Pampublikong transportasyon, dapat na talagang dagdagan!

Bong Revilla / Anak ng Teteng!

Naglabasan ang iba’t ibang problema mula nang ideklara ng pamahalaan ang maraming lugar mula sa enhanced community quarantine (ECQ) patungo sa general community quarantine (GCQ).

Unang-una ay ang problema sa pampublikong transportasyon na tila kulang ang kahandaan at hindi natugunan ang bugso ng mga tao na naglabasan dahil nais nang maghanapbuhay.

Marami ang tinangkang magtungo sa trabaho, ngunit bigo silang makasakay at marami ang nagpasyang maglakad kahit malayo para makapagtrabaho pero mas marami ang nagsiuwi na lamang dahil walang masakyan.

Marahil ay mas makabubuti kung dagdagan na ang mga masasakyan ng mga tao dahil sa kakulangan ay tumatambak sila sa sakayan at hindi ito ligtas dahil sa hindi na nasusunod ang physical distancing.

At sa tuwing darating ang mga libreng sakay na handog ng pamahalaan ay mas lalong nagkakasiksikan sa pag-aagawan para makasakay at hindi na alintana na maaring magkahawa-hawa dahil sa kagustuhan ng lahat na makasakay.

Kabilang sa malaking naapektuhan ay ang mga frontliner na kung hindi pa susunduin ay hindi makararating sa lugar na kanyang patutunguhan tulad ng mga nurses, health workers, pulis, sundalo at iba pa.

Sa hanay ng Philippine National Police (PNP) umabot na sa 326 ang kaso ng COVID-19, apat na ang nasawi at 174 sa mga ito ay gumaling na ngunit nasa 720 ang inoobserbahan pa rin.

Nakakabigat ng dibdib na ang ating mga doktor at nurses ay nagkukumahog na magkaroon ng sapat na Personal Protection Equipment (PPE) dahil sila mismo ang humaharap sa mga pasyente na biktima ng COVID-19.

Sa pinakahuling ulat ng Department of Health (DOH) sa kaso ng COVID-19 para sa mga health workers, nasa 2, 707 na ang nagpositibo, nasawi naman ang 26 na doktor, apat na nurses at dalawang non-medical staff.

Umabot naman sa 1,481 ang mga health workers na nakarekober at kasalukuyang nasa maayos ng kalagayan, samantalang nasa 79 naman ang bagong heath worker na nahawa sa COVID-19 dahil sa pagsisilbi sa ating bayan.

Sa pinakahuling pagharap ni Pangulong Rodrigo Duterte sa bayan ay mariin nitong inutos na ibigay agad ang kompensasyon para sa mga frontliners na nasawi at nahawa sa COVID-19 at kasabay ng anunsiyo na darating na sa mga susunod na araw ang lahat ng kailangan nating PPEs, testing kits at iba pang pangangailangan sa pagsugpo ng COVID-19.

Halos lahat ng lokal na pamahalaan sa Metro Manila at mga karatig lalawigan ay nakapaghanda na ng mga pasilidad para tugunan ang pangangailangan ng mga kababayan nating nahawa sa COVID-19 at kumpleto rin sa medical supply.

Isa sa pinakamalaking pagbabago na kapansin-pansin sa mga kalye ay ang pagdami ng bisikleta na inaasahang darami pa sa paglipas ng mga araw, lalo pa at muling inanunsiyo ng pamahalaan na bawal ang magkaangkas sa motorsiklo.

Ang medyo negatibo lamang ay umiral ang pananamantala ng mga pampasaherong sasakyan tulad ng tricycle na doble kung maningil dahil isa na lamang ang puwedeng pasahero kaya para hindi sila malugi ay nagdesisyon na silang doblehin ang singil kahit hindi aprubado.

Ganundin sa taxi, mas lantaran at talamak ang kontrata dahil walang magawa ang mga pasahero kundi ang pumayag dahil hindi sila isasakay ng mga mapagsamantalang tsuper.

So far ay ito ang kabuuan ng ating buong linggo ng ating GCQ at inaasahan nating mas magiging maaayos na ang mga susunod na araw dahil unti-unti ay ibinabalik na tayo ng pamahalan sa ating buhay ngunit sa ilalim na ng new normal.

Ang mahalaga, walo sa sampung Pilipino ay marunong nang mag-ingat na hindi mahawa ng COVID-19, ayon ito sa survey at iilan na lamang ang pasaway.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Pantay na pagtrato sa pagbabalita, maging salarin man o biktima

Bong Revilla / Anak ng Teteng!

Panahon na para baguhin ang nakagisnan nating paggamit ng mga salita para tukuyin ang suspek o salarin, partikular sa pagbabalita na madalas ay ibinabase natin sa kanilang relihiyon, rehiyong pinagmulan o kultura at pangkat na kinabibilangan.

Ito ay upang mabigyan natin sila ng proteksiyon at mapangalagaan ang kanilang civil at political rights, mga karapatang dapat na tinatamasa ng bawat Pilipino na matagal na nating ipinagkakait sa ilan nating kababayan.

Kaya medyo naging madamdamin ang inyong lingkod nang bigkasin ang aking sponsorship speech hinggil sa aking panukalang-batas na, S. No. 448, “An Act Prohibiting the Use of Words that would Denote Religious, Regional or Ethnic Affiliation in Print, Radio, Television Including Cable Television and other Forms of Broadcast Media to Refer to or Describe any Person Suspected or Convicted of a Crime or Unlawful Act and Providing Penalties Therefor.

Maraming pagkakataon, lalo na sa pagbabalita ay nakaririnig tayo ng mga ganitong pagturing — “Muslim na terorista”, “mandurukot na Mangyan” o “Tausog na pirata” — na hindi nakasanayang gamitin sa pagbabalita kung ang suspek ay Kristiyano na alam kong labis na ipinagdaramdam ng mga kababayan nating kaanib ng Muslim.

Ngunit kapag kababayan nating kaanib ng relihiyong Muslim ang nasangkot sa krimen kahit na siya ay doktor ay awtomatikong isinisulat sa balita na “Muslim pumatay” o “doktor na Muslim, pumatay”.

Palagi na lamang isinasama ang kanilang relihiyon o rehiyong pinagmulan na wala namang kinalaman sa kinasasangkutan nilang sitwasyon at ito ay maliwanag na pagyurak at kawalang respeto sa iginagalang nilang kultura at relihiyon.

Ang mga ganitong pagbabalita sa media ay hindi nakatutulong sa pagpapalaganap ng national healing at national unity. Ang mga ganitong negative tagging at diskriminasyon ang nais nating iwasan sa ilalim ng isinusulong nating panukalang-batas.

Isulong natin ang mga batas at polisiya na magtataguyod ng pagkakaisa at hindi ng pagkakawatak-watak. Bigyang-prayoridad natin ang mga panukalang magtatanim ng binhi nang pagkakabuklud-buklod at hindi makasarili o magpapalawig ng hidwaan.

Nauna ko nang isinumite ang panukalang-batas noon pang 2004 habang nasa 13th Congress. Sa ilalim ng Senate Bill 1215, ipinanukala ko ang pagbabawal sa paggamit ng salitang “Muslim” or “Islamic” sa mass media para tukuyin ang suspek o sintensiyado.

Dahil sa tila normal na ito sa kalakaran nang pagbabalita na labis na yumuyurak sa Islamic religious culture, Muslim individuals at sa kanilang collective image, at maging sa kanilang Muslim’s social well-being bilang respetadong mamamayan sa ating bansa.

Ngunit hindi ito nagtuluy-tuloy kaya muli ay isinumite ko ito sa panahon ng 14th Congress noong 2007, noong panahon ng 15th Congress sa taong 2010 at noong panahon ng 16th Congress sa taong 2013.

Batid natin ang mga nangyayaring protesta sa iba’t ibang panig ng mundo ngayon bilang pag-kondena sa racial discrimination at police brutality. Sa panukalang ito, sinisiguro nating napapangalagaan ang karapatang-pantao ng lahat, kahit pa mga suspek o convicts ang mga ito.

Pangarap kong maalis na ang religiously and culturally-biased practices sa ating lipunan dahil ang ating bansa ay state party both to the International Covenant on Civil and Political Rights and International Convention on the Elimination of All Forms of Racial Discrimination.

Kaya lubos ang aking pasasalamat sa suporta ng National Press Club (NPC) at Kapisanan ng mga Brodkaster sa Pilipinas (KBP), the major umbrella groups covering our media practitioners, kabilang ang Movie and Television Review and Classification Board (MTRCB) at ang Commission on Human Rights (CHR).

Pantay na pagtrato lang naman ang pangarap ko, mahirap ba ‘yun?

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Taos-pusong pasasalamat sa lahat ng sumusuporta at nagpapahayag ng pag-alala sa aking ama

Bong Revilla / Anak ng Teteng!

Nabulabog ang katahimikan ng aming pamilya nang biglang makaramdam ng paninikip ng dibdib ang aking ama na si dating Senador Ramon Revilla, Sr.

Bukod sa edad niyang 93, malakas ang kanyang pangangatawan at hindi namin isinaisantabi ang posibilidad na posibleng nahawa sa COVID-19.

Ito ay bahagi lamang ng unang reaksiyon ng kahit sinong pamilya na magkakaroon ng sakit sa panahong ito maganap ang insidente.

Bandang alas-6 ng gabi noong Mayo 31 ay agad naming isinugod sa St. Dominic Medical Center kung saan ay nilapatan siya ng paunang-lunas dahil halos hindi na ito tumutugon sa prosesong ibinibigay ng mga doktor.

Matapos maibigay ang first aid at iba pang emergency medical services ay agad namin itong isinugod sa St. Lukes Medical Center sa Bonifacio Global City, Taguig kung saan siya ngayon nilalapatan ng kaukulang-lunas.

Agad siyang kinabitan ng ventilator at salamat sa Panginoon dahil nagbalik na ang kanyang malay at tumutugon na itong muli sa lahat ng prosesong inilalapat sa kanya.

Sumailalim na rin ito sa lahat test at kasalukuyan pa kaming naghihintay sa mga resulta kaya sa mga nagtatanong kung biktima ba ito ng COVID-19 pandemic ay wala pang kumpirmasyon.

Sa ngayon ay nasa maayos na kalagayan na ang aking ama at kitang-kita sa kanya ang tapang para labanan ang sitwasyon at ang buo naming pamilya ay hindi siya iniiwan hanggang sa hindi siya nakakalabas ng ospital.

Kilala ang aking ama dahil sa mga pelikulang ginampanan niya na may kaugnayan sa agimat ngunit sa totoong buhay ay hahanga ka sa kanya dahil sa ipinapakita niyang lakas sa kabila ng kanyang edad.

Simula nang isugod namin siya sa pagamutan ay walang humpay ang natatanggap naming mensahe na lahat ay nagpapakita ng suporta para sa aking ama at tulad namin ay nagpapahayag din ng pag-aalala.

Hanggang sa kasalukuyan ay walang tigil ang mga tawag at walang sawa naman kami sa pagsagot sa kanilang malasakit na lahat ay nagpahayag ng panalangin para sa kaligtasan ng aming ama.

Hindi kaila sa inyong lahat na kung hindi sa aking ama ay hindi ako mapapasok ng showbusiness at lahat ay minana ko sa aking ama maging ang aking pangalan.

Ang ama ko ang nagturo sa akin na sa murang edad ay kailangan nang maghanapbuhay kaya ako nakaipon sa murang edad hanggang sa mapalaot na ako sa pulitika.

Kulang na kulang ang espayong ito kung respeto at pagmamahal lamang ang pag-uusapan para sa aking ama, dahil ang buong kong pamilya hanggang sa mga apo ay ipinararamdam araw-araw na mahal na mahal namin ang bayani ng aming pamilya.

Sa lahat ng mga nagdasal at patuloy pang nagdarasal para sa kaligtasan ng aming ama ay buong puso akong nagpapasalamat, hinding-hindi ko kayo makakalimutan.

Kung puwede lang idugtong ko ang buhay ko para sa aking ama ay gagawin ko, para sa tunay na ‘Agimat ng Masa’.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com