ng mga tanggapan ng Commission on Elections (Comelec) ang nais kumandidato sa Barangay at Sangguniang Kabataan Elections.

Nabatid na maglalabas ang Comelec ng patakaran hinggil sa paghahain ng certificate of candidacy (COC).

Ang paghahain ng kandidatura ay una nang itinakda sa Agosto 28 hanggang Setyembre 2.

Ayon kay Comelec Chairman George Erwin Garcia, ang mga hindi lang naman tatanggapin ay mga hindi kwalipikadong aspirante.

Paliwanag ni Garcia, sa mga nakaraang halalan ay tinatanggap nila lahat ng mga COC nang hindi na tinitingnan kung kwalipikado ang mga nais kumandidato o hindi.

Ilan sa mga titingnan ay ang edad ng mga kandidato, nationality, residency, at iba pa.

Inihalimbawa ni Garcia noong 2018 BSKE kung saan umabot sa 6 na libo ang mga kaso para sa kanselasyon ng hindi kwalipikadong kandidato.

Napakahaba rin aniya ang proseso dahil sa kinakailangan itong pagdesisyunan pa ng Division office ng Comelec.