P272 M campaign spending ng May 9 elections, idineklara ng partido ni Marcos

ni Lolet Abania | June 6, 2022

Umabot sa P272 milyon ang naging gastos ng Partido Federal ng Pilipinas (PFP), ang political party ni President-elect Ferdinand “Bongbong” Marcos Jr. para sa May 2022 elections, base sa kanilang Statement of Contributions and Expenditures (SOCE).

Ayon kay Atty. George Briones, PFP general counsel, ang P272 milyong halaga ng kanilang mga nagastos sa nakalipas na presidential campaign aniya, “well below the maximum expenditure of P337 million allowed by law for a national political party.”

Ang 400-page SOCE, na inihain sa Commission on Elections (Comelec) ngayong Lunes, ay nilagdaan ni PFP national treasurer Anton Lagdameo na siyang napili ni Marcos na maging Special Assistant to the President (SAP) sa ilalim ng kanyang administrasyon.

Nilinaw naman ni Atty. Rico Alday ng PFP na ang halagang ito ay mga gastusin lamang ng political party. Aniya, ang malaking bahagi nito ay alokasyon para sa mga advertisements sa telebisyon.

Ayon kay Alday, nakapaglaan din ang partido ng malaking bahagi ng P272 milyon para sa mga expenses sa rally. “I think kayo na rin ang makakapagsabi niyan, it’s TV ads. TV ads ‘yung malaking bulk,” pahayag ni Alday sa mga reporters.

“Well of course, voluminous ‘yung document, ngayon lang namin natapos,” dagdag ni Alday nang tanungin siya kung bakit naisumite ang SOCE ngayon lamang Hunyo 6.

Batay sa Section 14 ng Republic Act 7166 ay nakasaad, “every candidate and treasurer of the political party shall, within 30 days after the day of the election, file in duplicate with the offices of the Commission the full, true and itemized statement of all contributions and expenditures in connection with the election.”

Dagdag pa rito: “No person elected to any public offices shall enter upon the duties of his office until he has filed the statement of contributions and expenditures herein required.”

Ginamit sa 2022 elections AES at network infrastructure, isinara na ng Comelec

ni Lolet Abania | May 30, 2022

Isinara na ng Commission on Elections (Comelec) ngayong Lunes ang Automated Election System (AES) at network infrastructure na ginamit sa katatapos na 2022 national at local elections.

Ayon sa Comelec, ang pagsasara ng mga AES servers at network infrastructure ay ginawa sa harap ng mga political parties at citizen arms, subalit hindi ito bukas sa media coverage para sa seguridad na rin sa data centers.

Bandang alas-10:41 ng umaga sinimulan ng Comelec ang procedure, kung saan ang proseso nito ay ipinalabas livestream sa kanilang official Facebook page at YouTube channel. Inumpisahang i-shutdown ng Comelec ang automated server, physical server, at kanilang network infrastructure sa Backup Data Center-Data One sa Quezon City.

Kasunod nito ang pag-shutdown naman ng kanilang consolidated canvassing system at ang transmission router database sa Central Data Center sa PLDT Vitro Taguig City. Ang AES servers at network infrastructure sa Transparency Data Center sa PLDT Vitro Parañaque ay isinara sabay-sabay sa systems sa Central Data Center sa Taguig City.

Paliwanag ni Comelec acting spokesperson John Rex Laudiangco, ang pagsasara nito ay bahagi ng post-election procedures ng poll body.

“Just like with the transparency server po, there will be a backing up procedure to be followed by the shutdown processes,” sabi ni Laudiangco.

“The Data Centers, similar to the Transparency Server, have already served their purposes po for this Elections, thus, necessitating their decommissioning,” pahayag pa ng opisyal. Ayon pa kay Laudiangco, magkakaroon din ng tinatawag na backing up procedure kasunod ng shutdown processes.

Isinagawa ang naturang event sa Central Data Center sa Bonifacio Global City, Taguig; ang Transparency Data Center sa Sucat, Parañaque; at ang Backup Data Center sa Eastwood City Cyberpark, Quezon City.

Deadline ng SOCE ng mga kandidato hanggang Hunyo 8 lang – Comelec

ni Lolet Abania | May 29, 2022

Ipinaalala ng Commission on Elections (Comelec) sa mga kandidato ng katatapos na 2022 national at local elections na ang deadline para sa paghahain ng kanilang statement of contribution and expenditures (SOCE) ay hanggang Hunyo 8 na lamang.

Sa isang radio interview ngayong Linggo, sinabi ni Comelec Commissioner George Garcia na hindi na tatanggapin ng poll body ang mga statements ng mga gastos sa kampanya na lumagpas sa ibinigay na deadline.

“Pinapaalala natin, whether nag-withdraw o natuloy, whether natalo o nanalo, sila po lahat ay magpa-file ng kanilang SOCE,” giit ni Garcia. “Hindi po kami mag-e-extend beyond June 8,” dagdag ng opisyal. Ayon kay Garcia, ang mga kandidato na hindi magsa-submit ng kanilang SOCE ay mahaharap sa mga kaso at pagmumultahin.

Para naman sa mga bigong maghain sa ikalawang pagkakataon ay maaaring mapatawan ng perpetual disqualification na humawak ng posisyon o public office. Sinabi ni Garcia na tinatayang nasa 500 kandidato noong nakaraang eleksyon ang nahaharap sa posibleng perpetual disqualification para humawak ng posisyon.

Gayundin aniya, ang isang kandidato na nanalo sa eleksyon ay maaaring matanggal sa public office dahil sa paglabag nito sa SOCE regulations.

Ang mga campaign donations ay dapat na i-report sa mga SOCEs na ani Garcia, maaari nilang i-cross-check ang mga impormasyon sa mga donors. Ayon pa kay Garcia, “Failure to declare campaign donations constitutes a violation of SOCE rules and candidates can also be charged of perjury.”