Asahan na ang malaking adjustment sa ilalim ng GCQ!

Ms. Korina Sanchez / Isyung 'K'

Kailangang magising nang maaga ang karamihan sa ating mga kababayan partikular ang mga manggagawang walang sariling sasakyan. Kailangan nila itong gawin upang makadiskarte ng masasakyan o kung maglakad man ay hindi sila mahuhuli sa oras ng kanilang trabaho.

Pero sa kabila ng kawalan ng mga pampublikong sasakyan, nararamdaman agad natin ang pagbigat ng daloy ng mga sasakyan.

Kasunod ng pagsasaisailalim sa general community quarantine ng Metro Manila, pinayagan nang magbukas ang maraming esblisimyento. Pero hindi lahat ay pinayagang magbukas noong Lunes sapagkat ang mga gym, spa, salon, parlor at barberya ay sa Hunyo 7 pa at d’yan dapat mahigpit ang kalinisan at social distancing at bawal pa rin sa ngayon ang pagbubukas ng mga sinehan.

Inalis na ang liquior ban sa maraming bahagi ng bansa, pero mananatili pa rin ang curfew sa siyudad. ‘Ika nga, walang masama sa pag-inom ng alak basta moderate lang dahil aminin man natin o hindi, mahirap ang buhay at hindi naman “basic need” ang alak.

Samantala, wala pa ring pampasaherong jeepney at UV Express, ngunit may ilang pampasaherong bus ang pinayagang bumaybay ng EDSA. Pinayagan na rin ang P2P, shuttle, taxi, TNVS at tricycle. Sa Hunyo 21 pa pag-aaralan kung papayagan na ang mga “modernong jeepney” na pumasada at kung kailangang dagdagan ang bilang ng mga pumapasadang bus. Marami pa ang kailangang ayusin o baguhin kapag nakita ang epekto nitong mga unang araw ng GCQ. Pero lahat ‘yan ay maaaring magbago kapag napatunayan ng Department of Health (DOH) na muling tumataas ang bilang ng mga kaso ng COVID-19.

Huwag na lang pasaway at matututong sumunod sa mga patakaran at abiso, hindi lang para sa ating sarili kundi para sa mga mahal natin sa buhay.

Sa ngayon, wala pang kasiguraduhan ang mga nangyayari pero wala naman tayong magagawa kundi ang mag-adjust at ipagpatuloy pa rin ang buhay sa “new normal” o bagong sistema.

Muli, pagtutulungan ng gobyerno at mamamayan ang isa sa mga solusyon upang hindi lumala ang ating sitwasyon.

Disiplina ng mamamayan ang kailangan para maiwasan ang second o third wave ng COVID-19

Ms. Korina Sanchez / Isyung 'K'

Bilang tagapagsalita ng Pangulo, si Presidential Spokesperson Harry Roque III ang inantasang magpahayag sa publiko ng mga impormasyon hinggil sa kasalukuyang sitwasyon ng bansa.

Kahapon sa isang pahayag, nagpakita ng mapa ng Pilipinas kung saan may kulay ang mga rehiyon—may berde, dilaw at pula—alam na ninyo ang kahulugan niyan.

Ang National Capital Region (NCR), Laguna at Cebu City ay pula na nangangahulugang high-risk ito sa banta ng COVID-19 kaya ito ay hindi muna ito isinailalim sa general community quarantine tulad ng mga naunang lugar sa bansa. Pero agad sinabing ito ay nasa ilalim na ng “modified” enhanced community quarantine (MECQ) mula Mayo 15 hanggang 31.

Batay sa payo ng World Health Organization (WHO) ang naging rekomendasyon ng IATF-EID na dapat ay “gradually” o dahan-dahan ang pagpapaluwag ng quarantine nang sa gayun ay hindi tumaas ang banta ng pagkalat ng deadly virus.

Sa ilalim ng MECQ, papayagan nang lumabas sa bahay ang mga tao upang makapamalili pero pangunahing pangangailangan lamang at maaari na rin makapagtrabaho ang mga manggagawa sa mga establisimyento na papayagang magbukas.

Papayagan na rin magbalik-operasyon ang ilang manufacturing at processing plants pero hanggang 50% muna at sa ngayon ay pag-uusapan pa kung anu-ano ang mga kabilang sa mga ito. Samantala, may mga makakabiyahe na pero limitado pa rin ang transportasyon.

Ayon kay DFA Sec. Locsin, dapat ipatupad na ang GCQ na para malaman kung natuto na mag-ingat ang mamamayan. Giit nito, kapag dumami ang kaso ng COVID-19, ang mga tao mismo ang dapat sisihin.

Para sa akin, mataas pa rin ang banta ng COVID-19 sa lahat. Kung papayagan na ang paglabas ng bahay, paniguradong marami ang magkakandarapang lumabas ng kani-kanilang bahay. Ang bagay na malabong mabantayan ng mga awtoridad.

Malabo na talagang bumalik sa normal ang buhay ng mga tao. Ako mismo ay kinakabahan pa rin lumabas ng bahay sapagkat nakakatakot makapitan ng virus, nakakatakot na maging “carrier” at malagay sa alanganin ang iyong pamilya dahil sa ‘yo.

Sa huli, pag-iingat ang dapat iprayoridad ng mga tao. Sundin nating lahat ang mga health protocols at iba pang guideline kaugnay nito nang sa gayun ay maiwasan natin ang mas malalang banta na second o third wave ng COVID-19.

Pag-iingat sa COVID-19, da best pa ring panlaban!

Ms. Korina Sanchez / Isyung 'K'

Sa pagsusulat natin ng pitak na ito, umabot na sa 52 ang mga pasyenteng nagpositibo sa COVID-19 sa bansa.

Karamihan sa mga lungsod, partikular sa Metro Manila ay may positibong kaso ng COVID-19.

Pero ang nakababahala, may iilan sa mga nagpositibo ang hindi bumiyahe o lumabas ng bansa, bagkus ay nakasalamuha lamang ng mga naunang nagpositibo.

Malawak na ang epekto ng COVID-19 sa buong bansa. Kung mapapansin natin ang ilan sa mga post sa social media, ang mga pampubliko o mataong lugar tulad ng mall ay iilan o halos wala nang tao.

Naiintindihan natin ang mga tao dahil sa panahon ngayon, mabuti nang umiwas muna sa mataong lugar.

Gayundin, may mga kumpanyang hinihikayat ang kanilang mga empleyado na magtrabaho na sa kani-kanilang tahanan o ang work from home.

Kaugnay nito, iwasan na muna ang makipagkamay o iba pang skin-to-skin contact. Gumamit ng hand sanitizer sa lahat ng pagkakataon, partikular bago pumasok ng opisina o pagkauwi ng bahay.

Kapag umuubo o bumahing naman, siguraduhing takpan ang bibig at maghugas agad ng mga kamay. At iwasan din ang madalas na paghawak sa mukha.

Sa oras naman ng kainan, sa kani-kanyang istasyon na muna kumain at huwag kung saan maraming tao.

Sa madaling salita, umiwas sa maraming tao na kung maaari ay gawing madalas ang paglilinis ng mga kamay sa pamamagitan ng paghugas o paggamit ng sanitizer.

Ito ang pinakamahalagang panlaban sa virus ngayon, malilinis na mga kamay at huwag kalimutang magsuot ng face mask.

Samantala, inanunsiyo na rin ni Pangulong Rodrigo Duterte ang pagkansela ng pasok sa lahat ng antas sa Metro Manila mula Marso 10 hanggang 14.

Mabuti na rin at mas mahirap bantayan ang kalinisan ng mga bata.

Gayundin, marami na ang nagkansela ng mga aktibidad tulad ng Panagbenga Festival sa Baguio, National Collegiate Athletic Association (NCAA) at University Athletic Association of the Philippines (UAAP) at iba pa.

Higit sa lahat ng mga pag-iingat na nabanggit, isa sa mga dapat nating gawin ay palakasin natin ang ating resistensiya.

Sama-sama rin tayong magdasal nang sa gayun ay mabigyan ng talino at kaalaman ang mga scientist at iba pang eksperto upang makaimbento na ng gamot o bakuna para rito.