SSS Pension Booster, oportunidad sa mas malaking retirement fund

by Info @Buti na lang may SSS | February 8, 2026

Dear SSS, 

Magandang araw! Ako ay isang SS member. Nabalitaan ko kamakailan na mayroong bagong programang inilunsad ang SSS na tinatawag na MySSS Pension Booster para sa aming mga miyembro. Ano ba ang programang ito? Salamat. — Sally

---

Mabuting araw sa iyo, Sally! 

Napapanahon ang iyong katanungan sapagkat may iniaalok ang SSS na isang savings program bilang karagdagang paraan ng pag-iipon para sa retirement ng mga miyembro. Ito ay tinatawag na MySSS Pension Booster.

Mahalaga ang Pension Booster sapagkat ito ay nagsisilbing karagdagang social protection ng mga miyembro bukod sa kanilang matatanggap na benepisyo sa ilalim ng regular SSS program.

Ang Pension Booster ay isa sa mga probisyon sa ilalim ng Republic Act No. 11199 o ang Social Security Act of 2018 na sinimulang ipatupad noong Enero 2021. Ito ay isang retirement savings program na pinangangasiwaan at ipinatutupad ng SSS upang matulungan ang mga miyembro na makaipon ng mas malaki para sa kanilang pagreretiro. 

Ang Pension Booster ay isang magandang oportunidad sa mga miyembro upang mapalago ang kanilang pera na magsisilbing karagdagang layer ng social security protection para sa kanilang retirement fund.

Ito ay isang programa para sa lahat ng miyembro, anuman ang kanilang monthly salary credit (MSC) o bracket na hindi bababa sa isang kontribusyon at wala pang final claim sa ilalim ng kanilang regular SSS program.

Tulad ng regular SSS program ay hinuhulugan din ito kada buwan. Maaaring magsimula ang miyembro sa halagang P500 kada hulog, at walang itinakdang maximum na kontribusyon depende sa patakaran ng SSS collecting partners. Walang fixed monthly requirement at maaaring maghulog ayon sa kakayahang mag-ipon ng miyembro, basta’t ang hulog para sa Pension Booster as isinasabay sa regular na SSS contribution. 

Layuning protektahan ng programang ito ang principal contributions ng mga miyembro. Ibig sabihin, hindi dapat bababa ang nominal value nito, bagkus ay tataas lamang ito depende sa performance ng SSS investments. Magandang paraan ito para maprotektahan ang pinaghirapang pera ng mga miyembro laban sa inflation.

Kikita ng compounded interest ang mga contribution dito dahil ang investment income na idini-distribute kada taon ay magiging bahagi na rin ng Total Accumulated Account Value (TAAV) ng miyembro na kikita rin ng kaukulang interes.

Sally, kung nais mong mag-invest sa Pension Booster, maaari kang mag-log-in sa iyong My.SSS account sa www.sss.gov.ph, i-click ang “Enroll to Pension Booster” na nasa ilalim ng Services tab, at basahin ang terms and conditions ng programa at i-accept ito.

Ang pinakamababang kontribusyon para sa Voluntary MySSS Pension Booster ay nagkakahalaga lamang ng P500 kada payment at walang maximum amount na nais mong i-invest. Mababayaran ito sa pamamagitan ng Payment Reference Number (PRN) na kailangang mong i-generate gamit ang iyong My.SSS account.

***

Patuloy na tumatanggap ng aplikasyon ang SSS para sa bagong loan penalty condonation program nito.  Inilunsad ang Consolidation of Past Due Short-Term Member Loans with Condonation of Penalty Program (Conso Loan) para tulungan ang mga miyembro na mayroong past-due loans sa SSS. Sa ilalim ng programa, hindi na sisingilin ang kaukulang penalties o multa ng kanilang past-due loans. Sa halip, ang tangi na lamang nilang babayaran ay ang orihinal o principal amount at interes nito.

Sakop ng Conso Loan ang salary loan, calamity loan, Salary Loan Early Renewal Program (SLERP), emergency loan at restructured loans gaya ng Loan Restructuring Program (LRP) noong mga nakaraang taon.

Samantala, maaari nilang bayaran ang prinsipal at interes sa pamamagitan ng one-time full payment, o kaya’y bayaran kahit 10% nito bilang down payment at ang natitirang balanse ay babayaran ng installment sa loob ng hanggang 60 buwan o limang taon, depende sa halaga ng kanilang pagkakautang.

---

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

---

Upang makapagrehistro sa My.SSS, maaari kang magtungo sa SSS website (www.sss.gov.ph) at magparehistro sa Member portal. Kailangang punan mo ang lahat ng kinakailangang impormasyon. Tandaan na ang irerehistrong e-mail address ay kailangang aktibo at nagagamit pa dahil dito ipadadala ng SSS ang link para i-activate at magamit mo ang iyong My.SSS account. 

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System - SSS” o sa X, ang dating Twitter, sa @PHLSSS. Maaari ring mag-subscribe sa YouTube channel sa “MYSSSPH”, at sumali sa SSS Viber Community, “MYSSSPH Updates”. Maaari kayong magpadala ng inyong concerns at katanungan sa usssaptayo@sss.gov.ph.

Pagpapalawig ng SSS ng schedule ng pagbabayad ng mga kontribusyon hanggang Hunyo 15, 2020

Dear SSS,

Magandang araw SSS! Ako ay negosyante sa Pasig City at mayroong 20 empleyado. Dahil sa enhanced community quarantine, hindi ko nahulugan ang kontribusyon ng aking mga empleyado. Nangangamba akong dahil ilang buwan akong hindi nakapag-remit ng SSS contributions ay baka mapatawan na ako ng penalty. Nabasa ko sa inyong Facebook page na hanggang June 1 ang pagbabayad pero hindi ako nakapunta sa inyong opisina. Salamat po.

- Marcus

Sagot

Pinalawig muli ng SSS ang schedule ng pagbabayad ng kontribusyon ng mga employer hanggang Hunyo 15, 2020. Nauunawaan ng SSS ang kalagayan ng mga employer at mga miyembro nito bunga na rin ng ipinatupad na enhanced community quarantine sa iba’t ibang bahagi ng bansa. Kaya minarapat ng SSS na magkaroon ng adjustment sa regular na petsa ng pagbabayad ng kontribusyon sa SSS.

Para sa mga regular employer na tulad mo, maaari mong bayaran ang mga kontribusyon ng iyong mga empleyado para sa mga buwan ng Pebrero, Marso, at Abril 2020 hanggang Hunyo 15, 2020. Ang kagandahan nito, hindi ka na rin papatawan ng anumang multa hinggil sa mga late payments.

Samantala, maaari namang bayaran ng mga household employers ang kontribusyon ng kanilang mga kasambahay para sa mga buwan ng Enero, Pebrero, at Marso 2020 ng hanggang Hunyo 15, 2020. Wala ring ipapataw na anumang multa hinggil dito. Subalit, ang mga kontribusyon naman sa mga buwan matapos ang Abril 2020 ay babalik na sa dating regular na schedule ng pagbabayad.

Para sa mga employer na nagbabayad ng installment sa ilalim ng Contribution Penalty Condonation Program, pinalawig din ng SSS ang schedule ng kanilang pagbabayad. Maaari nilang ideposito ang mga post-dated checks para sa hulog sa mga buwan ng Pebrero, Marso, Abril, at Mayo 2020 hanggang sa Hunyo 15, 2020.

Ngunit nais naming ipaalala sa mga employers na ang mga kontribusyon sa mga buwan matapos ang Abril 2020 ay babalik na rin sa dating regular na schedule ng pagbabayad.

Para naman sa mga individual members, tulad ng mga self-employed, voluntary at non-working spouse, binibigyan sila ng hanggang Hunyo 15, 2020 upang bayaran ang kanilang kontribusyon para sa mga buwan ng Enero, Pebrero, at Marso 2020. Gayunman, ang mga kontribusyon sa mga buwan matapos ang Abril 2020 o mga quarter matapos ang 1st quarter ay babalik na sa dating regular na schedule ng pagbabayad.

◘◘◘

Kung mayroon kayong mga katanungan tungkol sa SSS o mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Maaari bang maging miyembro ng SSS ang housewife?

Buti na lang may SSS

Dear SSS,

Magandang araw SSS! Ako ay housewife at nagtatrabaho naman sa isang kumpanya ang aking asawa. Naghuhulog sa SSS ang asawa ko at nais ko sanang maghulog din sa SSS, ngunit wala akong trabaho. May paraan ba upang maging miyembro ako? Salamat! – Sonia

Sagot

Mabuting araw, Sonia! Marami pa sa ating mga maybahay ang hindi nakakaalam na may programa ang SSS sa ilalim ng Non-Working Spouse (NWS) Coverage na ipinatupad noong 1995 kung saan maaaring makapaghulog ang legal na asawa ng isang aktibong nagbabayad na miyembro ng SSS na hindi nagtatrabaho at ginugugol ang buong oras sa pag-aasikaso sa kanilang pamilya. Maaaring babae o lalaking asawa ito ng working spouse na miyembro ng SSS kung saan kinakailangan ang pahintulot ng kanyang asawa na siyang magbibigay ng kanyang panghulog sa NWS para sa kanyang kontribusyon sa SSS.

Para mag-qualify, hindi ka kailanman dapat naging miyembro o naghulog sa SSS at ikaw ay wala pang 60-anyos. Ang halaga ng iyong magiging kontribusyon ay ibabatay naman sa 50% o kalahati ng monthly salary credit o ang salary level kung saan ibinase ang buwanang inihuhulog ng iyong asawa sa SSS, ngunit hindi ito dapat bababa sa P1, 000.

Halimbawa, si Pedring ay empleyado sa kumpanya na ipinapaghulog ng kanyang employer ng regular sa SSS. Nakabatay ang hulog niya sa P10, 000 monthly salary credit at ito ay katumbas ng P1, 200 na kontribusyon kada buwan. Si Melanie na kanyang asawa ay maaaring maghulog ng P600 na kontribusyon kada buwan bilang NWS na ibinatay sa P10, 000 monthly salary credit (kalahati ng monthly salary credit ni Pedring).

Kung natugunan mo ang mga kuwalipikasyong nabanggit, kinakailangan mong ipasa ang Personal Record (E-1 Form) na may pirma ng iyong asawa sa pinakamalapit na sangay ng SSS. Kalakip sa E-1 Form ang certified true copy ng inyong marriage certificate, gayundin ang birth certificate ng inyong mga anak kasama ang certified true copy ng iyong birth certificate. Kung wala ka ng mga nabanggit na mga dokumento, maaaring ipasa ang kopya ng 2 valid IDs tulad ng Voter’s Registration ID, atbp. upang magbigyan ka ng SS number. Matapos nito, maaari ka ng magbayad ng iyong kontribusyon kada buwan o quarterly sa alinmang bangko o tellering facilities ng SSS. Tandaan na kinakailangan mong magrehistro sa My.SSS Facility o sa SSS Mobile Application para sa kaukulang Payment Reference Number o PRN para sa kaukulang pagbabayad ng iyong kontribusyon kada buwan.

Mahalaga na ang isang NWS ay regular na naghuhulog ng kontribusyon upang maging kuwalipikado ka sa mga benepisyo ng SSS bunsod ng pagkakasakit, panganganak, pagkabalda, pagreretiro, pagpapalibing at pagkamatay. Maaari ka ring makahiram sa mga pautang ng SSS tulad ng salary, calamity, educational assistance loan, atbp.

---

Kung mayroon man kayong mga katanungan tungkol sa SSS o mayroon kayong topic na nais matalakay sa kolum na ito, maaari ninyo kaming i-email sa mediaaffairs@sss.gov.ph.