Sa Election Day... Health stations sa polling precincts para sa magkakasakit na botante — DOH

ni Lolet Abania | May 7, 2022

Nakatakdang maglagay ng mga health stations sa mga polling precincts para sa mga botante na nakararanas ng sakit sa araw ng eleksyon upang makapagpakonsulta sila roon, ayon sa Department of Health (DOH).

“We have coordinated with the Commission on Elections. There has been this series of meetings where we will establish health stations in each polling precinct,” ani DOH Undersecretary Maria Rosario Vergeire sa Laging Handa briefing ngayong Sabado.

“People feeling dizziness, high blood pressure could go into these health stations. They could also consult the health stations if they felt other symptoms, including COVID symptoms,” dagdag ni Vergeire.

Aniya, ang mga indibidwal naman na may COVID-19 symptoms ay dadalhin sa mga isolation polling places (IPP).

Ayon kay Vergeire, ang DOH ay nagsagawa ng simulation exercises kasama ang mga Comelec officials nitong Huwebes para sa implementasyon ng health protocols.

“We had long been preparing for this election. We have been in close coordination with the Comelec, the DILG and other concerned offices so that the government can guarantee that elections this year will be safe,” sabi ni Vergeire.

Binanggit naman ng opisyal na ang bansa ay dumaan sa maraming mass gatherings, kabilang na rito ang mga campaign sorties, at mga aktibidad sa Semana Santa.

Gayunman, iniulat ni Vergeire na patuloy ang pagbaba ng COVID-19 cases sa bansa, na sa kasalukuyan ay may average na 184 cases kada araw. May average naman na 78 cases kada araw na nai-report sa Metro Manila.

Depektib at roadshow ballots, sinira ng Comelec

ni Lolet Abania | May 7, 2022

Sinimulan na ng Commission on Elections (Comelec) ngayong Sabado ang pagwasak ng mga depektib at roadshow ballots, dalawang araw bago ang national at local elections sa Lunes, Mayo 9.

Pinangunahan ni Comelec Commissioner George Garcia ang pagsira ng mga unused o defective official ballots, roadshow ballots, at iba pang accountable forms sa harap ng media, political parties, at ibang observers sa National Printing Office sa Quezon City.

Ayon kay Garcia, nakitaan ng quality control efforts ng Comelec ang mga balota na kailangang sirain dahil sa pagkakaroon ng mga defects gaya ng mga smudges o mantsa, maling kulay at maling size, at iba pang depekto nito.

Sinabi naman ng bagong itinalagang Comelec spokesperson na si John Rex Laudiangco, ang kabuuang bilang ng mga balota na kanilang wawasakin ay nasa 933,311.

Aniya, ito ay binubuo ng 586,988 defective official ballots at 346,323 roadshow ballots kung saan ginamit ng Comelec para sa kanilang voters’ education campaign.

Ayon kay Laudiangco, ang lahat ng defective at roadshow ballots ay sisirain nila nang tatlong araw.

Samantala, may kabuuang 67,442,616 official ballots ang naimprenta ng Comelec para sa 2022 elections.

Nitong Huwebes, inanunsiyo ng Comelec na lahat ng vote counting machines (VCMs) at official ballots na gagamitin para sa May 9 elections ay naipamahagi na lahat sa buong bansa.

Ilang OFWs, 'di pinalabas ng amo... Comelec sa Kamara: Internet voting sa susunod na eleksiyon

ni Zel Fernandez | May 7, 2022

Inaasahan ni Commission on Elections (Comelec) Commissioner George Garcia na maikokonsidera ng Kamara ang pag-apruba sa panukalang magkaroon ng online o internet voting sa mga susunod na eleksiyon.

Kasunod ng isinagawang overseas voting para sa mga botanteng OFWs, layunin ng panukala na mapadali ang paraan ng pagboto ng mga Pinoy na nasa abroad.

Paliwanag ni Garcia, kasalukuyang suliranin sa eleksiyon kapag ang isang OFW ay hindi pinayagan ng employer nito na lumabas para makaboto.

Kaugnay din umano ito sa isang phone-in question mula sa isang overseas Filipino worker sa Saudi Arabia na hindi aniya makaboto dahil hindi pumayag ang amo nito na lumabas siya ng bahay.

Ani Garcia, kung mapapabilang umano ang online o internet voting sa mga paraan kung paano makaboboto sa ibang bansa ang mga Pinoy overseas workers, makakatulong aniya ito upang hindi na maging mahirap ang pagboto ng mga OFWs.

Ito umano ang dahilan kung bakit umaasa si Garcia na maikonsidera ng Kongreso ang internet voting para sa mga overseas voters.

Samantala, tinatayang nasa mahigit 1.6 milyong rehistradong Pilipinong botante ang nasa ibang bansa ngayong 2022 elections.