Kapalmuks na nasa likod ng patuloy na bulilyaso ng implementasyon ng RFID

ni Chit Luna - @Yari Ka! | March 6, 2021

Pakapalan yata talaga ng mukha ang uso ngayon sa ahensiyang nasa likod ng patuloy na bulilyaso ng implementasyon ng RFID na lubos na nagbigay-yaman sa ilang appointees sa Toll Regulatory Board.

Sa ating pagsasaliksik, lumalabas na mahusay mangikil ang isang appointee na ang target ay ang mga tollway operators at stakeholders ng South Luzon Expressway (SLEX) at North Luzon Expressway (NLEX). Hindi pa nagkasya sa pakinabang sa mga operator ng mga nasabing tollway, nadale niya rin pati ang yayamaning negosyante na kaugnay naman ng Skyway project.

Ang modus — ipabibira sa mga diyaryo, radyo at telebisyon ang kanyang “prospect” at saka aalukin ng “tulong” na kailangang tumbasan ng malaking halaga. Pero teka, hindi onetime ang pakinabang dahil puwersahan itong pinalalagda sa isang PR contract gamit ang public relations firm ng anak nito.

Nang pumutok ang bulilyaso hinggil sa RFID, kabilang din siya sa mga sinisisi sa perwisyo dulot ng palpak na pangangasiwa ng TRB sa mga toll ways ng SLEX at NLEX.

Sa katunayan, kabilang ito sa mga pinagre-resign ng mismong taong lumagda sa kanyang appointment.

Pero sadya yatang ipinanganak itong likas na makapal ang mukha dahil nagkukumapit ito sa puwesto hanggang sa mga sandaling ito.

Ang huling balita natin ay mayroon ng mga provincial weekly newspapers ang kapalmuks, na siyang plano nitong gamitin sa pamumulitika sa mga kliyenteng hawak ng kumpanyang nakapangalan sa kanyang anak.

Ano nga ba ang meron ang taong ito at ayaw siyang bitawan na unang napabalitang tatakbong opisyal ng gobyerno sa susunod na taon?

Ano pa nga ba, eh, ‘di ‘yung bentahe ng mga provincial weekly newspapers nito na siyang magdadala ng pawang magandang balita tungkol dito.

Ang hindi alam ng Palasyo, mayroong ibang presidentiable na itinutulak ang naturang TRB appointee.

De-kampanilyang abogado, sugar daddy ng laos na aktres

ni Chit Luna - @Yari Ka! | March 2, 2021

Sa hinaba-haba ng panahong walang natatanggap na offer mula sa mga film producer ay napilitang kumapit sa patalim ang isang aktres na higit na kilala sa kanyang pagiging pasaway sa pamilyang kanyang pinagmulan.

Ang kanyang solusyon — humanap ng tao na puwedeng sumuporta sa kanyang magarbong pamumuhay at isang de-kampanilyang abogadong may ambisyong tumakbo sa pagka-senador ang kanyang natisod.

Dahil sa husay ng nasabing de-kampanilyang abogado sa pagtatanggol ng mga tiwali at utak-sindikatong personalidad, siya ay nagkamal ng malaking salapi, na siyang ikinabighani ng laos na aktres.

Bagama’t hindi na sikat ang aktres, hindi maitatangging malakas pa rin ang dating niya sa kalalakihan kahit pa bahagyang lumobo na ang kanyang noo’y maalindog na katawan.

May-asawa na si Atty. pero walang takot nitong ibinubuyangyang sa publiko ang laos na aktres.

Bukod sa pagiging mapagpatol sa mga babae, may record din siya ng pagkabrusko.

Sa katunayan, sa ilang kasong kanyang hinawakan, makailang beses na rin siyang napagalitan ng mga huwes dahil sa paghahamon ng suntukan sa mga nakakalabang kapwa abogado.

Nito lamang nakaraang taon ay nagpasya siyang sumabak sa mundo ng showbiz bilang producer ng kanyang sariling pelikula na magtatampok sa kanyang talambuhay. Siya rin ang bida ng nasabing bio-film at bahagi rin ng nasabing pelikula ang kanyang kalukadidang aktres na niyang niregaluhan ng condo unit.

Sinetch itey kaya? Hmmm…

Mandatory na paggamit ng face shield, ‘di lang pamprotekta kontra COVID-19...

Raket din ng kapalmuks na partner ng opisyal ng gobyerno!

ni Chit Luna - @Yari Ka! | February 20, 2021

Sa dinami-rami ng bansang tinamaan ng lintek na COVID-19, natatangi ang Pilipinas sa may pinakamatagal na nagpatupad ng community quarantine. Bukod sa quarantine, sa bansa lamang din natin nagpatupad ng mandatory use ng face shields.

Kung susuriin maigi, ayos lang ang ginagawang paghihigpit ng pamahalaan para sa kaligtasan ng ating kalusugan.

Pero ang problema, may mga taong nasa poder ang sinasamantala ang national health emergency, tulad ng asawa ng isang ‘bisexual’ opisyal ng gobyerno.

Hindi nakapagtataka kung bakit mandatory ang paggamit ng face shields sa mga establisimyento sa buong kapuluan dahil ito mismo ang inilambing ng ating bida upang pagbigyan ang kanyang asawa na siyang may ekslusibong prebilehiyong makapagpasok ng face shields mula sa China gamit ang iba’t ibang corporate accounts.

Ang partner din niya ang nasa likod ng hoarding ng mga face shields noong Mayo — dahilan kung bakit sumirit ang presyo nito sa merkado. Matatandaang, umakyat hanggang P45 kada piraso ang wholesale price ng mga face shields, tama nabasa n’yo, wholesale price pa lang ‘yun dahil umabot sa mahigit P100 kada piraso ang bentahan ng mga ito noong kahigpitan ng ECQ at MECQ.

Samantala, nang niluwagan na ang restrictions, naisipan naman nilang gawan ng paraan na maging mandatory ito para tiyaking mabebenta pa rin ang kanilang inangkat mula China.

Hindi pa dun natapos ‘yun dahil nasarapan sa malaking pasok ng kita kaya naman puwersahan nang ipatupad ang long-term imposition ng nasabing guideline.

Bakit nga naman hindi nila nanaisin ang gawing permanente ang mandatory use ng mga face shields kung tiba-tiba sila, ‘di ba? Tsk!