Housing developer mula sa Southern Luzon...

Wa’ takot sa demanda sa lakas ng kapit sa ‘husgatong’ at ‘pesocutor’, scam pa more!

ni Chit Luna - @Yari Ka! | January 21, 2021

Walang takot sa demanda ang isa sa pinakamalaking housing developer sa Calabarzon.

Kabi-kabila ang ginagawa nitong panunuba dahil nakatitiyak itong ibabasura lamang ang mga kasong isasampa laban sa kanila.

Ang pinakahuling biktima nito ay sub-contractor mula sa isang construction company na sukdulang ipangutang ang proyektong iginawad sa kanya ng housing developer.

Noong 2018, nang igawad ng mga dorobo sa biktima ang pagtapos ng mga housing projects. Halos patapos na nang patigilin siya sa paggawa bunsod umano ng cease and desist order na ipinalabas ng lokal na pamahalaan ng probinsiya.

Kampante naman sana siya dahil sa pangakong magbabayad ang mga ito sa loob lamang ng dalawang linggo.

Ngunit lumipas ang dalawang linggo, buwan at taon — walang naganap na bayaran. Bukod sa hindi na makontak sa telepono, mahigpit ding ipinagbilinan sa mga sekyu ng residential subdivision kung saan nakatira ang mga balatuba, na huwag siyang papasukin.

Sa madaling salita, nauwi sa pagsasampa niya ng asunto sa pag-asang ang mga tanggapan sa bulwagan ng hustisya sa kabisera ng probinsiya ang makatutulong sa kanyang kinasadlakang pagkakabaon sa napakalaking pagkakautang sa suppliers at manggagawa.

Lingid sa kanyang kaalaman, pawang sanggang-dikit pala ng mga dorobo ang ‘husgatong’ (husgadong may patong) at ‘pesocutor’ (pera-perang prosecutor) na humahawak sa kanyang kasong isinampa.

Dahil hindi naman sumisipot sa hearing ang mga akusado, puro delaying tactic ang nangyari — reset dito, reset doon hanggang sa hindi sinasadyang maibulalas ni ‘Pesocutor’ na mayroon din siyang bahay sa isa sa mga residential subdivisions na dinevelop ng mga akusado na malalapit niyang kaibigan.

Sa kabila ng hindi pagdalo ng mga inireklamo, hindi nagpalabas ng warrant of arrest ang ‘Husgatong’, na kalaunan ay ibinasura na lang ang kaso.

Sa pagsasaliksik ng Yari Ka!, lumalabas na hindi lamang pala ang kaawa-awang sub-contractor ang nasuba ng korporasyon.

Sikat na cong., buking na namamangka sa dalawang malaking religious groups...

Para makakuha ng basbas sa mas mataas na puwesto!

ni Chit Luna - @Yari Ka! | January 12, 2021

Isang opisyal ng gobyerno ang paksa ngayon ng bulung-bulungan hinggil sa pagiging salawahan — hindi sa kanyang kabiyak kundi sa kanyang kinabibilangang sekta ng pananampalataya.

Usap-usapan ngayon sa mababang kapulungan ang umano’y paggapang nito sa iba’t ibang religious groups para kumuha ng basbas sa kanyang political plans sa hinaharap. Pero lingid sa kaalaman ng nakararami na mayroon siyang dalawang sektang itinatangi. Ang kanyang religious group na kinabibilangan at ang religious organization na pinamumunuan ng mayamang pastor na malapit kay Pangulong Rodrigo Duterte.

Ang siste, nahihirapan siya ngayong manimbang sa pagitan ng kanyang sektang kinabibilangan at sa pastor na nagmamando sa kanya dahil magkasaliwang posisyon ng magkabilang panig.

Hindi naman niya magawang talikuran ang kanyang kinabibilangang sekta dahil may kakayahan itong mag-deliver ng solid vote sa sinumang kandidato, mapa-national o local level, dahil na rin siguro sa umiiral na doktrinang mahigpit na ipinagbabawal ang pagsuway ng mga miyembro sa anumang pasya ng kanilang nakatataas.

Hindi niya maaaring kalimutan ang dahilan kung bakit siya nasa puwesto.

Pero paano siya tatanggi sa lambing ng pastor na BFF ng ‘powerful man’ ng bansa?

Bago pa man masagot ang nasabing tanong, alamin natin kung ano nga ba ang kanyang pakay sa paglapit sa pastor na BFF ng ‘powerful man’.

Disyembre nitong nakaraang taon nang naulinigan ang panibagong House leadership take-over mula sa kauupo pa lang ni House Speaker Lord Allan Velasco. Hindi aniya nagustuhan ng grupo ng nasabing congressman ang naging bagong kalakaran, partikular sa usapin ng congressional allocations.

Sa pakiramdam ng kagalang-galang na kongresista, kakayanin niyang magmobilisa para sa bagong House take-over lalo pa’t nag-umpisa nang pumasok ang mobilization funds mula sa lider ng kanyang sektang kinabibilangan.

Bagama’t nakakuha ito ng basbas mula sa kanyang sektang kinabibilangan, pinayuhan naman siya ng pastor na BFF ng ‘powerful man’ na huwag nang manggulo, kasabay ng pangakong dadalhin siya nito sa Senado pagsapit ng 2022.

Hindi niya ngayon alam kung paano kakambiyo lalo pa’t pasok na sa kanya ang mobilization fund mula sa most influential religious organization sa bansa.

Ang tanong — alam kaya niyang nag-uusap na ngayon ang dalawang religious leaders na kanyang pinamamangkaan?

Byuting gov’t official, hindi lang pasaway at feeling VIP...

Todo-patol pa sa gov’t official na may sabit, nabuking!

ni Chit Luna - @Yari Ka! | January 5, 2021

Sa kostumbre ng mga Pinoy, partikular sa hanay ng mga mapera at maging ‘yung mga nasa poder, ang pagkakaroon ng extra-marital affair ay “normal” lalo pa’t hindi lamang iilan sa kanila ang pasok sa kategoryang “two-timer.”

Karaniwang pasok sa nasabing imoral na gawain ay ang kalalakihan kaya naman, laking-gulat natin na malamang mayroon ngayong karelasyon ang byuti at prominenteng babaeng government official sa isang opisyal ng gobyerno.

Nanatiling single ang nasabing government official kaya naman, may karapatan din siguro siyang umibig at ibigin ng lalaki, anuman ang katayuan nito. Ang siste, umiibig at patuloy na may relasyon ang babaeng government official sa opisyal ng gobyerno — na may sabit!

Hindi naman ito nakapagtataka dahil dating nanungkulan ang ‘Ginoo’ sa ahensiya kung saan ngayon nagtatrabaho ang ating byuting bida kaya naman, mayroon silang “common interest at denominators.”

Ang totoo, ang nasabing “common denominator” sa pagitan ng dalawa ang naging mitsa upang mag-alab ang relasyon ng may sabit at ng kabit! ‘Kalokah!

Sa kabilang banda, nakakabilib ang dalawang love birds dahil sa angking pag-iingat upang hindi sila makaladkad sa malaking eskandalo. Bagama’t nagkikita (face-to-face) sila sa hindi mabilang na official functions, hindi sila kakikitaan ng anumang ‘ugnayan’.

‘Yun nga lang, ang lahat ng lihim ay tiyak na sisingaw at sisingaw din sa maling hakbang o hindi inaasahang pilantik ng dila ng mga taong malapit sa kanila — at ‘yun na nga ang nangyari. Mabuti na lang sa ilang piling kaibigan lamang ito nabunyag.

Heto na nga ang clue, dating mayor ang ‘Ginoo’, samantala kilala namang pasaway ang byuting government official — feeling VIP to the max! May advance party at convoy pa siya sa bawat dinadaluhang pulong o pagtitipon.